ភ្នំពេញ: ក្រុមកម្មកររោងចក្រកាត់ដេរ យ៉ុងវ៉ា ទី១ និងយ៉ុងវ៉ា ទី២ នៅតាខ្មៅ ខេត្តកណ្តាល រហូតមកដល់ម៉ោង ២ និង ៣០ នាទី រសៀលថ្ងៃទី១២កុម្ភៈ ឆ្នាំ២០១៣ នៅតែបន្តធ្វើកូដកម្ម ឈរបិទផ្លូវជាតិលេខ២១ ពីរង្វង់មូលតាខ្មៅ ទៅកាន់ផ្ទះសម្តេច ហ៊ុន សែន នៅតាំងក្រសាំង។ កូដកម្ម បិទផ្លូវនោះ ត្រូវបានធ្វើឡើង ចាប់តាំងពីព្រឹកម៉ោង ៦ និង ៣០ នាទី ដោយមិនទាន់មានដំណោះស្រាយណាមួយពីអាជ្ញាធរ ឬក៏ភាគីថៅកែរោងចក្រកាត់ដេរ ចូលខ្លួនមកសម្របសម្រួលឡើយ។
អ្នកស្រី ចាន់ ដានី តំណាងកម្មករតវ៉ា នៅរោងចក្រកាត់ដេរ យ៉ុងវ៉ា ២ បានឲ្យដឹងថា មកដល់ម៉ោង ២ និង ៣០ នាទី កម្មករនៅតែបន្តបិទផ្លូវ ដើម្បីជំរុញឲ្យអាជ្ញាធរ ចេញមុខ សម្របសម្រួល ដោះស្រាយជាមួយនឹងថៅកែរោងចក្រកាត់ដេរ ដែលបានរត់ចោលរោងចក្រ ចាប់តាំងពីខែធ្នូ ឆ្នាំ២០១២។
ចំណែកលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា C.CAWDU ដែលបានតាមឃ្លាំមើលកម្មកររោងចក្រកាត់ដេរតវ៉ា បានឲ្យដឹងថា ក្រុមកម្មករជាង ៧០០០ នាក់ នៅរោងចក្រ យ៉ុងវ៉ា១ និងយ៉ុងវ៉ា២ បានផ្ទុះការតវ៉ា ដោយឈរបិទផ្លូវ ដើម្បីទទូចឲ្យថៅកែរោងចក្រកាត់ដេរ បើកប្រាក់ខែ នៅខែមករា ព្រោះមកដល់ថ្ងៃទី១២កុម្ភៈនេះ កម្មករមិនទទួលបានប្រាក់ខែ ស្របពេលនឹងឮដំណឹងថា រោងចក្រយ៉ុងវ៉ា បិទទ្វារ លែងដំណើរការ។ ម្យ៉ាងទៀត ក្នុងខែមករាកន្លងមក កម្មករមិនមានការងារអ្វីធ្វើទេ។ ដូច្នេះកម្មករ ទទូចសុំឲ្យរដ្ឋាភិបាល មេត្តាគិតគូដល់កម្មករ ដោយដកប្រាក់តម្កល់ ដែលថៅកែរោងចក្រយ៉ុងវ៉ា បានដាក់មុនពេលបើកអាជីវកម្មនោះ មកបើកប្រាក់ខែឲ្យកម្មករ។
លោក អាត់ ធន់ ក៏បានបន្ថែមថា ក្រុមកម្មករ ក៏បានដាក់ពាក្យបណ្តឹង ទៅកាន់តុលាការខេត្តកណ្តាល ឲ្យចេញដីការក្សាការពារ ដើម្បីកុំឲ្យក្រុមហ៊ុន ដឹកសំភារៈរោងចក្រចេញ មុនពេលដោះស្រាយប្រាក់ខែ និងប្រាក់អតីតភាពការងាររបស់កម្មករ។
ជាការកត់សម្គាល់ ក្នុងដើមឆ្នាំ២០១៣នេះ កូដកម្មរបស់កម្មករកាត់ដេរ ហាក់ដូចជាផ្ទុះឡើងច្រើនកន្លែង នៅទូទាំង។ កម្មករ ទាមទារលក្ខខណ្ឌការងារ និងជាពិសេសទាមទារតម្លើងប្រាក់ខែ ដែលសព្វថ្ងៃទទួលបានត្រឹមតែ ប្រាក់ខែគោល ៦១ ដុល្លារ។
កិច្ចប្រជុំចរចារឿងតម្លើងប្រាក់ខែកម្មករ នឹងធ្វើឡើងជាថ្មីទៀត នៅថ្ងៃទី២៦កុម្ភៈ ឆ្នាំ២០១៣ រវាងសមាគមថៅកែរោងចក្រ សហជីពកម្មករ និងតំណាងរាជរដ្ឋាភិបាល ដែលមានក្រសួងសង្គមកិច្ច និងក្រសួងការងារ៕
No comments:
Post a Comment
yes