មហាបាតុកម្មអហិង្សារបស់គណបក្សសង្គ្រោះជាតិនិងនាំមកនូវយុត្តិធម៌សម្រាប់ពលរដ្ឋដែលជាម្ចាស់ឆ្នោត

ការហាត់ធ្វើមហាបាតុកម្មអហិង្សារបស់គណបក្សសង្គ្រោះជាតិ នាពេលថ្មីៗនេះ

នៅថ្ងៃទី០៧ កញ្ញានេះ ប្រជាពលរដ្ឋខ្មែរដែលជាអ្នកស្នេហាជាតិ ស្រលាញ់លទ្ធិប្រជា​ធិបតេយ្យ និងយុត្តិធម៌នោះ បានរួបរួមគ្នា​ជាមួយ គណបក្សសង្គ្រោះជាតិ ដើម្បីធ្វើមហា​បាតុ​កម្ម​អហិង្សា ក្នុងការទាមទាររកយុត្តិធម៌ ដល់ពួកគាត់ដែលជាម្ចាស់ឆ្នោត ដោយហេតុថា​ការ​បោះឆ្នោតជាតិអាណត្តិទី៥ កាលពីថ្ងៃទី២៨ កក្កដា កន្លងទៅនេះ មិនមានភាពសេរី និងយុត្តិ​ធម៌នោះឡើយ ម្យ៉ាងទៀត គជប ក៏បាន ចូលដៃជើងក្នុងការលួចបន្លំសន្លឹកឆ្នោត​ឲ្យគណ​បក្សប្រជាជន យ៉ាងសកម្មបំផុតផងដែរ ។

ការបោះឆ្នោតនៅក្នុងប្រទេសកម្ពុជា ពីមួយអាណត្តិទៅមួយអាណត្តិ ត្រូវបានគេមលើឃើញថា គឺមានភាពមិនប្រក្រតី កាន់តែខ្លាំងឡើងៗ ព្រោះគណបក្សប្រជាជន គោលបំណង​របស់គេ​តែ​មួយគត់គឺមិនចង់ឲ្យគណបក្សផ្សេងចូលមកដឹកនាំរដ្ឋាភិបាលនោះឡើយ ហើយគេក៏មិនខ្ចី​ខ្វល់ការរិះគន់នានា ពីគ្រប់មជ្ឈដ្ឋាន និងការរីកចំរើនរបស់ជាតិផងដែរ ។

កត្តាទាំងនេះហើយ ទើបធ្វើឲ្យប្រជាពលរដ្ឋខ្មែរ ពួកគាត់ចង់ឲ្យមានការផ្លាស់ប្តូរ ដើម្បីទទួល បានមេដឹកនាំមួយដែលស្អាតស្អំ រៀបចំប្រទេសជាតិឲ្យមានភាពល្អប្រសើរ ឲ្យពលរដ្ឋរស់នៅ​ក្នុងភាពកក់ក្តៅ ជាប្រទេសដែលកាន់លទ្ធិប្រជាធិបតេយ្យពិតប្រាកដ និងគោរពសិទ្ធិរបស់ ពល​រដ្ឋដែលជាម្ចាស់ឆ្នោត ដឹកនាំប្រទេសជាតិឲ្យមានការរីកចំរើន លើគ្រប់វិស័យជាដើម ។

ហេតុដូចនេះហើយ គេរំពឹងថាការធ្វើមហាបាតុកម្មអហិង្សារបស់គណបក្សសង្គ្រោះជាតិ និង​ប្រជាពលរដ្ឋខ្មែរស្នេហាជាតិ តាមរយៈការសមាធិ បួងសួង ដើម្បីសន្តិភាព និងអាចផ្លាប់ប្តូរអ្វី ដែលជាផលអវិជ្ជាមាន កើតឡើងជាផលវិជ្ជមាន ដើម្បីផ្តល់យុត្តិធម៌ដល់ប្រជាពលរដ្ឋដែលជា ម្ចាស់ឆ្នោត ។

សូមជំរាបជូនថា ការធ្វើមហាបាតុកម្មអហិង្សារបស់គណបក្សសង្គ្រោះជាតិ ប្រព្រឹត្តិទៅ​នៅ​ថ្ងៃទី០៧ កញ្ញា ដោយជួបជុំគ្នានៅទីលានប្រជាធិបតេយ្យចាប់ពីវេលាម៉ោង៨ព្រឹក និងបញ្ចប់ ទៅវិញនៅម៉ោង១១ថ្ងៃត្រង់ ៕