លោក រ៉ុង ឈុន ដឹកនាំកម្មករទាមទារលក្ខខណ្ឌការងារកន្លងមក
ភ្នំពេញៈ កិច្ចប្រជុំរវាងមន្ត្រីសហជីពនិងមន្រ្តីសមាគមកាត់ដេរជាតំណាងឲ្យនិយោជក នៅមិនទាន់មានការព្រមព្រៀងគ្នាណាមួយទេ លើការចរចាពីរឿងដំឡើងប្រាក់ឈ្នួលអប្បបរមាដល់កម្មករកាលពីថ្ងៃអង្គារម្សិលមិញ នៅឯក្រសួងសង្គមកិច្ច ខណៈភាគីនីមួយៗនៅតែប្រកាន់ជំហរតែដដែល ហើយសហជីពខ្លះគំរាមធ្វើកូដកម្មទ្រង់ទ្រាយធំដើម្បីដាក់សម្ពាធសម្រាប់ការទាមទាររបស់ខ្លួន។
លោក រ៉ុង ឈុន ប្រធានសហព័ន្ធសហជីពកម្ពុជាបានឲ្យដឹងពេលចេញពីកិច្ចប្រជុំពីថ្ងៃម្សិលមិញថា ការដំឡើងប្រាក់ឈ្នួលកម្មករអប្បបរមាបានជួបការបរាជ័យ ព្រោះក្រុមនិយោជកបានរក្សាកម្រិតដំឡើងត្រឹមតែ៧០ដុល្លារ ដោយបន្ថែមឲ្យតែ៩ដុល្លារ លើប្រាក់ឈ្នួលគោលចាស់៦១ដុល្លារ ដដែល។
លោកលើកឡើងថា៖«លទ្ធផលនៃកិច្ចប្រជុំនៅថ្ងៃនេះ គឺដូចគ្នានឹងកិច្ចប្រជុំពីលើកមុនៗដែរ ក្រុមនិយោជកនៅតែរក្សាតម្លៃប្រាក់ឈ្នួលដដែលចំពោះការបន្ថែមប្រាក់ខែកម្មករ»។
លោក រ៉ុង ឈុន បានបញ្ជាក់ថា តំណាងសហជីព១០រូប បានបោះឆ្នោតជាសម្ងាត់ ដើម្បីចង់ដឹងថា តើពួកគេចង់បានប្រាក់ខែប៉ុន្មានសម្រាប់កម្មករ ពេលនោះមានសហជីពមួយចង់បានប្រាក់ឈ្នួលប្រចាំខែ១២០ដុល្លារ សហជីពបីទៀតចង់បាន១០០ដុល្លារ និងតំណាង៦នាក់ទៀត ចង់បាន៧៣ដុល្លារបូកនឹងប្រាក់ទ្រទ្រង់សុខភាព៥ដុល្លារ តែថៅកែមិនបានឯកភាពទៅតាមការស្នើរបស់ពួកគេទេ។
លោក រ៉ុង ឈុន បានបន្ថែមថា៖«ខ្ញុំនៅតែរក្សាការទាមទារដូចកាលពីមុនគឺ១០០ ដុល្លារ ហើយខ្ញុំនឹងដឹកនាំធ្វើការតវ៉ាទាមទារដ៏ធំមួយ បើសិនកម្មករមិនអាចបានប្រាក់ខែអប្បបរមា១០០ដុល្លារទេនោះ។ យើងនឹងមិនចូលប្រជុំទៀតទេ ព្រោះលទ្ធផលនឹងនៅតែដដែលទោះជាប្រជុំលើកក្រោយទៀតក្តី។ យើងនឹងបញ្ជូនលទ្ធផលនេះទៅជូនគណៈកម្មការទី៨ ឬក៏ស្នើឲ្យរដ្ឋាភិបាលធ្វើការសម្រេចជួសកម្មករ»។
លោក វង្ស សុវណ្ណ អគ្គលេខាធិការរងគណៈកម្មការដោះស្រាយកូដកម្ម និងបាតុកម្មគ្រប់មុខសញ្ញានៃក្រសួងសង្គមកិច្ច បានមានប្រសាសន៍កាលពីម្សិលមិញថា គណៈកម្មការលោកកំពុងរៀបចំបញ្ជូនរបាយការណ៍ពីកិច្ចប្រជុំទាំង អស់ជូនលោករដ្ឋមន្ត្រីក្រសួងសង្គមកិច្ចដើម្បីធ្វើការប្រជុំធំមួយទៀត។
លោក វង្ស សុវណ្ណ បានថ្លែងដែរថា៖«យើងនឹងបញ្ជូនរបាយការណ៍នៃកិច្ចប្រជុំនេះទៅលោក រដ្ឋមន្ត្រី អ៊ិត សំហេង ដើម្បីធ្វើការប្រជុំសម្រេចលើករណីនេះ ព្រោះអី យើងបានជួបប្រជុំគ្នាអស់ជាច្រើនដងមកហើយ ប៉ុន្តែនៅមិនទាន់បានសម្រេចជាលទ្ធផលអ្វីសោះមកដល់ពេលនេះ»៕
No comments:
Post a Comment
yes