អាពាហ៍ពិពាហ៍របស់អធិរាជសំឡេងមាសលោក ស៊ីន ស៊ីសាមុត និងអ្នកស្រី ខាវ ថងញ៉ុត ដែលជាបងប្អូនជីដូនមួយនឹងគ្នា តាមការចាត់ចែងរបស់មេបានោះ បានផ្តល់កំណើតកូនប្រុសស្រីចំនួន៤នាក់។ ប៉ុន្តែជាអកុសល វាសនាកូនពីរនាក់ បានជួបវាសនាអភ័ព្វដូចលោកដែរ គឺបានបាត់បង់ជីវិតក្នុងរបបប៉ុលពត នៅសល់តែកូនពីរនាក់ប៉ុណ្ណោះ។ តែស្ទើរមិនគួរឲ្យជឿសោះឡើយថា ជីវិតកូនស្រីច្បងរបស់អធិរាជសំលេងមាស លោក ស៊ីន ស៊ីសាមុត ក្រលំបាកដល់ថ្នាក់នេះសោះ រស់នៅប្រកបរបរលក់បាយម្ហូបដែលអាចរកចំណូលបានតែ៦ទៅ៧ពាន់រៀលក្នុងមួយថ្ងៃ ស្ទើរតែបានព្រឹកខ្វះល្ងាច ហើយមានពេលខ្លះដើរស៊ីឈ្នូលដកដំឡូងតាមចម្ការព្រៃភ្នំទៀតផង។
កូនៗទាំងពីររបស់អធិរាជសំឡេងមាស ស៊ីន ស៊ីសាមុត ដែលនៅមានជីវិតរស់មកដល់សព្វថ្ងៃ គឺកូនទីឈ្មោះស៊ីន យុទ្ធនា ដែលសព្វថ្ងៃនៅលើទឹកដីកំណើតខេត្តស្ទឹងត្រែង និងកូនទី២លោកស៊ីន ច័ន្ទឆាយា រស់នៅភ្នំពេញបន្តអាជីពសិល្បៈដូចលោកដែរ តែមិនមានកេរ្តិ៍ល្បីដូចឪពុកឡើយ។
បើទោះជា លោក ស៊ីន ស៊ីសាមុត បានរលាយរូបកាយក្លាយជាផេះធូលីហើយក្តី តែកេរ្តិ៍ឈ្មោះរបស់លោកស៊ីន ស៊ីសាមុត ដែលមានរហ័សនាម «អធិរាជសំឡេងមាស» នោះមិនថាតែខ្មែររស់នៅទីណានោះទេ ដែលទទួលស្គាល់បើសូម្បីតែជាតិសាស្ត្រដទៃនោះក៏ទទួលស្គាល់ថា តារាចម្រៀងខ្មែរលោកស៊ីន ស៊ីសាមុត នេះជាមរតសិល្បៈវិប្បធម៌ខ្មែរ មិនចេះរីងស្ងួតមួយរូបរកអ្នកមកជំនួសតំណែងមិនបានឡើយ។ ប៉ុន្តែអ្វីដែលផ្ទុយស្រឡះ ដែលមនុស្សស្ទើរតែទូទៅសកលលោកមិននឹកស្មានដល់នោះ គឺជីវភាព និងការរស់នៅដ៏លំបាករបស់កូនប្រពន្ធអធិរាជសំឡេងមាសនាពេលបច្ចុប្បន្ន។
ជារៀងរាល់ថ្ងៃកូនស្រីច្បងរបស់លោក ស៊ីន ស៊ីសាមុត ដែលមានវ័យ៥៨ឆ្នាំឈ្មោះស៊ីន យុទ្ធនា តែងក្រើកពីដំណេកនៅម៉ោង៥ព្រឹកដើរទៅទិញរបស់របរបន្លែរត្រីសាច់មកចម្អិន ហើយទួលបាយម្ហូបយកទៅដាក់លក់នៅក្នុងផ្សារ។
