ព្រះមហាក្សត្រព្រះបាទសម្ដេចព្រះបរមនាថ នរោត្តម សីហមុនី ថតរូបជាមួយ
អ្នកតំណាងរាស្ត្រគណបក្សប្រជាជនកម្ពុជា នៅខាងមុខអគាររដ្ឋសភា
ក្នុងរាជធានីភ្នំពេញ កាលពីព្រឹកថ្ងៃ២៣ កញ្ញា ២០១៣
រដ្ឋសភាកាលពីថ្ងៃអង្គារ ទី២៤ ខែកញ្ញា បានអនុម័តសមាសភាពរបស់រដ្ឋាភិបាលថ្មីសម្រាប់នីតិកាលទី៥។ លោក ហ៊ុន សែន ជានាយករដ្ឋមន្ត្រី បានរៀបចំសមាសភាពគណៈរដ្ឋមន្ត្រីដោយបានផ្លាស់ប្ដូររដ្ឋមន្ត្រីមួយចំនួន ប៉ុន្តែបានរក្សាទុករដ្ឋមន្ត្រី និងរដ្ឋលេខាធិការមួយចំនួននៅតំណែងដដែល។
មន្ត្រីអង្គការសង្គមស៊ីវិលចាត់ទុកថា គណៈរដ្ឋមន្ត្រីរដ្ឋាភិបាលនីតិកាលទី៥ សុទ្ធតែជាមន្ត្រីចាស់ជរា មិនអាចធ្វើឲ្យចម្រើនឡើងដល់លទ្ធិប្រជាធិបតេយ្យ និងការគោរពសិទ្ធិមនុស្សនៅក្នុងប្រទេសឡើយ។
លោក ហ៊ុន សែន បានបង្ហាញបញ្ជីរាយនាមសមាសភាព និងគោលនយោបាយរដ្ឋាភិបាលសម្រាប់នីតិកាលទី៥ ដោយអះអាងថា រដ្ឋាភិបាលនឹងផ្ដោតលើការយកចិត្តទុកដាក់ធ្វើកំណែទម្រង់ស៊ីជម្រៅ។
លោក ហ៊ុន សែន ក្រោយពេលរដ្ឋសភាអនុម័តផ្តល់សេចក្តីទុកចិត្តជានាយករដ្ឋមន្ត្រីអាណត្តិថ្មីនេះមក បានប្ដេជ្ញាចំពោះមុខសមាជិកសភាទាំង ៦៨រូប មកពីគណបក្សប្រជាជនកម្ពុជា ថា លោកនឹងដឹកនាំរដ្ឋាភិបាលដោយពន្លឿនការអភិវឌ្ឍប្រទេសឲ្យបានឆាប់រហ័ស។
លោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា និងប្រធានគណៈកម្មការសេដ្ឋកិច្ច ហិរញ្ញវត្ថុ ដែលសភាទើបអនុម័ត មានប្រសាសន៍ថា បញ្ជីសមាសភាពរដ្ឋាភិបាលថ្មី គឺតាក់តែងដោយ លោក ហ៊ុន សែន ផ្ទាល់ដៃ ក្រោយពេលព្រះមហាក្សត្រទ្រង់តែងតាំងលោកជានាយករដ្ឋមន្ត្រី។ លោក ជាម យៀប បន្តថា រដ្ឋាភិបាលថ្មីនឹងជំរុញឲ្យមន្ត្រីរដ្ឋាភិបាលទាំងអស់ ត្រូវធ្វើការងារដោយតម្លាភាព ដោយសហការនឹងសមាជិករដ្ឋសភាដើម្បីបម្រើរាស្ត្រ។
បញ្ជីសមាសភាពរដ្ឋាភិបាលថ្មី ដែលបានផ្សព្វផ្សាយជាសាធារណៈ បង្ហាញថា សមាជិករដ្ឋាភិបាលថ្មីជាមន្ត្រីរដ្ឋាភិបាលមកពីគណបក្សប្រជាជនកម្ពុជា ដដែល។ មន្ត្រីទាំងនោះ ខ្លះបានកាន់កាប់អំណាចចាប់តាំងពីឆ្នាំ១៩៩៣ និងឆ្នាំ១៩៩៨ បើទោះបីជាមានការផ្លាស់ប្ដូរតួនាទីរដ្ឋមន្ត្រីមួយចំនួនក៏ដោយ។ រដ្ឋមន្ត្រីដែលត្រូវផ្លាស់ប្ដូរ និងផ្ទេរតំណែងរួមមាន ក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម ក្រសួងឧស្សាហកម្ម រ៉ែ និងថាមពល ក្រសួងអប់រំ យុវជន និងកីឡា ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងបរិស្ថាន ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ក្រសួងប្រៃសណីយ៍ និងទូរគមនាគមន៍ ក្រសួងវប្បធម៌ និងវិចិត្រសិល្បៈ ក្រសួងការងារ និងបណ្ដុះបណ្ដាលវិជ្ជាជីវៈ។
