ខេត្ដរតនគិរី ៖
ក្រុមហ៊ុនដីសម្បទានសេដ្ឋកិច្ចមួយដែលស្ដុកឈើអារច្រើនសម្បើមយក្ស
ធុនប្រណីតខុសច្បាប់ ត្រូវបានខាងក្រុមហ៊ុនឆ្លើយទម្លាក់កំហុសថា
ប្រជាពលរដ្ឋក្រីក្រក្នុងភូមិជាអ្នកប្រមូលយកមកលាក់ទុកក្នុង
ដីក្រុមហ៊ុន ដើម្បីគេចពីសមត្ថកិច្ច ។
ចំណែកឈើហ៊ុបរាប់រយដើមបានអះអាងថាបង់ពន្ធជូនរដ្ឋអស់ហើយ។
ប៉ុន្ដែទោះបីជាយ៉ាងណា
មន្ដ្រីរដ្ឋបាលព្រៃឈើមិនបានបំភ្លឺពីបញ្ហានេះទេ
សុខចិត្ដសម្ងំស្ងៀមហាក់ដូចខ្លាចអំណាចក្រុមហ៊ុន ។
ក្រុមហ៊ុន ដីសម្បទានសេដ្ឋកិច្ចមួយកន្លែងនេះឈ្មោះក្រុមហ៊ុនហ៊នអានអភិវឌ្ឍន៍
ដាំដើមកៅស៊ូស្ថិតក្នុងភូមិសាស្រ្ដឃុំតាឡាវ
ស្រុកអណ្ដូងមាសជាកន្លែងលាក់ទុកឈើអារប្រណីតខុសច្បាប់រាប់រយ កំណាត់
។
ការឈានដល់ចំណុចធ្លាយរឿងអាស្រូវនេះ កាលពីវេលាម៉ោង៨និង៣០នាទីព្រឹកថ្ងៃទី១៨
មេសា ក្រុមមន្ដ្រីរដ្ឋបាលព្រៃឈើខណ្ឌសហការជាមួយកម្លាំងផ្នែករដ្ឋបាល
ព្រៃឈើស្រុកអូរយ៉ាដាវ
បានចាប់ឈើប្រណីតខុសច្បាប់ក្នុងទីតាំងក្រុមហ៊ុនខាងលើបានរាប់
រយកំណាត់ និងធ្លាយដំណឹងដល់អ្នកកាសែតចេញដំណើរទៅយកព័ត៌មានព្រោងព្រាតនៅ
ថ្ងៃទី១៨ មេសា ដោយបានថតរូបភាពពីគំនរឈើរាប់រយដុំ
និងឈើហ៊ុបមូលរាប់រយដើមនៅក្នុងទីតាំងក្រុមហ៊ុនខាងលើ ។
បើតាមរបាយការណ៍របស់មន្ដ្រីរដ្ឋបាលព្រៃឈើខេត្ដបានឱ្យអ្នកយក
ព័ត៌មានដឹងថា ឈើប្រណីតទាំងនោះស្ថិតនៅរាយប៉ាយក្នុងព្រៃជុំវិញចំណុចនិយាមការ
(៧៤៦៣៥០-១៥៨៥៩១៣)ក្នុងភូមិសាស្រ្ដឃុំតាឡាវ ស្រុកអណ្ដូងមាស ។
ក្នុងនោះឈើអារប្រភេទប្រណីត មាន ៖ ឈើធ្នង់ចំនួន៤២៦ដុំ ស្មើនឹង៦១,២៣៧ម៉ែត្រគូប ឈើបេងចំនួន១០១ដុំស្មើនឹង២២,២៤២ម៉ែត្រគូប
និងឈើនាងនួនចំនួន៨កំណាត់ស្មើនឹង១,១២៤ម៉ែត្រគូប
។ ពេលនេះឈើប្រណីតទាំងអស់នោះផ្ញើទុកនៅក្នុងបរិវេណក្រុមហ៊ុនខាង
លើដោយរក្សាទុកជាបណ្ដោះអាសន្ន ។
ទាក់ទិននឹងរឿងឈើអារ ប្រណីតខាងលើ លោក សាំង
ចន្ថា តំណាងក្រុមហ៊ុនបំភ្លឺប្រាប់អ្នកយកព័ត៌មានថា
ឈើប្រណីតដែលមេព្រៃចាប់នោះ មិនមែនជារបស់ក្រុមហ៊ុនទេ
គឺឈើរបស់ប្រជាពលរដ្ឋដែលរស់នៅក្បែរក្រុមហ៊ុនលួចដឹកតាមម៉ូតូយក