ដៃធ្វើម្ហូបបណ្តើរ អ្នកស្រី ស៊ីន យុទ្ធនា បានពោលថា ហ៊ឺ!! ជីវិតពួកខ្ញុំមិនមានអ្វីដែលនាំឲ្យមហាជនចាប់អារម្មណ៍ដូច ជាជីវិតប៉ាខ្ញុំទេ។ សព្វថ្ងៃជីវិតខ្ញុំ និងកូនៗបីនាក់ រួមជាមួយម៉ែ(ប្រពន្ធលោក ស៊ីន ស៊ីសាមុត) រស់នៅបែបសាមញ្ញ របរអីក៏រកដែរ ឲ្យតែបានប្រាក់កាសមកផ្គត់ផ្គង់គ្រួសារកើត។ អ្នកស្រីបន្តថា ខ្ញុំគ្មានរបរអ្វីជាទីពឹងធំដំទេ ក្រោយពី រឺត្រែតពីការងារនៅក្នុងមន្ទីរឃោសនាការវប្បធម៌ព័ត៌មានមក ក៏ជួលតូបតូចមួយនៅក្នុងផ្សារខេត្តស្ទឹងត្រែង ធ្វើបាយម្ហូបលក់បានប្រាក់បន្តិតបន្តូចដោះស្រាយជីវភាពប៉ុណ្នឹង។
របរលក់បាយម្ហូបរបន្តិចបន្តូចនៅផ្សាររាល់ថ្ងៃនេះ មិនទៀងទាត់សម្រាប់គ្រួសារអ្នកស្រីទេ ថ្ងៃណាមានគេទិញច្រើនទៅក៏បានចំណេញ៥-៦ពាន់ទៅមួយម៉ឺនរៀល។ តែខែខ្លះរកប្រាក់ចំណេញសល់ទៅបង់ឲ្យថ្លៃជួលតូបគេនោះមិនទាំងចង់គ្រប់ផង។ ខែណាលក់មិនសូវដាច់ អ្នកស្រីត្រូវបិទតូបចេញទៅរកស៊ីឈ្នូលដកដំឡូងតាមចម្ការឲ្យគេ។
អ្នកស្រីបញ្ជាក់ថា ខ្ញុំមិនដែលគិតសោះថា ខ្ញុំជាកូនស្រីតារាចម្រៀងដ៏ល្បី ហើយចេញទៅធ្វើបែបនោះខ្មាស់គេ មានតែសប្បាយទៅវិញទេ ពេលបានផ្លាស់ប្តូរបរិយាកាសនោះ។ អ្នកស្រីបានបញ្ជាក់ថា ទៅស៊ីឈ្នូលដកដំឡូង ខ្ញុំទទួលបានចំណូលច្រើនជាងលក់បាយម្ហូបនៅផ្សារ ហើយខ្ញុំក៏មិនមានភាពខ្មាសអៀនដែរ ថាខ្លួនជាកូនរបស់អធិរាជសំឡេងមាសអីនោះទេ។
កូនច្បងរបស់អធិរាជសំឡេងមាសរូបនេះឲ្យដឹងថា កាលពីដើមឡើយ ខណៈពេលនៅធ្វើការនៅក្នុងមន្ទីឃោសនាការ ហើយរស់នៅជុំគ្នាជាមួយនឹងប្តី ជីវភាពក៏មិនពិបាកដូចសព្វថ្ងៃនេះដែរ។ តែជីវិតប្តីប្រពន្ធរបស់អ្នកស្រីក៏បានបញ្ចប់ទៅកាលពីជាង១០ឆ្នាំមុនក្រោយពីបន្ទាប់ពីប្តីអ្នកស្រីទៅមានអ្នកថ្មីនោះ ចំពេលកូនទាំងបីកំពុងស្ថិតក្នុងវ័យក្រេបជញ្ជក់ចំណេះដឹងបណ្តាលឲ្យបន្ទុកនេះត្រូវធ្លាក់មកលើអ្នកស្រីទាំងស្រុង។ ដោយឡែកម្តាយរបស់អ្នកស្រីក៏ស្ថិតក្នុងបន្ទុករបស់អ្នកស្រីដែរ។
ប៉ុន្តែយ៉ាងណា អ្នកស្រីបានអះអាងថា ពេលនេះកូនៗទាំងបីរបស់ខ្ញុំនេះគេធំអស់ហើយ ហើយកូនច្បងគេធ្វើជាគ្រូបង្រៀននៅសាសាវិទ្យាល័យក្នុងខេត្ត កូនទី២គេក៏មានប្តីហើយដែរ។ ចំណែកឯកកូនទី៣នោះ គេក៏ធំ និងចេះរកប្រាក់ចិញ្ចឹមខ្លួនគេហើយដែរ។ ខ្ញុំហាក់រួចពីបន្ទុកនេះបន្តិច៕
No comments:
Post a Comment
yes