តំណាងរាស្រ្តគណបក្សសង្គ្រោះជាតិ ធ្វើពិធីបួងសួងនៅអង្គវត្ត
តំណាងរាស្ត្រគណបក្សសង្គ្រោះជាតិ នៅម៉ោង៨:៣០នាទីព្រឹកថ្ងៃអាទិត្យ ទី២២ខែកញ្ញានេះ នឹងធ្វើពិធីសច្ចាប្រណិធាន នៅចំពោះមុខមហាជនខ្មែរ វត្ថុស័ក្តិសិទ្ធិថែរក្សាកម្ពុជា និងទេវតារក្សាស្វេតឆ័ត្រ ក្នុងខេត្តសៀមរាប ដោយប្តេជ្ញាលើគោលការណ៍៣ចំណុច។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ការសច្ចាប្រណិធាននេះ នឹងធ្វើឡើងនៅខាងមុខប្រាសាទអង្គរវត្ត ខេត្ត សៀមរាប ដោយបញ្ចូលនូវសារបួងសួង និងការប្តេជ្ញាចំនួន៣ចំណុច ដែលរួមមាន៖
- ទូលព្រះបង្គំ យើងខ្ញុំ សូមប្តេជ្ញា ប្តូរផ្តាច់ហ៊ានបូជាជីវិត មិនក្បត់ជាតិមាតុភូមិកម្ពុជា
- ទូលព្រះបង្គំ យើងខ្ញុំ សូមប្តេជ្ញា មិនក្បត់ឆន្ទៈប្រជាពលរដ្ឋជាដាច់ខាត
- ទូលព្រះបង្គំ យើងខ្ញុំ សូមប្តេជ្ញា ប្រឆាំងដាច់ខាតអំពើផ្តាច់ការ ពុករលួយ និងអយុត្តិធម៌សង្គមគ្រប់បែបយ៉ាង
សម័យប្រជុំដំបូងនៃរដ្ឋសភា នឹងដំណើរការតាមការគ្រោងទុក នៅថ្ងៃចន្ទ ទី២៣ខែកញ្ញា ស្អែកនេះ បើទោះជាមិនមានវត្តមានរបស់តំណាងរាស្ត្រគណបក្សសង្គ្រោះជាតិ។ រហូតមកដល់ថ្ងៃអាទិត្យនេះ ព្រះមហាក្សត្រ ព្រះបាទនរោត្តមសីហមុនី មិនមានព្រះរាជបន្ទូលតបនឹងលិខិតរបស់គណបក្សសង្គ្រោះជាតិ ដែលបង្ហាញពីការមិនចូលរួមប្រជុំសភា និងស្នើឲ្យព្រះអង្គ ពន្យារពេលសម័យប្រជុំសភាលើកដំបូងនៅថ្ងៃទី២៣ខែកញ្ញា។ ចំណែកប្រជាពលរដ្ឋ និងសង្គមស៊ីវិលមួយចំនួន បានដាក់ញត្តិ និងស្នាមមេដៃ ថ្វាយព្រះមហាក្សត្រ តែរហូតមកដល់ពេលនេះ ព្រះអង្គ មិនបានចេញជាព្រះរាជសារ ជារាជបន្ទូលតបនឹងការទាមទាររបស់ប្រជារាស្ត្រនោះទេ។
ចំណែកបេក្ខជនតំណាងរាស្ត្រគណបក្សសង្គ្រោះជាតិទាំង៥៥រូប កំពុងស្នាក់នៅឯខេត្តសៀមរាប និងមានគម្រោងវិលត្រឡប់មករាជធានីភ្នំពេញវិញ នៅថ្ងៃទី២៤ ខែកញ្ញានេះ។ តំណាងរាស្ត្រទាំងនោះ ធ្វើពិធីស្បថសច្ចាគោរពឆន្ទៈប្រជាពលរដ្ឋ ថ្ងៃទី២២កញ្ញានេះ នៅមុខប្រាសាទអង្គរវត្ត ខេត្តសៀមរាប។
ចំណែកអ្នកវិភាគនយោបាយ លោកស្រី ជា វណ្ណាត យល់ថា ពហិការរបស់គណបក្សសង្គ្រោះជាតិ នឹងប៉ះទង្គិចជាមួយស្ថាប័នព្រះមហាក្សត្រ និងពលរដ្ឋមួយចំនួន ក្នុងចំណោមពលរដ្ឋជិត៣លាននាក់ ដែលបានបោះឆ្នោតឲ្យគណបក្សប្រឆាំង ប៉ុន្តែគោរពព្រះមហាក្សត្រ ៖ "គណបក្សសង្គ្រោះជាតិលោកប្រកែកថា លោកមិនចូលរួមទេ ដូចជាលោកប្រកែកជាមួយព្រះមហាក្សត្រ ថាលោកមិនស្តាប់ព្រះមហាក្សត្រទេ របៀបអញ្ចឹង ហើយនេះខ្ញុំយល់ឃើញថា កាលណាមានជំហរអញ្ចឹង ជំហរហ្នឹងអាចប៉ះពាល់ដល់ប្រជាពលរដ្ឋ ដែលគាំទ្រគណបក្សសង្គ្រោះជាតិដែរ ក៏ប៉ុន្តែសុទ្ធតែជាអ្នកគោរពបូជាព្រះមហាក្សត្រ"។
លោកស្រីបន្ថែមថា ការព្រួយបារម្ភថា គណបក្សសង្គ្រោះជាតិអាចចាញ់ល្បិចគណបក្សប្រជាជនកម្ពុជា នៅពេលអនាគតដូចគណបក្សហ្វ៊ុនស៊ិនប៉ិច ប្រសិនបើគណបក្សនេះចូលប្រជុំនោះ គឺមិនអាចកើតមានទេ ពីព្រោះគណបក្សប្រឆាំងធ្លាប់ឆ្លងកាត់ បទពិសោធន៍នយោបាយច្រើនហើយ ៖ "ទស្សនៈរបស់ខ្ញុំ ខ្ញុំថាគួរតែអញ្ជើញទៅ ចំណេញជាងមិនចូល ហើយកុំឲ្យភ័យថា ខ្លាចចាញ់បោក ខ្លាចចាញ់កល ខ្លាចចាញ់ល្បិច ខ្ញុំថាមិនគួរទេ ពីព្រោះប្រជាពលរដ្ឋទេ លោកជាអ្នកសម្រេច ប្រជាពលរដ្ឋទេ ដែលលោកតាមមើលអ្នកនយោបាយ"។
ប្រភពពីVOD
No comments:
Post a Comment
yes