អ្នកភូមិបឹងកក់និងបុរីកីឡាប៉ះទង្គិចគ្នាជាថ្មីទៀតជាមួយសន្តិសុខ
ខណ្ឌដូនពេញកាលពីម្សិលមិញ
ប្រជាពលរដ្ឋនៅតំបន់ បឹងកក់ និង បុរីកីឡា ជាង ៦០នាក់ បានប៉ះទង្គិចគ្នាជាថ្មីទៀត ជាមួយនឹងកម្លាំងសន្តិសុខខណ្ឌ ដូនពេញ កាលពីម្សិលមិញ នៅខណៈដែលពួកគេបានព្យាយាមទម្លុះរបាំងបន្លាលួសចូលទៅកាន់សាលាខណ្ឌដើម្បីសុំយកម៉ូតូ និងបានស្រែកចោទប្រកាន់ស្រ្តីជាមន្ត្រីខណ្ឌម្នាក់ថា បានប៉ុងប៉ងសម្លាប់ពួកគាត់ក្នុងព្រឹត្តិការណ៍ហិង្សាកាលពីយប់ ថ្ងៃអាទិត្យ។
កាលពីយប់ថ្ងៃអាទិត្យពលរដ្ឋ បឹងកក់ និង បុរីកីឡា បានធ្វើកូដកម្មបង្អត់អាហារនៅវត្តភ្នំដើម្បីសុំយុត្តិធម៌ និងសន្តិភាព ក្រោយការបោះឆ្នោតដែលមានភាពមិនប្រក្រតី ប៉ុន្តែត្រូវបានកម្លាំងសមត្ថកិច្ច អាវុធហត្ថ និងសមត្ថកិច្ចស្លៀកពាក់ស៊ីវិលធ្វើការបង្រ្កាបដោយប្រើ ចម្ពាមកៅស៊ូ បាញ់គ្រាប់ឃ្លី និងដំបងឆក់ បណ្តាលឲ្យរបួសធ្ងន់ និងស្រាលជាង ១០ នាក់ ហើយបានយកម៉ូតូកង់បីរបស់ពួកគាត់ពីរគ្រឿង នាឡិកាដៃ ទូរស័ព្ទ រួមទាំងម៉ូតូរបស់អ្នកកាសែត និងអង្គការសង្គមស៊ីវិលផងដែរ។
កាល ពីម៉ោងជាង ៨ព្រឹក ថ្ងៃម្សិលមិញ ពលរដ្ឋ បានជួបជុំគ្នានៅក្បែរសាលាខណ្ឌ ដូនពេញ ស្រែកទាមទារឲ្យអាជ្ញាធរខណ្ឌប្រគល់សម្ភារទំាងនោះមកវិញ ហើយបានចែកសេក្តីថ្លែងការណ៍ថ្កោលទោស និងរូបថតស្នាមរបួសដ៏រន្ធត់ពីការវាយប្រហារនោះ។ អាជ្ញាធរខណ្ឌមិនត្រឹមតែមិនចេញមកដោះស្រាយទេ តែថែមទាំងបានប្រើកម្លាំងសន្តិសុខ និងបន្លាលួសបិទផ្លូវសងខាងខណ្ឌ មិនឲ្យពលរដ្ឋចូលទៀតផង។ ប្រជាពលរដ្ឋមានកំហឹងកាន់តែខ្លាំង ហើយនាំគ្នាព្យាយាមអូសទាញទម្លុះរបាំងបន្លាលួស រហូតធ្វើឲ្យកម្លាំងសន្តិសុខម្នាក់ទ្រាំមិនបាន វាយទៅលើពលរដ្ឋ ហើយរត់ចូលទៅក្នុងទីស្នាក់ការខណ្ឌបាត់។ នៅវេលាម៉ោង ៩ កន្លះ កម្លាំងសន្តិសុខទប់មិនឈ្នះ ហើយពលរដ្ឋក៏បានទម្លាយរបាំងបន្លាលួសចូលបានសម្រេច ប៉ុន្តែស្រាប់តែ កងម្លាំងនគរបាលជាង ៥០ នាក់ប្រដាប់ដោយខែល ដំបង និងកាំភ្លើងបាញ់គ្រាប់ផ្សែងបង្ហូរទឹកភ្នែកមួយចំនួនបានមកដល់ និងព្យាយាមសម្រុះសម្រួល ដោយនាំតំណាងពលរដ្ឋចំនួនបីនាក់ រួមនឹងលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធចូល ទៅជួបរកដំណោះស្រាយជាមួយនឹងអាជ្ញាធរខណ្ឌ។
ពលរដ្ឋតវ៉ាដែលនៅខាងក្រៅវិញ បានស្រែករកយុត្តិធម៌ ឲ្យនាំជនប្រើហិង្សាទៅកាត់ទោស ហើយបានចាត់ទុកថា ការយកម៉ូតូកង់បីនោះជាអំពើប្លន់។
