ឈើប្រណីតដែលខាងអង្គការការពារព្រៃឈើមួយប្រទះឃើញ
ដឹកចេញទៅវៀតណាម
ឈើគ្រញូងប្រមាណជា៣តោន ដែលគេអះអាងថាជារបស់មន្រ្តីអាវុធហត្ថខេត្តកំពង់ស្ពឺម្នាក់ ត្រូវអង្គការការពារធនធានធម្មជាតិស្រាវជ្រាវរកឃើញ នៅក្នុងដែនជម្រកសត្វឱរ៉ាល់ ពេលកំពុងដឹកចេញទៅលក់នៅប្រទេសវៀតណាម។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិមនុស្សក្នុងខេត្តកំពង់ស្ពឺ និងបុគ្គលិក២នាក់បាននិងកំពុងតែចុះធ្វើការស៊ើបអង្កេតករណីកាប់ ឈើខុសច្បាប់ក្នុងដែនជម្រកសត្វព្រៃភ្នំឱរ៉ាល់ ក្នុងស្រុកឱរ៉ាល់ ចាប់តាំងពីថ្ងៃទី២១ខែសីហាកន្លងមក ហើយកាលពីថ្ងៃទី១ ខែកញ្ញានេះ បានរកឃើញឈើគ្រញូងប្រមាណជា៣តោនដឹកតាមគោយន្ត។
លោកបញ្ជាក់ ថា៖«វាជាឈើគ្រញូងដឹកតាមគោយន្តទៅដាក់ឡានស៊េរីទំនើបៗ បន្តដឹកទៅប្រទេសវៀតណាម។ អ្នកដឹកប្រាប់ថា ឈើនេះជារបស់មន្រ្តីប៉េអឹមខេត្តម្នាក់»។
លោកបន្តថា ក្រៅពីនោះប្រជាពលរដ្ឋរាប់រយនាក់បាននិងកំពុងចូលក្នុងដែនជម្រក សត្វព្រៃភ្នំឱរ៉ាល់ ដែលការពារដោយព្រះរាជក្រឹត្យនោះ ដើម្បីទៅរកឈើគ្រញូងខ្លះទៀតបានកាប់រានដីព្រៃការពារនោះយកទៅ លក់ឲ្យពួកឈ្មួញ ដោយអនាធិបតេយ្យគ្មានការទប់ស្កាត់ពីអាជ្ញាធរនោះទេ។
លោក ជា ហ៊ាន ប្រាប់ដែរថា បន្ទាប់ពីប្រទះឃើញឈើប្រណីតទាំងនោះ លោកបានរាយការណ៍ជូនអភិបាលស្រុក និងមន្ទីរបរិស្ថានខេត្តដើម្បីសុំអន្តរាគមន៍។ ប៉ុន្តែអាជ្ញាធរមានសមត្ថកិច្ចបានចាប់យកតែមួយភាគតូចតែប៉ុណ្ណោះ។
លោកបានអះអាងថា ៖ «ខ្ញុំរាយការណ៍ ទៅទើបគេចាប់តែគ្រញូងបន្តិចប៉ុណ្ណោះ គឺគ្រាន់ជាលេស ព្រោះមានការឃុបឃិតគ្នារកស៊ីរវាងឈ្មួញនិងមន្រ្តីពាក់ព័ន្ធនៅទីនោះ បើមិនអ៊ីចឹងមិនមែនបទល្មើសកើតឡើងបែបនេះហើយគ្មានការបង្រ្កាប នោះទេ»។ លោកបញ្ជាក់ថា មន្ត្រីពាក់ព័ន្ធ គ្មានឆន្ទៈពិតប្រាកដ ដើម្បីការពារផលប្រយោជន៍ជាតិនោះទេ តែថែមទាំងបានស្តីបន្ទោសលោកទៀត នៅពេលដែលលោកធ្វើសេចក្តីរាយការណ៍សុំកិច្ចអន្តរាគមន៍។
ទាក់ទង ទៅនឹងបញ្ហានេះ លោកនៅ ណាក់ អនុប្រធានមន្ទីរបរិស្ថានខេត្តកំពង់ស្ពឺបានឲ្យដឹងថា លោកបានទទួលព័ត៌មានពីបទល្មើសនោះហើយ ហើយលោកក៏បានអន្តរាគមន៍រាយការណ៍ទៅប្រធានដែនជម្រកសត្វព្រៃភ្នំឱរ៉ាល់រួចហើយដែរ។
លោក នៅ ណាក់ បានបញ្ជាក់ថា៖«ខ្ញុំបានធ្វើអន្តរាគមន៍ ហើយមន្ត្រីដែនជម្រកបានចាប់ឈើបានប្រហែលបីតោន»។
ជុំវិញ បទល្មើសព្រៃឈើក្នុងដែនជម្រកនេះ លោកនួន បូរិន ប្រធានគម្រោងអង្គការជីវិត ថ្លៃថ្នូរដែលជួយសហគមន៍ក្នុងការបង្កើត និងការពារព្រៃឈើបានមានប្រសាសន៍ថា ការកាប់និងដឹកជញ្ជូនអនុផលព្រៃឈើ វាក្លាយជារឿងធម្មតាទៅហើយនៅក្នុងតំបន់នេះ។
លោក នួន បូរិន បានបញ្ជាក់ដែរថា៖«ការ កាប់ឈើកើតមានជាយូរមកហើយ ប៉ុន្តែការទប់ស្កាត់មានតិចតួចណាស់»។
ភ្នំពេញ ប៉ុស្តិ៍ មិនអាចទាក់ទងមន្រ្តីដែនជម្រកសត្វព្រៃឱរ៉ាល់ ដើម្បីសុំការបំភ្លឺបានទេ កាលពីម្សិលមិញ។
ទោះ យ៉ាងណាលោក ចែម សារីម អភិបាលស្រុកឪរ៉ាល់បានប្រាប់ថា អនុផលព្រៃឈើទាំងនោះ ភាគច្រើនគឺមកពីតំបន់ដីសម្បទានសេដ្ឋកិច្ចដែលរដ្ឋាភិបាលផ្តល់ឲ្យក្រុមហ៊ុន។
លោក ជា ហ៊ាន និងក្រុមការងារលោកបានអះអាង នឹងបញ្ចប់ការស៊ីបអង្កេតបទល្មើសព្រៃឈើនៅថ្ងៃពុធនេះ ហើយនឹងធ្វើរបាយការណ៍អំពីលទ្ធផលអង្កេត ដាក់ជូនទៅតំណាងអង្គការសហប្រជាជាតិប្រចាំកម្ពុជានៅពេលឆាប់ៗ នេះផងដែរ។
លោក ជា ហ៊ាន ជាសកម្មជនការពារធនធានធម្មជាតិម្នាក់ដែលធ្លាប់ជាប់ឃុំជាច្រើន ឆ្នាំ ដោយសារតែលោកប្តឹងមន្រ្តីដែនជម្រកសត្វព្រៃនិងមន្ត្រីអាជ្ញាធរ ជាង២០០នាក់ពីការកាប់បំផ្លាញព្រៃឈើនៅក្នុងស្រុកឱរ៉ាល់៕
No comments:
Post a Comment
yes