ហេតុការណ៍នៅតំបន់សេដ្ឋកិច្ចពិសេស ខេត្តស្វាយរៀងនេះ
គម្រប់មួយឆ្នាំហើយ បើទោះជាថ្មីៗនេះ
មានការជំរុញឲ្យមានការកាត់ទោសពីក្រុមសិទ្ធិមនុស្សក្តី
ក៏ការកាត់ទោសជនសង្ស័យឈ្មោះ ឈូក បណ្ឌិត
នេះនៅមិនមានសញ្ញាគួរឲ្យជឿជាក់បាននៅឡើយដដែល។
លោកស្រី ម៉ៅ សំវុទ្ធារី មេធាវីការពារក្ដីលោក ឈូក
បណ្ឌិត កាលពីថ្ងៃម្សិលមិញប្រាប់ថា៖«យើងមិនទាន់ទទួលបានដីកាពី
តុលាការនៅឡើយ»។ លោកស្រីថា
បើសិនគ្មានដីកាទេគាត់ក៏មិនដឹងថា
តើកូនក្តីគាត់នឹងទៅបង្ហាញខ្លួនឬយ៉ាងណាទេ
?
?
សាលាឧទ្ធរណ៍ បានយកសំណុំរឿងក្ដីមកអង្កេតកាលពីខែធ្នូឆ្នាំមុន
បន្ទាប់ពីតុលាការខេត្តស្វាយរៀង ទម្លាក់ការចោទប្រកាន់លោក ឈូក បណ្ឌិត
ពីបទបង្ករបួសស្នាមដោយអចេតនា និងគ្មានការបកស្រាយពន្យល់
ក្រោយពីមានការរុញករណីនេះឲ្យគ្នាទៅវិញទៅមករវាងព្រះរាជអាជ្ញា
និងចៅក្រុមស៊ើបសួរសាលាដំបូងខេត្តអស់រយៈពេលជាច្រើនខែ។
មេធាវីលោក ឈូក បណ្ឌិត អះអាងពីម្សិលមិញថា
គាត់មិនទាន់បានទទួលដីកានៅឡើយ ប៉ុន្តែ
មេធាវីការពារក្ដីជនរងគ្រោះជាកម្មការិនីទាំងបីនាក់ប្រាប់ថា
ពីសប្ដាហ៍មុនពួកគេត្រូវតុលាការកោះឲ្យចូលទៅសាលាឧទ្ធរណ៍នៅថ្ងៃទី ២៧
ខែកុម្ភៈ។
កម្មការិនី ប៊ុត ចិន្ដា អាយុ២១ឆ្នាំ
ដែលរងរបួសធ្ងន់នៅពេលគ្រាប់កាំភ្លើងត្រូវប៉ះចំសួតនិយាយថា
ទោះជានាងប្រឈមនឹងសុខភាពទ្រុឌទ្រោមក្ដី
នាងនឹងធ្វើដំណើរទៅភ្នំពេញនៅសប្ដាហ៍ក្រោយ។
នាងនិយាយថា៖«មេធាវីខ្ញុំបានប្រាប់ខ្ញុំថា
សាលាឧទ្ធរណ៍នឹងបើកសវនាការជំនុំជម្រះក្ដីជាថ្មីនៅថ្ងៃនោះ។
ខ្ញុំសប្បាយចិត្តណាស់ ព្រោះខ្ញុំកំពុងរង់ចាំជាយូរមកហើយ
ខ្ញុំនឹងធ្វើតាមការបរិច្ឆេទក្នុងដីកា»។
នាង ចិន្ដា បញ្ជាក់ថា ទោះជាកន្លងមួយឆ្នាំហើយក្ដី
សោកនាដកម្មកើតឡើងចំពោះនាងនៅមិនទាន់រលុបនៅឡើយ។ នាងថា
បើគ្មានការចាប់ខ្លួន និងគ្មានការកាត់ទោសទេ នាងនៅតែភ័យខ្លាចជានិច្ច។
នាងបន្តថា៖ «ខ្ញុំនៅតែភ័យខ្លាច ពេលណានិយាយពីថ្ងៃទី២០
កុម្ភៈ ព្រោះវាធ្វើឲ្យខ្ញុំនឹកឃើញពីអ្វីដែលបានកើតឡើងចំពោះខ្ញុំ
ថ្ងៃនោះ។
អ្វីដែលតុលាការខេត្តស្វាយរៀងធ្វើគឺគ្រាន់តែចង់ការពារជនល្មើស
ហើយមិនបានការពារជនរងគ្រោះដូចពួកយើងនោះទេ»។
ហេតុការណ៍នេះ
ចំពោះអ្នកផ្សេងបានរសាយការភ័យខ្លាចបាត់អស់ហើយ។
កម្មការិនី នុត សាខន អាយុ២៤ឆ្នាំ និយាយថា៖ «ខ្ញុំលែងខ្លាចលោក បណ្ឌិត ទៀតហើយ
ឥឡូវខ្ញុំកំពុងជួលបន្ទប់នៅមុខការិយាល័យគាត់។
ខ្ញុំឃើញគាត់បើកឡានរាល់ថ្ងៃ ពេលខ្ញុំឃើញមុខគាត់
ខ្ញុំចាប់ផ្ដើមខឹងតុលាការខេត្តស្វាយរៀងភ្លាម»។
នាង សាខន បន្តថា នាងគ្មានឯកសារសម្រាប់ប្រគល់ឲ្យតុលាការដើម្បីគាំទ្រការចោទ
ប្រកាន់ជនសង្ស័យទេ តែនាងត្រៀមភ័ស្តុតាងដែលនាងមាន។ នាងថា៖
លោកស្រី ស្រី បុតចរិយា
មេធាវីការពារក្ដីមួយរូបក្នុងចំណោមពីររូបតំណាងឲ្យស្រ្តីរង
គ្រោះបីនាក់នេះបានឲ្យដឹងថា កូនក្ដីគាត់ម្នាក់ៗ
អន្ទះសាចង់ចូលរួមសវនាការណាស់នៅសប្ដាហ៍ក្រោយ។
លោកស្រីថ្លែងថា៖ «ខ្ញុំមានការបារម្ភ
ពីនាង ចិន្ដា ព្រោះនាងបានសម្រាលកូនទើបតែបាន១ខែ។ ឯនាង កែវ នា
បានឈប់ធ្វើការហើយ ព្រោះនាងឈឺចាប់ខ្លាំងពេកនឹងស្នាមរបួស។
ប៉ុន្តែទោះយ៉ាងណាក៏ដោយ ពួកគេនឹងមកតាមការកោះ»។
កាលពីថ្ងៃទី ២១ ខែធ្នូ ឆ្នាំ ២០១២
អគ្គព្រះរាជអាជ្ញាសាលាឧទ្ធរណ៍បានដាក់ពាក្យបណ្តឹងជំទាស់នឹង
ការសម្រេចរបស់សាលាដំបូងខេត្តស្វាយរៀង ដែលសម្រេចទម្លាក់ចោលការចោទប្រកាន់អតីតអភិបាលក្រុងបាវិតរូបនោះ
ដោយតម្រូវឲ្យលើកសំណុំរឿងនេះមកដាក់លើតុ ដើម្បីជជែកវែកញែករួមគ្នា
ដើម្បីស្វែងរកយុត្តិធម៌ជូនជនរងគ្រោះ៕
No comments:
Post a Comment
yes