ប្រជាពលរដ្ឋជិត ៥០គ្រួសារ ដែលបានរងផលប៉ះពាល់ដោយសាររដ្ឋាភិបាលបានសម្រេចជួលដីទៅក្រុមហ៊ុនចិន ដើម្បីអភិវឌ្ឍជាតំបន់ទេសចរណ៍ធម្មជាតិ នៅខេត្តកោះកុង បានប្រតិកម្មចំពោះក្រុមហ៊ុននេះ ដែលបានធ្វើសកម្មភាពឈូសឆាយចំដីស្រែចម្ការរបស់ពួកគាត់។
អ្នកភូមិនៅចំណុចតាទេន ឃុំតានូន ស្រុកបុទុមសាគរ ខេត្តកោះកុង បានប្រតិកម្មតវ៉ាចំពោះមេការជនជាតិចិន របស់ក្រុមហ៊ុន យូញៀន ឌីវឺឡុបមេន (Union Development Group) ថាបានចេញមុខរារាំងការតវ៉ារបស់អ្នកភូមិដែលទប់ស្កាត់មិនឲ្យឈូសឆាយស្រែរបស់អ្នកភូមិ។
ពលរដ្ឋនៅភូមិទួលពោធិ៍ ឃុំតានូន លោក ប៊ុន នីម ថ្លែងនៅថ្ងៃទី៥ ឧសភា ថា រយៈពេល ២ថ្ងៃ តាំងពីថ្ងៃសៅរ៍ ទី៤ និងថ្ងៃអាទិត្យ ទី៥ ឧសភា មេការជនជាតិចិន ដែលការពារឲ្យក្រុមហ៊ុនបានចេញមកតវ៉ាជាមួយអ្នកភូមិដែលបានព្យាយាមរារាំងមិនឲ្យប្រើគ្រឿងចក្រឈូសដីស្រែដែលអ្នកភូមិបង្កបង្កើនផលជារៀងរាល់ឆ្នាំ។ លោកថា ក្រុមហ៊ុននេះបានប្រើប្រាស់កម្លាំងទាហានដើម្បីគំរាមកំហែងមកលើអ្នកភូមិ។ គាត់ថា ពួកគាត់គ្រាន់ចង់បានតែដីស្រែដីចម្ការដែលអ្នកភូមិតែងបង្កបង្កើនផលជារៀងរាល់ឆ្នាំទុកដើម្បីជីវភាពតែប៉ុណ្ណោះ។
ឆ្លើយតបបញ្ហានេះ អភិបាលស្រុកបុទុមសាគរ លោក អន ភារៈ មានប្រសាសន៍ថា អ្នកតវ៉ាមួយចំនួនបានទទួលយកការដោះស្រាយរបស់ក្រុមហ៊ុនហើយ ប៉ុន្តែនៅមានពលរដ្ឋមួយចំនួនទៀតដែលមិនទាន់បានទទួលការដោះស្រាយចប់សព្វគ្រប់នៅឡើយ។ លោកថា ក្រុមការងារបានដោះស្រាយជូនពលរដ្ឋនៅតានូនអស់ហើយ ដែលមានទាំងការដោះស្រាយដីកសិកម្ម ផ្ទះ និងថវិកា ផង។
ប៉ុន្តែអ្នកសម្របសម្រួលសមាគមអាដហុក ប្រចាំខេត្តកោះកុង លោក នាង បូរ៉ាទីណូ មានមតិថា ការដោះស្រាយទូទាត់សំណងជូនពលរដ្ឋកន្លងមក គឺមិនសមហេតុសមផល ហើយចំពោះក្រុមហ៊ុនមិនគួរប្រើកម្លាំងប្រដាប់អាវុធមកគំរាមកំហែងអ្នកភូមិនោះ គួរតែមានការចរចាណាមួយប្រកបដោយសន្តិវិធី។
ប្រជាពលរដ្ឋនៅក្នុងស្រុកចំនួន២ គឺស្រុកគីរីសាគរ និងស្រុកបុទុមសាគរ សរុបជាង ១ពាន់គ្រួសារ បានរងផលប៉ះពាល់ពីការអភិវឌ្ឍតំបន់ទេសចរណ៍របស់ក្រុមហ៊ុនចិនឈ្មោះ យូញៀន ឌីវឺឡុបមេន តាំងពីឆ្នាំ២០០៧។ ដោយឡែកពលរដ្ឋនៅចំណុចតាទេន ឃុំតានូន ជិត ៥០គ្រួសារ ដែលមានដីប្រមាណ ៣០០ហិកតារ នៅមិនទាន់ទទួលយកការដោះស្រាយរបស់ក្រុមហ៊ុននៅឡើយ។
ចំណែកអ្នកភូមិមួយចំនួន ដែលបានទទួលយកដីនិងផ្ទះដែលក្រុមហ៊ុនដោះដូរឲ្យពួកគាត់នោះ បានវិលត្រឡប់ទៅភូមិឋានចាស់របស់ពួកគាត់វិញ ដើម្បីប្រកបមុខរបរនេសាទដែលពួកគាត់ធ្លាប់ធ្វើ។
ទាក់ទងបញ្ហាទំនាស់ដីធ្លីនេះ អ្នកភូមិដែលរងផលប៉ះពាល់ដោយក្រុមហ៊ុនអភិវឌ្ឍន៍ និងទំនាស់ជាមួយឈ្មួញ ក្នុងកោះកុង គ្រោងធ្វើដំណើររួមគ្នាមកផ្ទះលោកនាយករដ្ឋមន្ត្រី ហ៊ុន សែន នៅថ្ងៃច័ន្ទ ទី៦ ឧសភា ស្នើឲ្យជួយអន្តរាគមន៍បញ្ហាដីធ្លីរបស់ពួកគេ៕
No comments:
Post a Comment
yes