គណបក្សសង្គ្រោះជាតិកាលពីម្សិលមិញ បានធ្វើការត្រៀមរៀបចំខ្លួនជាសាធារណៈជាលើកចុងក្រោយ សម្រាប់គម្រោងធ្វើមហាបាតុកម្មបែបអហិង្សា នៅថ្ងៃសៅរ៍ខាងមុខនេះ ដោយមេដឹកនាំគណបក្សបានគូសបញ្ជាក់សារចុងក្រោយអំពីភាពអហិង្សាក្នុងចំណោមអ្នកស្មោះស្ម័គ្រដែលបានប្រមូលផ្តុំគ្នា នៅទីលានប្រជាធិបតេយ្យតាមព្រះរាជតម្រិះរបស់ព្រះមហាក្សត្រ។
ការហាត់សមនេះរួមមានការសមាធិ និងការបួងសួងពីអ្នកគាំទ្ររាប់រយនាក់ដែលលុតជង្គង់កាន់ទងផ្កា។ នៅលើឆាក មានការសម្តែងដែលបែងចែកជាក្រុមនគរបាល និងបាតុករ ដែលយកមកធ្វើជាឧទាហរណ៍អំពីថាតើត្រូវធ្វើបាតុកម្មដោយរបៀបណា?
ទោះជាយ៉ាងណា ខុសពីការហាត់សមលើកទី ១ កាលពីថ្ងៃអាទិត្យកន្លងទៅលើកនេះបាតុករគ្រាន់តែអង្គុយនៅចំពោះមុខតួអង្គនគរបាល កាលពីម្សិលមិញ ដោយមិនមានប្រតិកម្មអ្វីចំពោះអំពើហិង្សាតាមនីតិវិធីដែលគណបក្សសង្ឃឹមថា អ្នកគាំទ្រនឹងធ្វើនៅថ្ងៃសៅរ៍។
ការហាត់សមនេះ ដែលមានការចូលរួមពីមនុស្សរាប់ពាន់នាក់ បានធ្វើឡើងក្នុងរយៈពេល ២ ថ្ងៃបន្ទាប់ពីលោក សម រង្ស៊ី ប្រធានគណបក្សសង្គ្រោះជាតិ បានសរសេរលិខិតថ្វាយព្រះមហាក្សត្រ ព្រះបាទ នរោត្តម សីហមុនី ដើម្បីស្នើសុំកិច្ចអន្តរាគមន៍ពីព្រះមហាក្សត្រក្នុងភាពជាប់គាំងដែលកំពុងបន្តទាក់ទងនឹងការបោះឆ្នោត។
ព្រះរាជសារ ព្រះមហាក្សត្រ កាលពីថ្ងៃទី៣ ខែ សីហា ឲ្យដឹងថា «ខ្ញុំសូមអរគុណដ៏ជ្រាលជ្រៅចំពោះឯកឧត្តមដែលបានសម្តែងនូវការគោរពនិងដង្ហែតាមព្រះរាជតម្រិះដែលមានចែងក្នុងព្រះរាជសាររបស់ខ្ញុំចុះថ្ងៃទី៣០ ខែ សីហា ឆ្នាំ ២០១៣»។
លោក សម រង្ស៊ី បានសរសេរក្នុងលិខិតចុះថ្ងៃទី ២ ខែ កញ្ញា ថា៖ «ទូលព្រះបង្គំសូមព្រះអង្គទ្រង់ព្រះមេត្តាជួយធ្វើព្រះរាជអន្តរាគមន៍ ដើម្បីរកដំណោះស្រាយចំពោះភាពមិនប្រក្រតីក្នុងការបោះឆ្នោត ប្រកបដោយតម្លាភាព និងយុតិ្តធម៌ដែលជាការចង់បានរបស់ប្រជាពលរដ្ឋខ្មែរជាម្ចាស់ឆ្នោត»។
ក្នុងព្រឹត្តិការណ៍កាលពីម្សិលមិញ លោក សម រង្ស៊ី បានថ្លែងថា លោកបានទទួលព្រះរាជឆ្លើយតបរបស់ព្រះមហាក្សត្រដែល «អរគុណ» គណបក្សសង្គ្រោះជាតិដែលបានរៀបចំបាតុកម្មអហិង្សា និងសន្តិវិធី ដើម្បីរក្សាសេចក្តីថ្លៃថ្នូររបស់ជាតិ។
ខណៈដែលការជាប់គាំង នយោបាយកំពុងបន្ត មានមនុស្សមួយចំនួនចាត់ទុកព្រះមហាក្សត្រជាតួអង្គតែមួយគត់ ដែលអាចផ្សះផ្សាដំណោះស្រាយ។
គណបក្សសង្គ្រោះជាតិបានទទូចម្តងហើយម្តងទៀតថា បាតុកម្មរបស់ខ្លួនអំពាវនាវឲ្យបង្កើតការស៊ើបអង្កេតឯករាជ្យលើកភាពមិនប្រក្រតីនៃការបោះឆ្នោត បើទោះបីជាពន្លឺនៃការបងើ្កតគណៈកម្មការនេះហាក់ដូចជាងងឹតទៅៗក៏ដោយ។
លោក កឹម សុខា អនុប្រធានគណបក្ស បានសង្កត់លើចំណុចនោះជាថ្មីកាលពីម្សិលមិញដោយថ្លែងផ្តោតលើផ្លូវអារម្មណ៍ក្នុងការធ្វើបាតុកម្ម បន្ទាប់ពីគណបក្សសង្គ្រោះជាតិប្រកាសកាលពីថ្ងៃចន្ទថា បាតុកម្មនឹងជាការបួងសួង និងការសមាធិ។ លោកបានប្រាប់ក្រុមមនុស្សថា៖ «អហិង្សានាំមកនូវជោគជ័យខ្លាំង។ យើងមិនមានគោលបំណងធ្វើបដិវត្តន៍ សង្គ្រាម រដ្ឋប្រហារ ឬភេរវកម្ម [នយោបាយ] ឡើយ ប៉ុន្តែយើងស្វែងរកយុតិ្តធម៌»។
លោកបានប្រាប់ឲ្យដឹងទៀតថា៖ «យើងកំពុងបង្ហាញគោលការណ៍បាតុកម្មអហិង្សាលើឆាកថ្ងៃនេះ ដើម្បីបង្រៀនអ្នកគាំទ្រអំពីរបៀបធ្វើឲ្យចិត្តស្ងប់»។ លោក កឹម សុខា បានឲ្យដឹងថា បាតុកម្មនឹងបន្តរហូតទាល់តែមានដំណោះស្រាយសមស្រប។
ថ្លែងមក កាន់ ភ្នំពេញ ប៉ុស្តិ៍ ក្នុងលក្ខខណ្ឌមិនបញ្ចេញឈ្មោះកាលពីម្សិលមិញ អ្នកជំនាញសន្តិភាពបរទេស ដែលបានអញ្ជើញដោយគណបក្សឲ្យមកដឹកនាំការហាត់សម កាលពី ១ សប្តាហ៍មុននោះ បានឲ្យដឹងថា មានការយល់ខុសក្នុងចំណោមប្រជាជនកម្ពុជា ដែលថាបាតុកម្មអហិង្សាមិនមែនជាបាតុកម្មនោះទេ៕
No comments:
Post a Comment
yes