ជនជាតិភាគតិចព្នង
ជនជាតិភាគតិចព្នងរស់នៅខេត្តមណ្ឌលគីរី ដែលអភិរក្សវប្បធម៌ប្រពៃណី កំពុងព្រួយបារម្ភពីការបាត់បង់ផ្ទះបុរាណពីដូចតា ថាអាចនឹងប៉ះពាល់ដល់វប្បធម៌ប្រពៃណីរបស់ពួកគាត់។
ស្ត្រី ចែន ត្រេវ ជនជាតិដើមព្នងរស់នៅសង្កាត់រមនា ក្រុងសែនមនោរម្យ ថ្លែងនៅក្នុងផ្ទះអណ្តើក ដែលមានលក្ខណៈប្រពៃណីថា បច្ចុប្បន្នជនជាតិដើមព្នងមានការផ្លាស់ប្តូរពីទម្លាប់រស់នៅក្នុងផ្ទះបែបបុរាណ មករស់ក្នុងផ្ទះបែបសម័យទំនើបដូចប្រជាពលរដ្ឋខ្មែរទូទៅដែរ។ អ្នកស្រីបារម្ភថា ការការប្តូរទម្លាប់នេះ ជាផ្នែកមួយធ្វើឲ្យអត្តសញ្ញាណ របស់ជនជាតិព្នង កាន់តែបាត់បង់បន្តិចម្តងៗ។
លោក ស្រោច ព្លែវ ជាជនជាតិដើមព្នងមួយរូបដែរ បានរៀបរាប់ថា កាលពីឆ្នាំមុននេះ គាត់សម្រេចចិត្តបោះបង់ផ្ទះបុរាណ(ផ្ទះអណ្តើក) មកសាងសង់ជាផ្ទះឈើដូចប្រជាពលរដ្ឋខ្មែរទូទៅវិញ។ លោក ព្លែវ បញ្ជាក់មូលហេតុដែលនាំឲ្យគាត់សាងសង់ផ្ទះឈើនេះ ព្រោះផ្ទះបែបបុរាណរបស់ពួកគាត់ ត្រូវចំណាយពេលញឹកញាប់ក្នុងការសាងសង់ ឬជួសជុស ពិសេសនោះគឺប្តូរដំបូលស្បូវ មួយ ឬពីរដងក្នុងមួយឆ្នាំ។
ចៅសង្កាត់រមនា លោក រ៉យ ត្រើន ជាជនជាតិដើមភាគតិចព្នង ក៏បង្ហាញការព្រួយបារម្ភពីការបាត់បង់ផ្ទះបុរាណដែរ។ កាលពីខែមីនាកន្លងទៅ លោកបានរៀបចំកិច្ចប្រជុំជាមួយប្រជាពលរដ្ឋនៅក្នុងសហគមន៍ ហើយបានលើកទឹកចិត្ត ឲ្យមានការសាងសង់ ជាផ្ទះអណ្តើកបែបទំនៀមទម្លាប់ប្រពៃណី ឲ្យបានមួយយ៉ាងតិចក្នុងចំណោមបីទៅបួនគ្រួសារ។
ផ្ទះជនជាតិដើម នៅក្នុងខេត្តមណ្ឌលគិរីមានដូចជា អណ្តើក ផ្ទះក្រឹង ហើយគេមានបែងចែកជាផ្ទះកូនកំលោះ ផ្ទះកូនក្រមុំទៀតផង។ តែបច្ចុប្បន្នផ្ទះបុរាណទាំងនោះ បានបាត់បង់ពីភូមិរបស់អ្នកស្រុកពីមួយឆ្នាំទៅមួយឆ្នាំ ទើបនាំឲ្យចាស់ទុំជនជាតិដើម ដែលអភិរក្សប្រពៃសំដែងការព្រួយបារម្ភ៕
No comments:
Post a Comment
yes