៣-កុម្ភៈ-១០: ប្រជាពលរដ្ឋនៅស្រុកស្រែអំបិល ខេត្តកោះកុង ដែលបាត់បង់ដីធ្លីដោយសារក្រុមហ៊ុនពីរប្ដឹងផ្ដល់គ្នា តវ៉ានៅមុខតុលាការកំពូលក្នុងរាជធានីភ្នំពេញ ដើម្បីឲ្យតុលាការនេះសើរើជម្រះក្ដីសាជាថ្មី។
ប្រជាពលរដ្ឋឃុំជីខក្រោម ស្រុកស្រែអំបិល ខេត្តកោះកុង ៩នាក់ គំរាមសម្លាប់ខ្លួននៅមុខតុលាការកំពូល បើសិនជាពួកគាត់ត្រូវបានចាញ់ក្តីក្រុមហ៊ុន ហេង ហ៊ុយ។
ពលរដ្ឋអះអាងថា ការគំរាមធ្វើអត្តឃាតនេះ ធ្វើឡើងនៅក្នុងសេចក្ដីប្រកាសជាលាយលក្ខណ៍អក្សរមួយដែលចុះផ្ដិតមេដៃផ្ញើជូនអភិបាលខេត្តកោះកុង កាលពីថ្ងៃទី២៧ កុម្ភៈ ឆ្នាំ២០១៣ ដោយសារតែតុលាការថ្នាក់ក្រោមសុទ្ធតែកាត់ក្ដីឲ្យពលរដ្ឋចាញ់ដោយអយុត្តិធម៌រួចមក។
តំណាងប្រជាពលរដ្ឋក្នុងឃុំជីខក្រោម ស្រុកស្រែអំបិល ខេត្តកោះកុង ព្រមានថា នឹងធ្វើអត្តឃាតដើម្បីបញ្ជាក់ពីភាពស្អាតស្អំ និងភាពអស់សង្ឃឹម បើសិនជាតុលាការកំពូល កាត់ក្តីឲ្យពួកគាត់ចាញ់ក្រុមហ៊ុន ហេង ហ៊ុយ អភិវឌ្ឍន៍ ក្នុងសំណុំរឿងទំនាស់ដីធ្លី។
តំណាងអ្នកភូមិ អ្នកស្រី ផាវ ញ៉ឺង នៅថ្ងៃទី២ មីនា មានប្រសាសន៍ថា អ្នកភូមិកើតទុក្ខមិនសុខចិត្តជាខ្លាំង បន្ទាប់ពីចាញ់ក្ដីក្រុមហ៊ុន ហេង ហ៊ុយ ផ្ទួនៗគ្នា រាប់ទាំងសាលាដំបូងរហូតដល់សាលាឧទ្ធរណ៍។
អ្នកស្រីបន្តថា ប្រជាពលរដ្ឋ និងក្រុមហ៊ុន ធ្លាប់បានសន្យានឹងគ្នាកាលពីឆ្នាំ២០០៩ ថា នឹងបញ្ចប់ទំនាស់ដោយប្រជាពលរដ្ឋសុខចិត្តកាត់ដីចម្ការដែលធ្លាប់កាន់កាប់ឲ្យក្រុមហ៊ុន ជាថ្នូរនឹងការរត់ការផ្ដល់ប្លង់ដីប្រគល់ជូនប្រជាពលរដ្ឋ ប៉ុន្តែមកទល់ពេលនេះ ក្រុមហ៊ុន និងអាជ្ញាធររារាំងមិនឲ្យយុវជនស្ម័គ្រចិត្តវាស់ដីឲ្យប្រជាពលរដ្ឋឡើយ។
អ្នកស្រី ផាវ ញ៉ឺង បញ្ជាក់ថា ប្រជាពលរដ្ឋចំនួន ៩គ្រួសារ ត្រូវបានតុលាការកាត់ក្តីឲ្យចាញ់ជាបន្តបន្ទាប់ ហើយនៅពេលដ៏ខ្លីខាងមុខ ពួកគាត់នឹងត្រូវឡើងទៅកាន់តុលាការកំពូលជាបន្តទៀត ហើយបើចាញ់ក្ដីទៀត គឺមានតែស្លាប់ប៉ុណ្ណោះ៖ «យើងផ្ដិតមេដៃ យើងប្រកាសអាសន្នថា យើងនឹងធ្វើអត្តឃាតនៅមុខតុលាការមិនផ្ដល់យុត្តិធម៌ពិតប្រាកដដល់ពួកយើង បើសិនអ្នកច្បាប់មិនទទួលស្គាល់ច្បាប់ មិនអនុវត្តច្បាប់ យើងរស់នៅក៏គ្មានន័យដែរ។ យើងសង្ឃឹមទទួលបានដីប៉ុណ្ណឹង បើអ្នកមានទទួលបានដីរាប់ម៉ឺនហិកតារ ឯអ្នកក្រមិនទទួលបានដីមួយម៉ែត្រទៅវិញ»។
