សកម្មភាពឈ្មួញដឹកឈើក្រញូងខុសច្បាប់ ដែលប្រើរថយន្តដូចជា កាមរីឆ្លាម កាមរីបាឡែន ពណ៍ស្ក ពណ៍ខ្មៅ ដឹកចេញពីស្រុកត្រពាំងប្រសាទ ស្រុកអន្លង់វែង ខេត្តឧត្តរមានជ័យ ឆ្លងកាត់ផ្លូវលេខ៦៧ (ផ្លូវហៃវ៉េ) ទាំងយប់ទាំងថ្ងៃបានដោយសេរី ដែលពុំមានការបង្ក្រាបពីសំណាក់អស់លោកមន្រ្តីជំនាញតាមដងផ្លូវទាល់តែសោះ។
ប្រភពព័ត៌មានពីស្រុកអន្លង់វែងបានអោយដឹងថា អ្នករកស៊ីដឹកឈើក្រញូងទាំងនោះ គឺជាឈ្មួញដដែលៗ ដែលមានឈ្មោះដូចជាលោក ១-យិន ២-ថន ៣-ប្រុញ ៤-ពន្លក ៥-ស្នា ៦-ចូច ដែលសុទ្ធតែជាមេឈ្មួញរកស៊ីដឹកឈើក្រញូងដ៏ធំប្រចាំទិសឧត្តរនេះតែម្តង។ ប្រភពបានអោយដឹងទៀតថា ក្រុមអ្នករកស៊ីទាំង៦នាក់នេះ គេមានលុយច្រើន និងមានរថយន្តទំនើបទំនើប មិនតែប៉ុណ្ណោះគេស្គាល់ចិត្តថ្លើមគ្នាជាមួយមេព្រៃតាមដងផ្លូវដូចម្តាយនិងកូន ព្រោះពួកគេជាឆ្នាំងបាយប្រចាំថ្ងៃដ៏ធំសំរាបសមត្ថកិច្ចដែលដាក់ស្នាក់ការតាមដងផ្លូវ។
ក្រុមអ្នករកស៊ីដឹកឈើក្រញូងធ្លាប់បានរអូរទាំថា សព្វថ្ងៃរកស៊ីដឹកឈើរកលុយចិញ្ចឹមតែមេព្រៃ និងសមត្ថកិច្ចតាមដងផ្លូវតែប៉ុណ្ណោះ។ ពួកគេបន្តថា ក្បាលឡានបាឡែនដឹកឈើក្រញូងមួយគេបង់លុយអោយមេព្រៃតាមដងផ្លូវចំនួន២រយដុល្លារអាមេរីក ក្នុងមួយកន្លែង សរុបទៅពីខេត្តឧត្តរមានជ័យដល់ខេត្តកំពង់ចាមបង់អស់ជិត៥ពាន់ដុល្លារឯណោះក្នុងក្បាលឡានមួយគ្រឿង។ អ្នករកស៊ីទាំងនោះបាននិយាយទាំងអំនួតថា មេព្រៃ និងសមត្ថកិច្ចគេចាប់តែឡានដឹកឈើមិនបានបង់លុយតែប៉ុណ្ណោះ បើបង់លុយអស់ហើយគឺគ្មានអ្នកណាចាប់ទេ មិនតែប៉ុណ្ណោះបើមានសមត្ថកិច្ចណារាយការអោយមេព្រៃចាប់ មេព្រៃបានទូរស័ព្ទប្រាប់ដំណឹងដល់អ្នកដឹកឈើ អោយគេច ជ្រក ទៅមុខបន្ត ឬឈប់លាក់ខ្លួនសិនទៀតផង។
លោក លីសុផា នាយរងផ្នែកសង្កាត់រដ្ឋបាលព្រៃឈើឃុំស្រែណូយបានបដិសេធនៅព្រឹកថ្ងៃទី៣ធ្នូនេះថា លោកពុំដែលធ្លាប់ស្គាល់ឈ្មោះអ្នករកស៊ីដឹកឈើខាងលើនោះទេ បើមានគេចមិនរួចពីលោក ថោងសុខៃ នាយសង្កាត់របស់លោកទេ ម្យ៉ាងវិញទៀតរដ្ឋាភិបាលប្រកាសលែងអោយមានការដឹងជញ្ជួនឈើក្រញូងហើយ។
លោក សេងវឿត នាយផ្នែករដ្ឋបាលព្រៃឈើស្រុកវារិន ខេត្តសៀមរាបបានប្រាប់តាមទូរស័ព្ទនៅព្រឹកដដែលនេះថា គ្មានទេរថយន្តដឹកឈើក្រញូង លោកមិនបានដឹងទេ ចង់ដឹងសួរនាយសង្កាត់តាមដងផ្លូវទៅ។ លោកសេងវឿតបន្ថែមថា សួរលោក ថោងសុខៃ នាយសង្កាត់ព្រោះគាត់ជំនាញខាងបង្ក្រាប ហើយគាត់សហការជាមួយគ្នាគាត់ដូចជា អ្នកកាសែតបួនដប់ឡានចាំចាប់ឈើក្រញូង បើមានរតមេចរួច។
នាព្រឹកនេះយើងក៏ពុំអាចសុំការបំភ្លឺពីលោក ម៉ុងប៊ុនលីម នាយផ្នែករដ្ឋបាលព្រៃឈើស្រុកបន្ទាយស្រី និងលោក សេងលន នាយរងសង្កាត់រដ្ឋបាលព្រៃឈើកន្ទួតខ្នាក្រៅ ស្រុកបន្ទាយស្រី ខេត្តសៀមរាបបានទេ ព្រោះទូរស័ព្ទលោកទាំងពីរសុទ្ធតែនៅក្រៅតំបន់សេវា។
ពលរដ្ឋនៅខេត្តសៀមរាបសំនូមពរទៅលោក ទាគឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប មេត្តាចុះទប់ស្កាត់ការដឹកជញ្ជូនឈើក្រញូអខុសច្បាប់របស់ក្រុមឈ្មួញខាងលើផង ព្រោះឈើទាំងនេះសុទ្ធតែជាឈាមរបស់ពលរដ្ឋខ្មែរ ដែលត្រូវបានគេប្រើអោយទៅលួចកាប់ពីដីថៃ ដែលត្រូវទាហ៊ានថៃបាញ់សំលាប់ស្ទើរជារៀងរាល់ថ្ងៃ៕
No comments:
Post a Comment
yes