មកលាក់ទុកក្នុងដីក្បែរក្រុមហ៊ុន ។ ដោយឡែកឈើហ៊ុបមូលមិនទាន់អារ
តំណាងរូបនេះអះអាងថា ខាងក្រុមហ៊ុនបានបង់ពន្ធជូនរដ្ឋអស់ហើយ ។
តាមការរៀបរាប់របស់តំណាងក្រុមហ៊ុនមួយនេះ គឺសង្ស័យភូតកុហកទាំងស្រុង
។
មន្ដ្រីរាជការតូចតាចនៅ ក្នុងស្រុកអណ្ដូងមាស
ច្រើននាក់បាននិយាយប្រាប់អ្នកយកព័ត៌មានដូចៗគ្នាថា នៅក្នុងដីបរិវេណក្រុមហ៊ុននេះគេដាក់បារាស២ទៅ៣កន្លែង
ហាមឃាត់មិនឱ្យប្រជាពលរដ្ឋរស់នៅក្បែរក្រុមហ៊ុនចូលទៅលេងក្នុង
បរិវេណដីក្រុមហ៊ុនឡើយ គឺគេហាមចូលដាច់ខាត ។
ពីព្រោះក្រុមហ៊ុនខ្លាចបែករឿងផ្ទុកឈើប្រណីតខុសច្បាប់តម្លៃរាប់ លានដុល្លារ
ដែលអាចនាំទៅលក់នៅទីផ្សារងងឺតនៅប្រទេសវៀតណាម
តាមច្រករបៀងផ្សេងៗនៅក្នុងស្រុកអណ្ដូងមាសដូចជាច្រករបៀងបាសៅ
ស្ថិតក្នុងឃុំញ៉ាង ស្រុកអណ្ដូងមាស
ដែលច្រកមួយនេះសំខាន់ណាស់សម្រាប់ក្រុមឈ្មួញទុច្ចរិតជនជាតិខ្មែរ នាំឈើប្រណីតខុសច្បាប់ទៅលក់ឱ្យថៅកែជនជាតិវៀតណាមយ៉ាងគគ្រឹក
គគ្រេង ។ ដល់ពេលសមត្ថកិច្ចទៅពិនិត្យឃើញ
បែរជាទម្លាក់កំហុសនេះមកលើអ្នកភូមិជិតខាងទៅវិញ មិនខុសពី «ស្វាយកបាយលាបមាត់ពពែ» ឡើយ ។
ទាក់ទិននឹងក្រុមហ៊ុនដី សម្បទានដែលស្ដុកឈើដ៏សន្ធឹកសន្ធាប់នេះមានផ្ទៃដី៩ពាន់ហិកតាដែល
លាតសន្ធឹងក្នុងឃុំតាឡាវ និងឃុំញ៉ាង ស្រុកអណ្ដូងមាស
និងដំណើរការចុងឆ្នាំ២០១១ ។
បើគិតមកដល់ពេលនេះគឺដំណើរការបានជាង១ឆ្នាំហើយ
តែការដាំកូនកៅស៊ូដោយក្រុមកម្មករវៀតណាមនោះគឺបានតែមួយចំណែក
តូចប៉ុណ្ណោះ ។
រីឯកូនកៅស៊ូដែលដាំមានដើមតូចៗប្រមាណ២០០ហិកតាយ៉ាងច្រើន
ដែលចំនួននេះមិនច្បាស់លាស់ទេ ទំនងដូចជាគិតរឿងជួញឈើច្រើនជាង ។
ប្រជាពលរដ្ឋរស់នៅក្បែរក្រុមហ៊ុនក៏មានប្រតិកម្មជុំវិញ
ប្រការដែលថា
ចោទថាឈើប្រណីតរាប់រយកំណាត់នេះជារបស់អ្នកភូមិយកទៅលាក់ក្នុង
ដីក្រុមហ៊ុនគឺជារឿងមិនពិត ។ អ្នកស្រុកនិយាយថា
គ្រាន់តែក្រុមហ៊ុនដាក់បារាសនោះមាន៣ដំណាក់ឯណោះ
មានកម្លាំងប្រដាប់អាវុធការពារទៀតផង តើមានច្រកឯណាដែលអ្នកភូមិចូលទៅក្នុងបរិវេណដីក្រុមហ៊ុននោះបាន
ទៅ ៕
No comments:
Post a Comment
yes