ប្រជាពលរដ្ឋ និងព្រះសង្ឃ ប្រមូលផ្តុំក្បែរព្រះបរមរាជវាំង
ដើម្បីថ្វាយញត្តិទៅព្រះមហាក្សត្រ
របាំងរារាំងពលរដ្ឋចូលមុខវាំង ថ្វាយញត្តិព្រមហាក្សត្រ
មន្ត្រីអង្គការសង្គមស៊ីវិល និង ប្រជាពលរដ្ឋ បន្តស្នើសុំព្រះមហាក្សត្រ ពន្យារពេលប្រជុំសភាលើកដំបូង នៅថ្ងៃទី២៣ខែកញ្ញានេះ ដើម្បីទុកពេលដោះស្រាយភាពមិនប្រក្រតីនៅពេលបោះឆ្នោត ដើម្បីឲ្យគណបក្សទាំងពីរ ដែលឈ្នះឆ្នោត មានឯកភាពគ្នាជាមុនសិន។
មន្ត្រីអង្គការសង្គមស៊ីវិល ប្រជាពលរដ្ឋ ដែលភាគច្រើន ជាយុវជនជិត ១០០០នាក់ និងព្រះសង្ឃប្រមាណ៣០អង្គ បានប្រមូលផ្តុំគ្នានៅព្រឹកថ្ងៃអាទិត្យនេះ នៅក្បែរព្រះបរមរាជវាំង ក្នុងគោលបំណង ស្នើឲ្យព្រះមហាក្សត្រ សម្រេចពន្យារពេលប្រជុំលើកដំបូងដែលគ្រោងធ្វើនៅថ្ងៃចន្ទស្អែកនេះ។
ក្នុងខ្លឹមសារញត្តិដែលមានចុះហត្ថលេខា ដោយអង្គការសង្គមស៊ីវិលចំនួន១០ ដែលដាក់ថ្វាយព្រះមហាក្សត្រនៅព្រឹកនេះ គឺស្នើឲ្យព្រះមហាក្សត្រពន្យារពេលប្រជុំសភា ទុកឱកាសឲ្យគណបក្សទាំងពីរចរចាដោះស្រាយបញ្ហាឲ្យអស់ ដើម្បីជៀសវាងបញ្ហាជាប់គាំងនយោបាយ វិបត្តិសេដ្ឋកិច្ចសង្គម ទូទាំងប្រទេស។
អង្គការសង្គមស៊ីវិល និងប្រជាពលរដ្ឋ ដែលប្រមូលផ្តុំនៅព្រឹកនេះ ប្រកាសជំហរថា ប្រសិនបើការប្រជុំសភា នៅតែបន្តនៅថ្ងៃស្អែកនេះ ពួកគេនឹងតវ៉ាបន្តទៀតជាទ្រង់ទ្រាយធំនៅរាជធានីភ្នំពេញ នៅតាមបណ្តាខេត្តផងដែរ៕
No comments:
Post a Comment
yes