ខេត្តរតនគីរី៖ ប្រជាពលរដ្ឋមួយគ្រួសារ បានសង់លំដ្ឋានថ្មីនៅលើដីដែលបម្រុងដាំដុះរបស់ក្រុមហ៊ុនចម្ការកៅស៊ូ ហ្វីប ហ្វ រ៉ាបឺ លីមីធីត (ចំកាត់) ត្រូវបានក្រុមអាជ្ញាធរក្រុងសហការជាមួយកងកម្លាំងមូលដ្ឋានចុះបង្ក្រាប និងរុះរើ ឃាត់គ្រួសារនោះមិនអនុញ្ញាតឲ្យសាងសង់បន្តទៀតឡើយ។
នៅព្រឹកថ្ងៃទី០៧ ខែវិច្ឆិកា ឆ្នាំ២០១២ វេលាម៉ោង ៨ និង ០០ នាទី អាជ្ញាធរបានធ្វើកំណត់ហេតុ កិច្ចសន្យាធ្វើការបញ្ឈប់ និងសន្យារកដីមួយកន្លែងផ្សេងទៀតជាថ្នូរ ដើម្បីឲ្យគ្រួសារនោះ សង់លំនៅដ្ឋានរស់នៅថ្ងៃក្រោយទៀត។
ប្រភពពីសមត្ថកិច្ចដែលចុះធ្វើការហាមឃាត់ការសង់លំនៅដ្ឋាននោះ បានឲ្យដឹងថា គ្រួសារដែលសង់លំនៅដ្ឋានលើដីដែលក្រុមហ៊ុនបម្រុងធ្វើការដាំដុះកៅស៊ូថ្មីឡើងវិញនោះឈ្មោះ ស៊ុន ដារ៉ាវឿន ភេទប្រុស អាយុ ៣៦ ឆ្នាំ ជនជាតិខ្មែរ មុខរបរទិញ-លក់អេតចាយ ប្រពន្ធឈ្មោះ ផាន់ លាភ អាយុ ២៨ ឆ្នាំ មានស្រុកកំណើតនៅក្រុងតាខ្មៅ ខេត្តកណ្តាល បានមកស្នាក់នៅខេត្តរតនគិរី ហើយក្នុងពេលបច្ចុប្បន្ន គាត់បានសង់លំនៅដ្ឋានប៉ះចំដីរបស់ក្រុមហ៊ុនចម្ការកៅស៊ូ ស្ថិតនៅភូមិ៤ សង្កាត់កាចាញ ក្រុងបានលុង។
សមត្ថកិច្ចបានបន្តថា នៅពេលគាត់សង់ផ្ទះថ្មីនៅលើដីនោះ ត្រូវភាគីខាងក្រុមហ៊ុនចម្ការកៅស៊ូ រ៉ាបឺ លីមីតធីត ចុះមកហាមឃាត់មិនឲ្យសង់ ហើយគ្រួសារមួយនោះ បានប្តឹងអាជ្ញាធរសង្កាត់ឲ្យជួយរកដំណោះស្រាយដល់ពួកគាត់ ហើយអាជ្ញាធរក៏បានដឹកនាំកម្លាំងចុះមកសម្របសម្រួលធ្វើកិច្ចសន្យា ដោយឲ្យគូភាគីទាំងសងខាងផ្តិតមេដៃ បញ្ឈប់ការសាងសង់ និងរកដីដោះដូរឲ្យគ្រួសារនោះបានសង់ផ្ទះរស់នៅជាប់នឹងដងផ្លូវឲ្យវិញ។
ម្ចាស់លំនៅដ្ឋានថ្មីនោះ បានប្រាប់អ្នកកាសែតថា រូបគាត់បានមករស់នៅខេត្តរតនគីរីអស់រយៈពេល ១០ ឆ្នាំមកហើយ ប៉ុន្តែចូលជាសមាជិកប្រជាពលរដ្ឋភូមិ៤ បានពីរឆ្នាំប៉ុណ្ណោះ ហើយបានសង់ខ្ទមមួយរស់នៅ និងបានដាំដើមឈើដូចជាៈ ដើមស្វាយចន្ទី និងដំណាំហូបផ្លែជាច្រើន ។ល។ នៅលើដីនេះ ស្រាប់តែឥឡូវត្រូវក្រុមហ៊ុនហាមឃាត់រូបគាត់មិនឲ្យរស់នៅ ហើយក្រុមហ៊ុនបានសន្យារកដីឲ្យពួកគាត់រស់នៅកន្លែងផ្សេងវិញ។ ពួកគាត់ពុំជំទាស់អ្វីនោះទេ ប៉ុន្តែគាត់ខ្លាចក្រែងថ្ងៃក្រោយ ក្រុមហ៊ុនមិនគោរពតាមកិច្ចសន្យា គាត់មិនមានអ្វីជាទីពឹងនោះទេ។
តែទោះជាយ៉ាងណា ក៏មានអាជ្ញាធរ ព្រមទាំងសាលាក្រុង បានធ្វើជាសាក្សីរួចជាស្រេចទៅហើយ សង្ឃឹមថា អាជ្ញាធរមូលដ្ឋាន ព្រមទាំងសាលាក្រុងបានលុង នឹងគោរពតាមកិច្ចសន្យាខាងលើនេះ៕
No comments:
Post a Comment
yes