ទន្ទឹមនឹងនេះ លោកស្រី កើត ពៅ ជាពលរដ្ឋដែលនឹងត្រូវឡើងបំភ្លឺនៅមុខតុលាការនាពេលខាងមុខ អះអាងថា លោកស្រីប្ដេជ្ញាចិត្តថា នឹងត្រូវបញ្ចប់ជីវិតចោលកូនទាំង ៣នាក់ បើសិនជាតុលាការកំពូលនៅតែមិនផ្ដល់យុត្តិធម៌ឲ្យអ្នកភូមិក្រីក្រ។ លោកស្រីបន្តថា ដោយសារតែមានទំនាស់ដីធ្លីរ៉ាំរ៉ៃ គ្រួសារអ្នកភូមិជាច្រើនបានធ្លាក់ខ្លួនជំពាក់បំណុលគេទៀតផង។
លោកស្រី កើត ពៅ បញ្ជាក់ថា អ្នកភូមិធ្លាប់ដាក់ពាក្យបណ្ដឹងប្ដឹងក្រុមហ៊ុនទៅកាន់តុលាការសាលាដំបូង និងសាលាឧទ្ធរណ៍ដែរ តែមិនឃើញចំណាត់ការរបស់តុលាការសោះ៖ «បើកន្លែងហ្នឹងតុលាការគេកាត់ឲ្យថៅកែបួនរូបហ្នឹង ខ្ញុំមានដីឯណានៅ? ខ្ញុំអត់មានសមត្ថភាពទៅនៅកន្លែងណាទៀតទេ ដីហ្នឹងបាត់បង់ទាំងអស់ ខ្ញុំនឹងបញ្ចប់ជីវិតនៅមុខតុលាការកំពូលភ្លាម»។
យ៉ាងណាក៏ដោយ តុលាការកំពូលមិនទាន់កំណត់កាលបរិច្ឆេទបើកសវនាការសំណុំរឿងទំនាស់ដីធ្លីនៅឃុំជីខក្រោម ស្រុកស្រែអំបិល ខេត្តកោះកុង នេះទេ។ ចំណែកឯប្រធានក្រុមហ៊ុន ហេង ហ៊ុយ ក៏ធ្លាប់ប្រាប់វិទ្យុអាស៊ីសេរីថា ដីទំនាស់នោះជាដីរបស់ក្រុមហ៊ុនគាត់ ហើយលោកបានសម្រួលនឹងប្រជាពលរដ្ឋរួចហើយ។ តែទោះជាយ៉ាងនេះក្តី ប្រជាពលរដ្ឋកាលពីខែកុម្ភៈ ក៏បានធ្វើពាក្យបណ្ដឹងទៅតុលាការខេត្តកោះកុង ដើម្បីស្នើសុំមោឃភាពកិច្ចសន្យារវាងប្រជាពលរដ្ឋ និងក្រុមហ៊ុន ហេង ហ៊ុយ ហើយដែរ។
ទាក់ទងនឹងបញ្ហានេះ មន្ត្រីសម្របសម្រួលគម្រោងដីធ្លីរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ការអះអាងចង់សម្លាប់ខ្លួននេះ មិនមែនជារឿងរ៉ាវត្រូវមើលរំលងនោះទេ។
លោកបន្តថា ប្រជាពលរដ្ឋអ្នករងគ្រោះតែងចាញ់ក្ដីអ្នកមានលុយមានអំណាចក្នុងសំណុំរឿងទំនាស់ដីធ្លី ទើបគាត់សម្រេចចិត្តបែបនេះ៖ «យើងអភិវឌ្ឍន៍ទៅលើដីកសិកម្ម តែបែរជាដកដីកសិកម្មប្រជាពលរដ្ឋឲ្យទៅអ្នកដទៃវិញ ហ្នឹងជាចំណុចចុងក្រោយ អ៊ីចឹងមានតែគាត់សុខចិត្តស្លាប់។ បើគាត់មិនស្លាប់ទេ ត្រូវពឹងអ្នកណាទៀត? រាជរដ្ឋាភិបាលត្រូវតែគិតពីបញ្ហានេះ»។
អ្នកភូមិជីខក្រោម ដែលមានបំណងចង់សម្លាប់ខ្លួនមាន ៩នាក់ មានឈ្មោះ៖ ឈុន រីម ប៊ូឌី កើត ពៅ ឈឹម ឆាវ ឈឹម ផាន់ ផាវ ញ៉ឺង សួង រីន ឈុន រ៉ាន់ និង កុក ណន។ ទំនាស់ដីធ្លីនេះកើតឡើងបន្ទាប់ពីរាជរដ្ឋាភិបាលផ្តល់ដីសម្បទានចំនួន ៧៩៩.៧៩ហិកតារឲ្យក្រុមហ៊ុន ហេង ហ៊ុយ កាលពីឆ្នាំ២០០៨។ ដីនេះស្ថិតនៅភូមិឈូក ឃុំជីខលើ ស្រុកស្រែអំបិល ខេត្តកោះកុង នេះបើតាមសាលដីការបស់តុលាការកំពូល តែក្រុមហ៊ុនបែរជាទៅទាមទារដីរបស់អ្នកភូមិនៅឃុំជីខក្រោម ទៅវិញ៕
No comments:
Post a Comment
yes