សន្និសីទកាសែតរបស់គណៈកម្មការរៀបចំការបោះឆ្នោត នៅថ្ងៃចន្ទនេះ
មកដល់ព្រលប់ថ្ងៃទី១៣ឧសភានេះ ជាថ្ងៃផុតកំណត់រយៈពេល១៥ថ្ងៃ គិតចាប់ពីថ្ងៃទី២៩មេសាដែលជាដំណើរការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រ នីតិកាលទី៥។ ក្នុងសន្និសីទកាសែត នៅប៉ុន្មាននាទីមុននេះ គ.ជ.ប. បានប្រកាសថា មាន ៨គណបក្ស បានចុះឈ្មោះដាក់បេក្ខជនចូលរួមការបោះឆ្នោតជ្រើសតាំងតំណាងរាស្ត្រ នាថ្ងៃទី២៨កក្កដា។ មកដល់ថ្ងៃនេះ គ.ជ.ប.បានទទួលស្គាល់ជាផ្លូវការ ៥ គណបក្ស ឲ្យកែតម្រូវ១ និង២គណបក្សទៀត គ.ជ.ប. កំពុងពិនិត្យសំណុំឯកសារ។
ម៉ោង ៥ និង៣០នាទី ល្ងាចថ្ងៃចន្ទ ទី១៣ ខែឧសភា ឆ្នាំ២០១៣ ជាពេលវេលាផុតកំណត់រយៈពេល ១៥ថ្ងៃ គិតចាប់ពីថ្ងៃទី២៩ខែមេសា ឆ្នាំ២០១៣ នៃដំណើរការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រ នីតិកាលទី៥។ សម្រាប់ការបោះឆ្នោតជ្រើសតាំងតំណាងរាស្ត្រ នាថ្ងៃទី២៨ ខែកក្កដា ឆ្នាំ២០១៣ គ.ជ.ប. បានប្រកាសថា មានគណបក្សនយោបាយ ចំនួន ៨ គណបក្ស បានចុះឈ្មោះនិងដាក់បេក្ខជនឈរឈ្មោះបោះឆ្នោត។
ក្នុងសន្និសីទកាសែត កាលពីព្រលប់ថ្ងៃទី១៣ ខែឧសភា ឆ្នាំ២០១៣ លោក សោ សុភរី សមាជិក គ.ជ.ប. បានប្រកាសថា គណបក្សនយោបាយទាំង ៨ ដែលបានចុះឈ្មោះចូលរួមការបោះឆ្នោត រួមមាន៖ ទី១-គណបក្សប្រជាជនកម្ពុជា ដាក់បេក្ខជនទូទាំង ២៤ ខេត្ត-រាជធានី ទី២-គណបក្សសញ្ជាតិកម្ពុជា ដាក់បេក្ខជនទូទាំង ២៤ ខេត្ត-រាជធានី ទី៣-គណបក្សសម្ព័ន្ធដើម្បីប្រជាធិបតេយ្យ ដាក់បេក្ខជនទូទាំង ២៤ ខេត្ត-រាជធានី ទី៤-គណបក្សហ៊្វុនស៊ិនប៉ិច ដាក់បេក្ខជនទូទាំង ២៤ ខេត្ត-រាជធានី ទី៥-គណបក្សសាធារណរដ្ឋប្រជាធិបតេយ្យ ដាក់បេក្ខជន ២២ មណ្ឌល ដោយ២មណ្ឌលទៀត ត្រូវគ.ជ.ប.បដិសេធ ព្រោះបញ្ជីឈ្មោះ មិនបំពេញតាមល័ក្ខ័ខណ្ឌ ទី៦-គណបក្សសង្គ្រោះជាតិ ដាក់បេក្ខជនទូទាំង ២៤ ខេត្ត-រាជធានី ទី៧-គណបក្សខ្មែរឈប់ក្រ និងទី៨-គណបក្សខ្មែរអភិវឌ្ឍន៍សេដ្ឋកិច្ច។
លោក សោ សុភរី បានបន្តថា មកដល់ថ្ងៃផុតកំណត់ចុងក្រោយនេះ គណៈកម្មាធិការជាតិរៀបចំការបោះឆ្នោត គ.ជ.ប. បានទទួលស្គាល់ជាផ្លូវការរួចហើយនូវគណបក្សនយោបាយចំនួន ៥ រួមមាន៖ គណបក្សប្រជាជនកម្ពុជា គណបក្សសញ្ជាតិកម្ពុជា គណបក្សសម្ព័ន្ធដើម្បីប្រជាធិបតេយ្យ គណបក្សហ្វ៊ុនស៊ិនប៉ិច និងគណបក្សសាធារណរដ្ឋប្រជាធិបតេយ្យ។ ចំណែកគណបក្សសង្គ្រោះជាតិ ត្រូវបានគ.ជ.ប. ឲ្យធ្វើការកែតម្រូវចំណុចខ្វះខាត។ រីឯគណបក្សខ្មែរឈប់ក្រ និងគណបក្សខ្មែរអភិវឌ្ឍន៍សេដ្ឋកិច្ច ដែលទើបតែចុះបញ្ជីឈ្មោះនៅថ្ងៃចុងក្រោយ ថ្ងៃទី១៣ឧសភានេះ ត្រូវបានគ.ជ.ប. កំពុងពិនិត្យលើសំណុំឯកសារនៅឡើយ។
គ.ជ.ប មានរយៈពេល ៧ ថ្ងៃ ដើម្បីពិនិត្យសំណុំឯកសាររបស់គណបក្សនីមួយៗ បន្ទាប់ពីការដាក់ពាក្យសុំចុះបញ្ជី មុននឹងគ.ជ.ប. ត្រូវទទួលស្គាល់ជាផ្លូវការ ឬក៏ឲ្យកែតម្រូវលើឯកសារណាមួយ។
សមាជិក គ.ជ.ប. លោក សោ សុភរី បានបញ្ជាក់ថា គិតត្រឹមបំណាច់ឆ្នាំ២០១២ មានគណបក្សនយោបាយចំនួន ៤២ បានចុះឈ្មោះផ្លូវការ នៅក្រសួងមហាផ្ទៃ។ ក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៤ កាលពីឆ្នាំ២០០៨ មាន ១១ គណបក្ស បានចុះឈ្មោះចូលរួមការបោះឆ្នោត។ តែជាលទ្ធផល មានតែគណបក្ស ៥ ប៉ុណ្ណោះ ដែលទទួលបានអាសនៈសរុប ១២៣ នៅរដ្ឋសភា រួមមាន៖ គណបក្សប្រជាជនកម្ពុជា ៩០ អាសនៈ គណបក្សសមរង្ស៊ី ២៦ អាសនៈ គណបក្សសិទ្ធិមនុស្ស ៣ អាសនៈ គណបក្សហ្វ៊ុនស៊ិនប៉ិច ២ អាសនៈ និងគណបក្ស នរោត្តម រណឫទ្ធិ (គណបក្សជាតិនិយម) ២ អាសនៈ៕
No comments:
Post a Comment
yes