សមាជិកក្រុមប្រឹក្សា ក្នុងខេត្តកណ្តាល នៅក្នុងការបោះឆ្នោតព្រឹទ្ធសភា កាលពីឆ្នាំមុន
ភ្នំពេញៈ សមាជិកក្រុមប្រឹក្សាស្រុក-ខណ្ឌ កំពុងរង់ចាំប្រាក់បៀវត្សរ៍របស់ពួកគេ ដែលមិនបានបើកពីរខែមកហើយ គិតមកដល់ត្រឹមថ្ងៃចន្ទម្សិលម្ងៃ ដែលការយឺតយ៉ាវយ៉ាងខ្លាំងនេះ ពុំត្រូវបានគេប្រាប់ឲ្យដឹងពីមូលហេតុឡើយ។
លោក ជុន សុជាតិ ប្រធានក្រុមប្រឹក្សា និងលោក សម វិបុល សមាជិកក្រុមប្រឹក្សា ស្រុកតាខ្មៅ ខេត្តកណ្តាល មកពីគណបក្សប្រជាជនកម្ពុជា និងគណបក្ស សម រង្ស៊ី បានប្រាប់ភ្នំពេញ ប៉ុស្តិ៍ ថា ពួកគេបានរង់ចាំប្រាក់បៀវត្សរ៍ ចាប់តាំងពីខែមករា រហូតដល់ខែមីនា តែប្រាក់ខែមិនទាន់មកដល់នៅឡើយទេ។ លោក សម វិបុល បញ្ជាក់ថា៖ «មួយបន្ទោសមួយ។ ខ្ញុំឆ្ងល់ថា តើមូលហេតុអ្វី?មន្រ្តីរាជការកំពុងរង់ចាំប្រាក់បៀវត្សរ៍»។
លោក សយ សុភាព សមាជិកក្រុមប្រឹក្សាស្រុកលើកដែក ក្នុងខេត្តកណ្តាល បានអះអាងថា សមាជិកក្រុមប្រឹក្សាទាំងអស់ ក្នុងស្រុកនេះ ក៏មិនទាន់ទទួលបានប្រាក់បៀវត្សរ៍ដែរ។ លោក សយ សុភាព បានបញ្ជាក់ថា៖ «ក្រុមប្រឹក្សាទាំងអស់ កំពុងរង់ចាំប្រាក់បៀវត្សរ៍។ និយាយឲ្យខ្លី មន្រ្តីរាជការពឹងផ្អែកលើប្រាក់បៀវត្សរ៍»។
ប៉ុន្តែ លោក ឡាំ សឿន និងលោក ឆាយ ងួន សមាជិកក្រុមប្រឹក្សាខណ្ឌចំការមន និងខណ្ឌមានជ័យ បានថ្លែងថា សមាជិកក្រុមប្រឹក្សាខណ្ឌរបស់ពួកគេ បានទទួលប្រាក់បៀវត្សរ៍ខែមករា តែប្រាក់បៀវត្សរ៍ខែកុម្ភៈ ពុំទាន់បានទទួលទេ។
លោក ឡាំ សឿន បានថ្លែងថា៖ «ខ្ញុំខកចិត្ត ចំពោះការបើកប្រាក់បៀវត្សរ៍យឺតយ៉ាវ។ ខ្ញុំមិនចង់មានប្រតិកម្មទេតែវាកាន់តែធ្ងន់ធ្ងរ។ សមាជិកក្រុមប្រឹក្សាគណបក្សប្រជាជនកម្ពុជា ក៏ខកចិត្ត ចំពោះការបើកប្រាក់បៀវត្សរ៍យឺតនេះផងដែរ តែគេមិនហ៊ាននិយាយ»។
តាមរយៈការសម្ភាស សមាជិកក្រុមប្រឹក្សាមួយចំនួន បានឲ្យដឹងថា ការយឺតយ៉ាវ ក្នុងការទទួលប្រាក់បៀវត្សរ៍ នេះពុំមានអ្នកណាម្នាក់ប្រាប់ឲ្យដឹង អំពីមូលហេតុនៃការយឺតយ៉ាវនេះទេ ប៉ុន្តែមន្រ្តីធ្វើការនៅរតនាគារខេត្តកណ្តាលដែលបដិសេធមិនបញ្ចេញឈ្មោះ បានប្រាប់ ភ្នំពេញ ប៉ុស្តិ៍ ថា ការយឺតយ៉ាវនេះ គឺដោយសារតែរនាគារជាតិកំពុងបង្កើតគណនី សម្រាប់ក្រុមប្រឹក្សាស្រុក-ខណ្ឌទាំងអស់ដើម្បីចៀសវាងប្រើប្រាស់ កញ្ចប់ថវិកាជាមួយនឹងសមាជិកក្រុមប្រឹក្សាខេត្ត។ មន្ត្រីរូបនេះ បានបញ្ជាក់ថា៖ «ពីមុន ក្រុមប្រឹក្សាស្រុក ប្រើប្រាស់កញ្ចប់ថវិកា ជាមួយនឹងក្រុមប្រឹក្សាខេត្ត។ វាយឺតយ៉ាវទូទាំងប្រទេស សម្រាប់ក្រុមប្រឹក្សាស្រុក»។
ដោយឡែកសម្រាប់សមាជិកក្រុមប្រឹក្សាស្រុកស្ទោង ក្នុងខេត្តកំពង់ធំវិញ ក៏មិនទទួលបានប្រាក់បៀវត្សរ៍ផងដែរ។
លោក ចាន់ ថន សមាជិកក្រុមប្រឹក្សាស្រុកស្ទោង បានប្រាប់ ភ្នំពេញ ប៉ុស្តិ៍ កាលពីម្សិលមិញថា សមាជិកក្រុមប្រឹក្សាកំពុងឆ្ងល់ អំពីការយឺតយ៉ាវក្នុងការបើកប្រាក់បៀវត្សរ៍នេះ ប៉ុន្តែពួកគេមិនដឹងថាតើត្រូវសួរអ្នកណាឡើយ។
មន្ត្រីម្នាក់ ឈ្មោះ យ៉ា អនុប្រធាននាយកដ្ឋានគណនេយ្យនៃរតនាគារជាតិ បានធ្វើការបដិសេធមិនផ្តល់ការអត្ថាធិប្បាយឡើយ នៅពេលភ្នំពេញ ប៉ុស្តិ៍ ព្យាយាមសាកសួរពីបញ្ហានេះ ដោយលោកស្រី និយាយថា៖«ខ្ញុំមិនហ៊ានប្រាប់ចម្លើយទេ។ កុំសួរមូលហេតុ»។
លោក កែ ប៊ុនឡេង ប្រធានមន្ទីររតនាគារភ្នំពេញ ពុំបានថ្លែងលម្អិតឡើយ គ្រាន់តែថា ការយឺតយ៉ាវ មិនមែនដោយសារមន្ទីររតនាគារទេ ហើយលោកបានបដិសេធ មិនធ្វើអត្ថាធិប្បាយលើមូលហេតុនៃការយឺតយ៉ាវនេះទេ៕
No comments:
Post a Comment
yes