ពេលកំណត់ទទួលប្រវត្តិរូបរបស់អ្នកកាសែតសម្រាប់បង្ហោះតាមគេហទំព័ររបស់មជ្ឈមណ្ឌលសិទ្ធិមនុស្សកម្ពុជា សម្រាប់ទិវាសេរីភាពសារព័ត៌មានពិភពលោក គឺនៅថ្ងៃទី២៥ ខែមេសា នេះហើយ។ ដើម្បីអបអរទិវានេះ មជ្ឈមណ្ឌលសិទ្ធិមនុស្សកម្ពុជា (CCHR) ធ្វើយុទ្ធនាការមួយ គ្រោងនឹងបង្ហោះឈ្មោះ និងប្រវត្តិរូបអ្នកកាសែត ២០នាក់លើគេហទំព័រ និងបណ្ដាញសង្គមហ្វេសប៊ុក (Facebook) ដែលអ្នកកាសែតទាំងនោះ បានសរសេរផ្សព្វផ្សាយច្រើនអំពីការរំលោភសិទ្ធិមនុស្ស សេរីភាពសារព័ត៌មាន និងអភិបាលកិច្ចល្អ ជាដើម ដើម្បីបង្កើនទំនាក់ទំនងរវាងអ្នកកាសែតជាមួយសង្គម។
ក្នុងយុទ្ធនាការនេះ មជ្ឈមណ្ឌលសិទ្ធិមនុស្សកម្ពុជា នឹងចាប់ផ្ដើមបង្ហោះជីវប្រវត្តិអ្នកកាសែតម្នាក់ម្ដងៗ លើគេហទំព័រ និងហ្វេសប៊ុក ចាប់តាំងពីថ្ងៃទី៣ ឧសភា នេះតទៅហើយ។
ស្របពេលកំណត់ទទួលពាក្យសល់តែមួយថ្ងៃទៀតនោះ អ្នកសម្របសម្រួលគម្រោងសេរីភាពបញ្ចេញមតិនៃមជ្ឈមណ្ឌលសិទ្ធិមនុស្ស កញ្ញា ស៊ន រ៉ាមណា នៅថ្ងៃទី២៤ មេសា បានរំលឹកដល់អ្នកយកព័ត៌មានទាំងអស់ ទាំងវិទ្យុ ទូរទស្សន៍ អ្នកកាសែត និងសូម្បីតែប្លុកឃើ ឲ្យអ្នកកាសែតរួសរាន់ដាក់ពាក្យមកមជ្ឈមណ្ឌលសិទ្ធិមនុស្សកម្ពុជា ឲ្យបានច្រើនថែមទៀត ព្រោះថា បេក្ខភាពនៅមិនទាន់គ្រប់ចំនួនកំណត់នៅឡើយ៖ «អ្នកសារព័ត៌មានចាប់អារម្មណ៍ គាត់អាចផ្ញើអ៊ីម៉ែលមក ramanasorn@cchrcambodia.org ឬទំនាក់ទំនងតាមទូរស័ព្ទ ០១៧ ៦៥ ៥៥ ៩១ សម្រាប់ព័ត៌មានបន្ថែម»។
កញ្ញាបញ្ជាក់ថា មូលហេតុដែលកំណត់ចំនួនអ្នកកាសែត ២០នាក់នោះ គឺដើម្បីឲ្យត្រូវចំនួនឆ្នាំលើកទី២០ នៃការប្រារព្ធទិវានេះ។
កាលពីថ្ងៃទី១២ មេសា ឆ្នាំ២០១៣ មជ្ឈមណ្ឌលសិទ្ធិមនុស្សកម្ពុជា បានចេញសេចក្ដីប្រកាសព័ត៌មានមួយផ្សព្វផ្សាយដល់អ្នកសារព័ត៌មានទាំងអស់ ដែលបានលះបង់សរសេរ និងផ្សព្វផ្សាយរឿងអំពីការរំលោភសិទ្ធិមនុស្ស សេរីភាពសារព័ត៌មាន និងអភិបាលកិច្ចល្អ និងរឿងដទៃទៀតដែលទាក់ទងបរិស្ថាន និងកាប់បំផ្លាញព្រៃឈើ ឲ្យដាក់ប្រវត្តិរូបមកមជ្ឈមណ្ឌលសិទ្ធិមនុស្សកម្ពុជា ដើម្បីផ្សព្វផ្សាយឲ្យសង្គមបានស្គាល់។
អ្នកសម្របសម្រួលកម្មវិធីទូរទស្សន៍សហរដ្ឋអាមេរិក វីអូអេ (VOA) លោក សាយ មុន្នី ដែលលោកថា បុគ្គលិក វីអូអេ ក៏បានដាក់ពាក្យចូលរួមយុទ្ធនាការនោះដែរ បានហៅយុទ្ធនាការនេះថា ជាការលើកទឹកចិត្តអ្នកកាសែតដែលកំពុងប្រឈមគ្រោះថ្នាក់សព្វថ្ងៃ។
ចំពោះការដាក់បង្ហាញប្រវត្តិរូបអ្នកកាសែតជាសាធារណនេះ មានអ្នកកាសែតជាច្រើនថ្លែងថា ជារឿងគ្រោះថ្នាក់បំផុត ដោយពួកគេអះអាងថា សេរីភាពសារព័ត៌មាននៅកម្ពុជា សព្វថ្ងៃនៅមានកម្រិត។
បណ្ណាធិការវិទ្យុសំឡេងប្រជាធិបតេយ្យ វីអូឌី (VOD) លោក អ៊ិង ប៊ុនថន ដែលបានដាក់ប្រវត្តិរូបក្នុងយុទ្ធនាការនោះ បានយល់ស្របចំពោះការព្រួយបារម្ភនេះ។ តែលោកថា បើអ្នកកាសែតនៅតែខ្លាច ក៏មិនអាចធ្វើឲ្យសង្គមផ្លាស់ប្ដូរបានដែរ។
ប្រធានក្លឹបអ្នកកាសែតកម្ពុជា លោក ប៉ែន សាមិទ្ធិ បញ្ជាក់ថា យុទ្ធនាការនេះគឺគ្រាន់តែជាការបន្ថែមមួយបង្កើនទំនាក់ទំនងរវាងអ្នកកាសែត និងអតិថិជនមួយកម្រិតទៀត ព្រោះអីអ្នកកាសែតជាច្រើន មានប្លុកឃើ និងគណនេយ្យហ្វេសប៊ុក ច្រើនហើយ។
ទោះយ៉ាងណា មានអ្នកកាសែតពីរនាក់ប៉ុណ្ណោះបានចុះបញ្ជីក្នុងយុទ្ធនាការនេះ ក្នុងចំណោមអ្នកកាសែតប្រហែល ៦ពាន់នាក់នៅកម្ពុជា។
ទាក់ទងនឹងចំនួនបេក្ខភាពនៅមិនទាន់គ្រប់ ហើយពេលកំណត់សល់តែមួយថ្ងៃទៀតនោះ កញ្ញា ស៊ន រ៉ាមណា បញ្ជាក់ថា មជ្ឈមណ្ឌលសិទ្ធិមនុស្សកម្ពុជា នឹងទាក់ទងអ្នកកាសែតជាច្រើននាក់ទៀតដោយផ្ទាល់ ឲ្យដាក់ប្រវត្តិរូបបន្ថែមទៀត ព្រោះមជ្ឈមណ្ឌលសិទ្ធិមនុស្សកម្ពុជា បានស្គាល់អ្នកកាសែតដែលមានស្នាដៃទាំងនោះខ្លះហើយ៕
No comments:
Post a Comment
yes