កម្ពុជា​រង​ការ​ចោទ ថា​បាន​បន្លំ​លុយ​ជំនួយ សម្រាប់​ប្រឆាំង​រោគ​ឆ្លង

មូលិធិពិភពលោក សម្រាប់ប្រឆាំងនឹងរោគឆ្លង បានអះអាងថា ប្រទេសកម្ពុជា បានលួចបង្វិល ទឹក ប្រាក់ ចំនួនដ៏ច្រើន​សន្ធឹកសន្ធាប់មួយ ដែលទុកសម្រាប់ប្រើប្រាស់ក្នុងគម្រោង ការប្រយុទ្ធប្រឆាំង នឹងជម្ងឺឆ្លងទាំងនេះ។ មូលិធិបានសន្យា​ថា នឹងបន្តការ​ស្រាវជ្រាវរបស់ខ្លួន ទៅលើករណីនេះ នៅ ក្នុងប្រទេសកម្ពុជា​ដែលល្បីថា ជាប្រទេសមួយ មិនសូវមានរឿង ស្អាតស្អំ​ស្រាប់​ផងនោះ។

ទីភ្នាក់ងារសាពត៌មានបារាំង បានដកស្រង់សេចក្ដីប្រកាស កាលពីថ្ងៃពុធទី ១៤វិច្ឆិកាកន្លងទៅ របស់ មូលិធិពិភពលោក សម្រាប់ប្រឆាំងនឹងជម្ងឺឆ្លង ដែលមានជាអាថ៌ថា «ការស៊ើបអង្កេតមួយ ទៅលើ ប្រាក់ជំនួយ នៅក្នុងប្រទេសកម្ពុជា បាន​នឹងកំពុងធ្វើបច្ចុប្បន្នភាព ទៅលើភស្ដុតាងយកជាការបាន និងច្បាស់ការណ៍ ថាមានការក្លែងបង្វិលទឹកប្រាក់»។

មូលិធិថា «បានចាត់វិធានការភ្លាមៗ ដោយបានបង្កើតអោយមានជាភ្នាក់ងារឃ្លាំមើល ទៅលើ រាល់ការទិញដូរទាំងឡាយ ប្រព័ន្ធហិរញ្ញវត្ថុ និងការគ្រប់គ្រង»។ 

ចំនួនទឹកប្រាក់ដែលត្រូវបានលួចបង្វិលនោះ ត្រូវបានប្រភពស្និតនឹងសំនុំរឿង​ បង្ហើប​អោយ​ដឹងថា មានចំនួនជិតមួយលានដុល្លាអាមេរិក។

លោក ម៉ម ប៊ុនហេង រដ្ឋមន្ត្រីនៃក្រសួងសុខាភិបាលខ្មែរ បានប្រាប់អាអេហ្វប៉េថា«មិនបានដឹង» ពីការចោទប្រកាន់​ទាំង​នេះទេ។

របាយការណ៍ពេញ របស់នាយកដ្ឋានស៊ើបអង្កេត នៃមូលិធិនេះ កំពុងត្រូវបានរងចាំ ថានឹង ត្រូវចេញ ផ្សាយ​ក្នុងប៉ុន្មាន​សប្ដាហ៍ខាងមុខ។ បើតាមប្រភពអ្នកការទូត និងខាងវេជ្ជសាស្រ្ត បានបង្ហើបអោយ ដឹងដែរថា ការស៊ើបអង្កេត​មួយ​ទៀត បានត្រូវគេបើកធ្វើដែរ ទៅលើសំនុំរឿងសង្ស័យមួយថា មាន «ចរាចរណ៍ថ្នាំគ្រាប់ក្លែងក្លាយ» នៅក្នុងគម្រោង​ជាច្រើន ដែលទ្រទ្រង់ផ្នែកហិរញ្ញវត្ថុ ដោយ មូលិធិ នេះ។

ទោះបីជាយ៉ាងណាក៏ដោយ ក៏អង្គការមូលិធិ ដែលមានទីតាំងនៅទីក្រុងហ្ស៊ឺណែវ នៃប្រទេសស្វីស បានបញ្ជាក់ថា ខ្លួននៅ​តែរក្សាសកម្មភាពមនុស្សធម៌របស់ខ្លួន នៅប្រទេសអាស៊ីមួយនេះដដែល តែថាខ្លួនត្រូវស្វែងរក«ដៃគូរណាផ្សេង»ទៀត ក្រៅពី​មជ្ឈមណ្ឌលជាតិនៃជម្ងឺឆ្លង របស់ប្រ ទេស កម្ពុជា។

ប្រទេសកម្ពុជា ត្រូវប្រឈមមុខនឹង ជម្ងឺឆ្លងដ៏សំខាន់ៗជាច្រើន ដែលជម្ងឺទាំងនោះ មានភាពស៊ាំ នឹង ថ្នាំពេទ្យសព្វថ្ងៃ ហើយ​បានរីកឆ្លងរាលដាលខ្លាំង នៅតំបន់អាស៊ីផ្នែកអាគ្នេយ៍ និងអាចក្លាយ ជា គ្រោះថ្នាក់ដ៏ធ្ងន់ធ្ងរ ប្រសិនជាគេមិនអាច​គ្រប់គ្រង​វាបានទេនោះ។

សេចក្ដីប្រកាសនោះ បានពន្យល់ថា «អ្នកជំនាញបានគិតមុនហើយ ពីការបន្តផ្ដល់ជំនួយ ថាជារឿង​សំខាន់ តែត្រូវធ្វើវា​ជាមួយនឹងហនិភ័យ នៅតំបន់អាស៊ី ប៉ាស៊ីភិក ដោយមិនមែន មានតែនៅ កម្ពុជា មួយប៉ុណ្ណោះទេ។»

មូលិធិបានបង្ហាញពីតុល្យភាពមួយ កាលពីឆ្នាំទៅម៉ិញ ពីការបាត់បង់ទឹកប្រាក់ ប្រមាណជា ៣៤ លាន ដុល្លាអាមេរិក នៅ​ក្នុងប្រទេស៤ នៃទ្វីបអាហ្រ្វិក និងបានសន្យា ត្រូវបង្កើន ការត្រួត ពិនិត្យ របស់ខ្លួន ទៅលើហិរញ្ញវត្ថុនេះ។  មូលិធិបានបង្ហាញ​ផ្សាយនៅលើ​គេហទំព័ររបស់ខ្លួនថា ទឹក ប្រាក់ ដែលបានផ្ដល់ទៅអោយប្រទេសកម្ពុជា មកដល់ថ្ងៃនេះ មានចំនួន​ប្រមាណ​​​ជា ២៨០លាន ដុល្លា រួចមកហើយ៕