មន្ត្រីគណបក្សសង្គ្រោះជាតិនៅស្រុកស្ទោង ខេត្តកំពង់ធំ ចោទប្រកាន់សកម្មជនគណបក្សប្រជាជនកម្ពុជា ក្នុងតំបន់ថា ធ្វើសកម្មភាពរំខានដល់ការបង្រៀនសកម្មជនបក្សពីរបៀបសង្កេតការណ៍ នាពេលបោះឆ្នោតខាងមុខ ។
មន្ត្រីគណបក្សសង្គ្រោះជាតិ នៅឃុំចំណាក្រោម ស្រុកស្ទោង ខេត្តកំពង់ធំ អះអាងថា ពួកគេបានបង្រៀនសកម្មជន ៣៥នាក់ ពីរបៀបអង្កេតការណ៍ពេលបោះឆ្នោត នៅរសៀលថ្ងៃព្រហស្បតិ៍ ទី០៦ ខែមិថុនា តែមន្ត្រីគណបក្សបានចាក់ភ្លេងរំខាន។
លេខាធិការគណបក្សសង្គ្រោះជាតិស្រុកស្ទោង លោក ឆាយ ចែង ប្រាប់ថា សកម្មជនគណបក្សប្រជាជនកម្ពុជាម្នាក់ ឈ្មោះ គង់ អឿន នៅក្បែរផ្ទះរបស់លោក បានបើកធុងបាស់ខ្លាំងៗ នាំឲ្យមានសំឡេងរំខានមិនអាចស្តាប់អ្វីបាន ខណៈលោកកំពុងបង្រៀនសកម្មជនបក្ស ពីការងារសង្កេតការណ៍ពេលបោះឆ្នោត។ លោកបន្តថា បើទោះជាឮសម្លេងរំខានយ៉ាងណាក៏ដោយ ក៏មិនមានអាជ្ញាធរ ឬសមត្ថកិច្ចណាម្នាក់មកជួយសម្រួលដែរ ៖ "ចាក់ខ្លាំង ល្មមដែលយើងពិបាកនឹងនិយាយស្តាប់គ្នាលឺ ព្រោះផ្ទះនៅជិតគ្នា គាត់អះអាងថាគាត់អត់បិទទេ លើកលែងតែប៉ូលិសមករារាំងគាត់ មិនឲ្យគាត់បិទ ទើបបានគាត់ឈប់ គាត់និយាយអញ្ចឹង។ មេឃុំនៅហ្នឹង គាត់អត់មានវិធានការអីមកលើ គង់ អឿន នេះទេ មេឃុំហ្នឹងគាត់ថា គាត់ជាប់រវល់"។
លោក គង់ អឿន ជាសកម្មជនរបស់គណបក្សប្រជាជនកម្ពុជា ដែលត្រូវបានចោទថា ធ្វើសកម្មភាពរំខាន បដិសេធនឹងការចោទប្រកាន់នេះ ដោយលោកលើកឡើងថា លោកគ្រាន់តែជប់លាងសប្បាយជាមួយមិត្តភ័ក្ត្រតែប៉ុណ្ណោះ ៖ "ខ្ញុំអត់បានចាក់បាស់តម្លង់ផង ខ្ញុំចាក់ស្តាប់ក្នុងផ្ទះខ្ញុំ ចាក់ក្នុងផ្ទះខ្ញុំ ចាក់ក្នុងផ្ទះខ្ញុំតា អត់លឺផងខ្ញុំបិទប៉ុណ្ណឹងហើយ អស់លឺប៉ុណ្ណឹងហើយ បាស់វាធំៗ"។
មិនអាចទាក់ទងប្រធានប៉ុស្តិ៍ឃុំចំណារក្រោម លោក ហ៊ាង ហួន ដើម្បីអធិប្បាយលើបញ្ហានេះ បាននៅឡើយទេ។ ចំណែកមេឃុំ លោក ខឹម យុន មានប្រសាសន៍ថា លោកមិនបានដឹងពីករណីនេះទេ។
នាយកប្រតិបត្តិអង្គការឃ្លាំមើលការបោះឆ្នោត ហៅកាត់ថា និកហ្វិក (Nicfec) លោក ហង្ស ពុទ្ធា មានប្រសាសន៍ថា ប្រសិនបើមានហេតុការណ៍ដូច្នេះ នេះជាទង្វើដែលមិនមានសុជីវធម៌ ហើយការដែលអាជ្ញាធរមិនអើពើ ជួយសម្រួលសន្តិសុខនេះ ចាត់ទុកថា ជាការរើសអើង និងបង្ហាញពីភាពមិនឯករាជ្យ ៖ "បើអាជ្ញាធរមិនដោះស្រាយសម្រួលឲ្យក្រុមគណបក្សណាមួយ ធ្វើសកម្មភាពដើម្បីបណ្តុះបណ្តាលសកម្មជនរបស់ខ្លួននោះទេ បានន័យថា មេឃុំ ឬក្រុមប្រឹក្សាឃុំនោះឯង បង្កើតនូវវប្បធម៌មិនសេរី និងយុត្តិធម៌សម្រាប់ការបោះឆ្នោតហើយ ហើយគណបក្សមួយចំនួន លោកនឹងទទួលការរងគ្រោះ"។
កន្លងទៅ លោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍ទៅកាន់មន្ត្រីក្រោមឱវាទ និងមន្ត្រីគ្រប់ជាន់ថ្នាក់ទាំងអស់ ឲ្យរក្សាសណ្តាប់ធ្នាប់ ដើម្បីបង្កលក្ខណៈងាយស្រួលដល់គ្រប់គណបក្សនយោបាយ ជិតពេលបោះឆ្នោត និងអំឡុងពេលបោះឆ្នោត ដោយមិនត្រូវប្រកាន់បក្សពួកនយោបាយទ្បើយ៕
No comments:
Post a Comment
yes