លោក សម រង្ស៊ី ប្រធានគណបក្ស សង្គ្រោះជាតិ
សំណួរជាច្រើនទាក់ទងនឹងការវិលត្រឡប់របស់ លោក សម រង្ស៊ី បានចោទសួរឡើងជាបន្តបន្ទាប់ ខណៈពិធីថ្វាយព្រះភ្លើងដល់ព្រះបរមសពសម្តេចឪចូលមកដល់ និងការបោះឆ្នោតជាតិ ក៏កាន់តែជិតចូលមកដល់ដែរនោះ។
តើនេះជាឱកាសនៃការវិលត្រឡប់របស់មេដឹកនាំគណបក្សជំទាស់ គឺ លោក សម រង្ស៊ី បានមកដល់ហើយមែនទេ?
កាលពីសប្តាហ៍មុននេះ ឧបនាយករដ្ឋមន្រ្តីក្រសួងមហាផ្ទៃ លោក ស ខេង បានប្រាប់រដ្ឋសភាថា លោកមានការពិបាកចំពោះករណីលោក សម រង្ស៊ី ហើយលោកចោទសួរថា តើត្រូវធ្វើដូចម្តេច? ៖ "បើ អ៊ុងសាន ស៊ូជី ទោះបីប្តីគាត់ងាប់ក៏ដោយ គាត់អត់ទៅទេៗ គាត់សុខចិត្តនៅក្នុងស្រុក បើគាត់ទៅគាត់ថាខ្លាចចូលស្រុកមិនបាន ដើម្បីតស៊ូទៀត អញ្ចឹងគាត់អត់ទៅទេ ប៉ុន្តែចំពោះឯកឧត្តម សម រង្ស៊ី អាហ្នឹងរឿងរបស់គាត់ វាពិបាកៗ រួចហើយចេះនាំគ្នាបកស្រាយទៅតាមទស្សនៈថា រឿងនិយោបាយ រឿងអីណាហូរហែរអញ្ចឹងទៅ ទោសនយោបាយទោសអីអញ្ចឹងទៅ អាហ្នឹងចេះតែបកស្រាយអញ្ចឹង ប៉ុន្តែធ្វើម៉េចឥឡូវ បើយើងមិននាំគ្នាគោរពច្បាប់ទាំងអស់គ្នា"។
អ្នកវិភាគ បានយល់ឃើញថា ប្រធានគណបក្សជំទាស់អាចប្រើឱកាសនេះ ដើម្បីចូលកម្ពុជាវិញ ដោយមិនចាំបាច់មានការយល់ព្រមជាសាធារណៈ ពីរាជរដ្ឋាភិបាលដែលដឹកនាំដោយ គណបក្សប្រជាជនកម្ពុជាឡើយ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ គិតថា ប្រសាសន៍របស់មន្រ្តីជាន់ខ្ពស់រូបនេះ អាចជាសញ្ញាល្អក្នុងការវិលមកវិញរបស់លោក សម រង្ស៊ី ៖ "ខ្ញុំថា ឯកឧត្តម ស ខេង គឺជាមន្ត្រីជាន់ខ្ពស់បំផុតៗ ក្នុងជួរបក្សផង និងក្នុងជួររដ្ឋាភិបាលផង ហើយខាងសន្តិសុខទៀត ខ្ញុំថា ប្រហែលជាមានទម្ងន់គ្រាន់បើដែរ ប៉ុន្តែនេះស៊ីសងតើឯកឧត្តម ស ខេង មានប្រសាសន៍អញ្ចឹង គឺដោះស្រាយយ៉ាងម៉េច អាហ្នឹងរឿងនីតិវិធីបែបបទ រកការសម្រួល ក៏ប៉ុន្តែខ្ញុំថាត្រង់នេះ គឺមិនបិទនិយាយទៅ គឺអត់ចប់ពីរឿងការវិលត្រឡប់របស់ឯកឧត្តម សម រង្ស៊ី ព្រោះថាមិនមែនត្រឹមតែក្នុងប្រទេសទេ គឺក្រៅប្រទេស ក៏ប្រទេសធំៗជាអាថ៌ គឺសហគមន៍អ៊ឺរ៉ុប អូស្ត្រាលី ជាពិសេសគឺសហរដ្ឋអាមេរិក"។
