ការធ្វើដីសម្បទានបង្កជាជម្លោះដីធ្លីជាមួយសហគមន៍ជនជាតិភាគតិច
ក្រុមហ៊ុនផលិតកៅស៊ូរបស់វៀតណាមចំនួន២ត្រូវបានចោទប្រកាន់ដោយអង្គការ Global Witness ថាបានបង្កអោយមានវិបត្តិដីធ្លី នៅក្នុងអាស៊ីអាគ្នេយ៍ ពិសេសក្នុងប្រទេសកម្ពុជា និងឡាវ។ Global Witness បានសរសេរនៅក្នុងរបាយការណ៍ថា រដ្ឋាភិបាលបានសម្រេចផ្តល់ទំហំដីដ៏ធំសម្បើម អោយក្រុមហ៊ុនផលិតកៅស៊ូរបស់វៀតណាម ដោយមិនបានខ្វល់នឹងបញ្ហាសិទ្ធិមនុស្សឡើយ។ គឺក្រុមជនជាតិភាគតិចដែលជាអ្នករងគ្រោះមុនដំបូងគេ។
អង្គការ Global Witnessបានចោទប្រកាន់ក្រុមហ៊ុនវៀតណាមចំនួន២ថា បានបង្កអោយមានជម្លោះដីធ្លីនៅក្នុងតំបន់អាស៊ីអាគ្នេយ៍ ពោលគឺក្នុងប្រទេសកម្ពុជា និងឡាវ។ ក្រុមហ៊ុនវៀតណាមទាំងពីរដែលបានថវិកាមកពីធនាគារពិភពលោក និងធនាគាររបស់អាល្លឺម៉ង់នោះ មានឈ្មោះ Hoang Anh Gia Lai (HAGL) និងក្រុមហ៊ុន Vietnam Rubber Group (VRG)។
វៀតណាមគឺជាប្រទេសធំទី៣ក្នុងពិភពលោកក្នុងវិស័យផលិតកៅស៊ូ ពិសេសក្នុងការឆ្លើយតបទៅនឹងតំរូវការរបស់ប្រទេសចិនក្នុងការផលិតសំបកកង់រថយន្ត និងផលិតផលជាច្រើនទៀតដែលធ្វើពីកៅស៊ូ។
ទីភ្នាក់ងារព័ត៌មានបារាំង AFP បានផ្សាយអោយដឹងនៅថ្ងៃនេះថា អង្គការGlobal Witnessបានចោទប្រកាន់ក្រុមហ៊ុនវៀតណាមទាំងពីរនេះថា បានបង្កអោយមានការបណ្តេញចេញដោយបង្ខំ ដោយសារតែក្រុមហ៊ុនទាំងនេះមានទំនាក់ទំនងជាមួយអ្នកសិ្នទ្ធិនឹងរដ្ឋាភិបាលកម្ពុជា និងឡាវ។ ប្រទេសទាំងពីរត្រូវបានគេស្គាល់ថា ជាប្រទេសដែលមានបញ្ហាពុករលួយធ្ងន់ធ្ងរ។ AFPបានបន្តស្រង់របាយការណ៍របស់Global Witness ដែលនិយាយថា រដ្ឋាភិបាលនៃប្រទេសទាំងពីរនេះបានសម្រេចផ្តល់ដីទំហំធំធេងដល់ក្រុមហ៊ុនវៀតណាមទាំងនេះ ដោយមិនបានខ្វាយខ្វល់ពីការគោរពសិទ្ធិមនុស្សឡើយ។ ហើយក្រុមជនជាតិដើមភាគតិចគឺជាអ្នករងគ្រោះមុនគេ។
បើយោងតាមរបាយការណ៍របស់Global Witness ដែលស្រង់ដោយទីភ្នាក់ងារបារាំងដដែល ទំហំដីជាង១លាន២សែនហិចតាត្រូវបានប្រើប្រាស់ក្នុងដំណាំកៅស៊ូ។ ជាមួយទំហំដីដំណាំកៅស៊ូនេះ មនុស្ស៤សែននាក់ត្រូវបានបណ្តេញចេញដោយបង្ខំពីលំនៅដ្ឋានរបស់ពួកគេ នេះបើគិតពីឆ្នាំ២០០៣មក។
Global Witness បានអំពាវនាវអោយរដ្ឋាភិបាលទាំងពីរ កម្ពុជា និងឡាវបញ្ឈប់កិច្ចសន្យាជាមួយក្រុមហ៊ុនវៀតណាមទាំងពីរ ហើយក៏អំពាវនាវអោយប្រភពទុនទាំងពីរ គឺធនាការអាល្លឺម៉ង់ និងធនាគារពិភពដកថវិការបស់ពួកគេចេញពីក្រុមហ៊ុនទាំងពីរនេះវិញ ប្រសិនបើក្នុងអំឡុងពេល៦ខែទៅមុខនេះ ក្រុមហ៊ុនទាំងពីរមិនបានដោះស្រាយបញ្ហាអោយបានប្រសើរឡើងវិញទេនោះ។
ពាក់ព័ន្ធនឹងរបាយការណ៍របស់ Global Witnessនេះ ធនាគារអាល្លឺម៉ង់បានឆ្លើយតបថា ក្រុមការងារជំនាញរបស់ធនាគារបានពិនិត្យគម្រោងរបស់ក្រុមហ៊ុនវៀតណាមនោះហើយ មុននឹងធនាគារនេះសម្រេចសហការនោះ។ ចំណែកឯខាងស្ថាប័នផ្តល់ហិរញ្ញវត្ថុរបស់ធនាគារពិភពលោកវិញ មន្ត្រីរបស់ស្ថាប័ននេះមិនបានអត្ថាធិប្បាយឆ្លើយតបអ្វីឡើយ ដោយនិយាយថា ពួកគេមិនទាន់បានឃើញរបាយការណ៍ពេញលេញនៅឡើយ។
បើតាមAFP ក្រុមហ៊ុនវៀតណាមទាំងពីរវិញបានចេញសេចក្តីថ្លែងការណ៍បដិសេធថា ពួកគេមិនបានប្រព្រឹត្តសកម្មភាពខុសច្បាប់ឡើយ ហើយថាពួកគេបានចូលរួមក្នុងការអភិវឌ្ឍន៍សេដ្ឋកិច្ចសហគមន៍ ដូចជាការបង្កើតការងារ និងបង់ពន្ធអស់ជាច្រើន៕
No comments:
Post a Comment
yes