ចំណែករដ្ឋមន្ត្រីនៅបន្តតំណែងពីនីតិកាលទី៤ រួមមាន ទីស្ដីការគណៈរដ្ឋមន្ត្រី ក្រសួងមហាផ្ទៃ ក្រសួងការពារជាតិ ក្រសួងការបរទេស និងសហប្រតិបត្តិការអន្តរជាតិ ក្រសួងអភិវឌ្ឍន៍ជនបទ ក្រសួងផែនការ ក្រសួងរៀបចំដែនដី នគរូបនីយកម្ម និងសំណង់ ក្រសួងធនធានទឹក និងឧតុនិយម ក្រសួងព័ត៌មាន ក្រសួងយុត្តិធម៌ ក្រសួងសុខាភិបាល ក្រសួងសាធារណការ និងដឹកជញ្ជូន ក្រសួងទេសចរណ៍ ក្រសួងធម្មការ និងសាសនា ហើយនិងក្រសួងកិច្ចការនារី។
នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) លោក ប្រែដ អាដាម (Brad Adams) មានប្រសាសន៍ថា សមាសភាពរដ្ឋាភិបាលថ្មីគ្មានឈាមថ្មីឡើយ ហើយសមាសភាពនេះនឹងមិនអាចជំរុញឲ្យលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា រីកចម្រើននោះទេ។ លោកបន្តថា ថ្នាក់ដឹកនាំរដ្ឋាភិបាលមួយចំនួនបានជាប់ពាក់ព័ន្ធទៅនឹងអំពើនិទ្ទណ្ឌភាព ដែលមិនទាន់ត្រូវបានផ្ដន្ទាទោសនៅឡើយ។
លោក ប្រែដ អាដាម បន្តថា ប្រសិនបើរដ្ឋាភិបាលចង់ធ្វើកំណែទម្រង់ពិតប្រាកដមែននោះ គឺត្រូវធ្វើយ៉ាងណាដោះស្រាយបញ្ហាជាប់គាំងនយោបាយ ធ្វើឲ្យការបោះឆ្នោតទទួលបានភាពជឿជាក់ និងប្ដេជ្ញាធ្វើកំណែទម្រង់ពិតប្រាកដ ជាជាងការសន្យាតែនៅលើក្រដាស ប៉ុន្តែគ្មានន័យទាល់តែសោះ។ លោកបន្តថា បញ្ហាសំខាន់ៗដែលត្រូវដោះស្រាយជាបន្ទាន់នោះ គឺការផ្លាស់ប្ដូរសមាសភាពគណៈកម្មាធិការជាតិរៀបចំការបោះឆ្នោត និងកែទម្រង់ប្រព័ន្ធយុត្តិធម៌ មន្ត្រីរាជការ និងយោធា ឲ្យមានភាពឯករាជ្យ។
ចំណែកអ្នកវិភាគឯករាជ្យ លោកបណ្ឌិត ឡៅ ម៉ុងហៃ ក៏រិះគន់រដ្ឋាភិបាលនីតិកាលទី៤ ថា នៅមិនទាន់អនុវត្តគោលនយោបាយកន្លងមកបានទាំងស្រុងនៅឡើយទេ ហើយថែមទាំងនៅមិនទាន់បានគោរពរដ្ឋធម្មនុញ្ញឲ្យបានពេញលេញនៅឡើយដែរ។ លោកបន្តថា រដ្ឋាភិបាលគោរពរដ្ឋធម្មនុញ្ញតែសំបកក្រៅតែប៉ុណ្ណោះ។ លោកបណ្ឌិត ឡៅ ម៉ុងហៃ បន្ថែមទៀតថា លោក ហ៊ុន សែន មិនបានគោរពតួនាទីជានាយករដ្ឋមន្ត្រី ទទួលខុសត្រូវនៅចំពោះមុខរដ្ឋសភាឡើយ។
No comments:
Post a Comment
yes