អ្នកវិភាគព្រឹត្តិការណ៏សង្គម និងជាប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ យល់ថា បើលោកសម រង្ស៊ី មិនប្រើឱកាសនេះទេ នោះអាចលែងមានឱកាសទៀតហើយ ៖ "ជម្រើសដ៏ល្អបំផុតសម្រាប់គណបក្សប្រជាជន គឺលោកសម រង្ស៊ី នៅក្រៅស្រុក អាហ្នឹងគឺគេមិនបាច់ដោះស្រាយហ្មង គេមិនបាច់ឈឺក្បាលដោះស្រាយរឿងហ្នឹងទេ ហើយអញ្ចឹងរឿងហ្នឹងចប់ហ្មង ។ខ្ញុំមើលទៅឱកាសនេះ ជាឱកាសមួយដ៏ល្អ បើសិនជាបាត់បង់ឱកាស មានមួយទៀត ខ្ញុំមើលទៅ គេនឹងបាត់បង់ជំនឿទៅលើលោកសម រង្ស៊ី វីរភាពរបស់លោកសម រង្ស៊ី ហើយខ្មែរយើង អ្នកនយោបាយ ជាពិសេសអ្នកនយោបាយគណបក្សប្រឆាំង ទាល់តែមានវីរភាព ធ្វើមនុស្សក្លាហាន ហើយបើសិនជាគេឃើញថាគាត់មិនសូវក្លាហាន ដូចថា គាត់ដូចតែគេដូចតែឯង អាហ្នឹងគឺខ្ញុំមើលទៅ ក្រែងលោគាត់ពិបាកក្នុងការទាក់ទាញការគាំទ្រពីប្រជាពលរដ្ឋ វាអាចជាការបញ្ចប់នូវឆាកនយោបាយ ជីវិតនយោបាយរបស់ លោកសម រង្ស៊ី ដែរ"។
តែលោក អ៊ូ វីរៈ វិភាគថា ការព្រលយរបស់រដ្ឋមន្រ្តីក្រសួងមហាផ្ទៃ មិនរំពឹងថា ជាការបើកច្រកឲ្យលោក សម រង្ស៊ី នោះទេ គឺទាល់តែមានភ្លើងខៀវ ពីលោកនាយករដ្ឋមន្រ្តីផ្ទាល់ទើបជាសញ្ញាវិជ្ជមាន។
សម្រាប់អ្នកវិភាគនយោបាយ លោកបណ្ឌិត សុខ ទូច យល់ថា បន្ទាប់ពីមានសម្ពាធពីអន្តរជាតិគណបក្សកាន់អំណាចអាចប្រើឱកាសនេះ ដើម្បីសម្របសម្រួលអ្នកនយោបាយទៅតាមព្រះរាជតម្រិះរបស់អង្គសម្តេចឪ ៖ "រឿងនេះ វាគៀកចូលជិតបោះឆ្នោតហើយ ហើយការព្រួយបារម្ភរបស់អន្តរជាតិ ក៏មានច្រើនដែរ ទាំងសហគមន៍អឺរ៉ុប ទាំងអាមេរិក លើកលែងតែអាស៊ានទេ យើងមើលឃើញថា ហាក់មិនមានចេញសេចក្តីថ្លែងការណ៍អីមួយ ក៏ប៉ុន្តែខាងមហាអំណាចហ្នឹងឃើញមានច្រើន ទាំងអូស្ត្រាលីក្តីហ្នឹង ដូចនេះទេ ខ្ញុំជឿថាប្រហែលជាអ្នកនយោបាយសម្របសម្រួលណាមួយ ដោយប្រើប្រាស់តួនាទីរាជវាំងហើយ"។
លោក សម រង្ស៊ី បានថ្លោះសិទ្ធិ ឬហៅថា អស់សិទ្ធិបោះឆ្នោតម្តងរួចហើយ កាលពីការបោះឆ្នោតឃុំ-សង្កាត់ ឆ្នាំ២០១២ ប៉ុន្តែកាលនោះលោកមិនមែនជាបេក្ខភាពឈរឈ្មោះឲ្យគេបោះឆ្នោតនោះទេ។ រីឯការបោះឆ្នោតជាតិឆ្នាំ២០១៣នេះវិញ លោកគឺ ជាប្រធានគណបក្សសង្រ្គោះជាតិ ដែលទំនងជាបេក្ខភាពនាយករដ្ឋមន្រ្តីផងដែរ៕
No comments:
Post a Comment
yes