ស្រ្តី បឹងកក់ ឈ្មោះ បាសុង ស្រីលាភ អាយុ ២៧ ឆ្នាំឈរលើករូបថតស្នាមរបួស បង្ហាញដល់ក្រុមអ្នកសារព័ត៌មានដោយទ្រហោយំថា៖ «អ្នករបួសធ្ងន់អាយុ ជាង ៦០ ទៅ ៧០ឆ្នាំ បីថ្ងៃហើយកាន់តែដុនដាបខ្លាំងឡើងដោយសារគ្រាប់ ឃ្លី ដំបងឆក់ បំពង់ទីបដែលសមត្ថកិច្ចបាញ់និងវាយ។ នេះជាចេតនាសម្លាប់ពួកខ្ញុំ។ មានអាណិតខ្មែរអត់? វាជាសិទ្ធិខ្ញុំដើម្បីតវ៉ា។ ម៉េចក៏អាក្រក់ខ្លាំងម៉្លេះលទ្ធិប្រធិបតេយ្យនៅខ្មែរដើម្បី តែបក្ខពួក អំណាច លុយកាក់ សុខចិត្តមកសម្លាប់រាស្រ្តឯង»។
ប្រមាណជា មួយ ម៉ោងក្រោយមក កិច្ចប្រជុំរកដំណោះស្រាយបានបញ្ចប់ ដោយអាជ្ញាធរព្រមប្រគល់ម៉ូតូកង់បី និងម៉ូតូទាំងនោះឲ្យពលរដ្ឋវិញ។
លោក វន់ ពៅ ដែលត្រូវបានគេ វាយបែកកញ្ចក់ឡាន និងដេញវាយក្នុងព្រឹត្តិការណ៍ហិង្សាថ្ងៃអាទិត្យនោះបានមានប្រសាសន៍ថា ការចរចាគ្នា បានសម្រេចប្រគល់សម្ភារមកវិញ ចំណែកឯករណីហិង្សាវិញ ពួកគាត់នឹងប្តឹងទៅតុលាការ។ លោក វន់ ពៅ ចោទប្រកាន់ថា ស្រ្តីឈ្មោះ ពេជ្រ សុជាតា [ជាសមាជិកក្រុមប្រឹក្សាខណ្ឌ ដូនពេញ] ជាអ្នកដេញវាយ នឹងគប់ឡានលោកបែកកញ្ចក់។
លោកបន្តថា៖ «យើងមិនឲ្យនារីបីសាច ដ៏ឃោរឃៅ ធ្វើបាបគេបែបហ្នឹងរួចខ្លួនទេ។ យើងនឹងប្តឹងទៅតុលាការ។ ជាទម្លាប់អាក្រក់ កុំឲ្យធ្វើបាបគេទៀត។ បើកុំតែខ្ញុំនិង ទេព វន្នី រត់រួចឡើងឡានទាន់កុំអីគេវ៉ៃពួកខ្ញុំស្លាប់ហើយ។ គេស្រែកថា សម្លាប់អាពីរនាក់ហ្នឹងឲ្យបាន»។ លោក វន់ ពៅ នឹងដាក់ពាក្យបណ្តឹងប្តឹង អ្នកស្រី ពេជ្រ សុជាតា នៅចុងខែនេះ។
លោក គឹម វុត្ថា ប្រធានសណ្តាប់ធ្នាប់ខណ្ឌ ដូនពេញ បានអះអាងថា លោកបានឃើញម៉ូតូទាំងនោះទុកចោលនៅតាមទីសាធារណៈ ហើយលោកក៏បានយកទៅរក្សាទុកឲ្យ។ លោកបានថ្លែងដូច្នេះថា៖ «យើងមិនលួចនោះទេ។ ក្រោយពីកើតហេតុ ពួកគាត់ទុកចោល។ យើងក៏យកមកទុក»។ លោកបន្តថា ចំពោះការបង្ករបួសស្នាមវិញ លោកមិនបានដឹងនោះទេ។
ទោះយ៉ាងណា លោក វន់ ពៅ និងស្រ្តីជាជនរងគ្រោះពីអំពើហិង្សាឈ្មោះ ម៉ៅ សុខា អាយុ ៦០ ឆ្នាំ បានអះអាងថា វាមិនមែនជាការយកម៉ូតូទៅទុកឲ្យនោះទេ គឺវាដូចជាអំពើប្លន់តែម្តង ព្រោះពេលនោះគេបិទភ្លើងអស់ហើយវាយយករបស់របរតែម្តង។ អាជ្ញាធរត្រូវតែទទួលខុសត្រូវលើករណីហិង្សានេះ។
អ្នកស្រី ម៉ៅ សុខា បញ្ជាក់ថា៖ «ខ្ញុំអូសម៉ូតូនោះបានប្រហែល ១០ ម៉ែត្រ ស្រាប់តែកម្លាំងប៉ូលិស ប៉េអឹម និងក្មេងស្ទាវៗមកទាញ វ៉ៃខ្ញុំនឹងដំបងពេញខ្លួន និងធ្ងន់ធ្ងរស្ទើរបាក់ភ្លៅ»។
តំណាង ពលរដ្ឋបឹងកក់ អ្នកស្រី ទេព វន្នី បានឲ្យដឹងថា ពលរដ្ឋនឹងបន្តដាក់ញត្តិ និងពាក្យបណ្តឹងទៅស្ថាប័នអន្តរជាតិនានា និងតុលាការ ដើម្បីទាមទារឲ្យនាំយកជនប្រព្រឹត្ត និងអ្នកនៅពីក្រោយខ្នងទៅទទួលទោស បន្ទាប់ពីបានដាក់ញត្តិទៅទូតអាមេរិកកាលពីថ្ងៃចន្ទម្សិលម៉្ងៃ។
អ្នកស្រី ទេព វន្នី បានបញ្ជាក់ឲ្យដឹងទៀតថា៖ «ក្រុមចម្រុះ ជនស៊ីវិល និងស្រ្តីឈ្មោះ ពេជ្រ សុជាតា ហ្នឹងមានចិត្តពុះកញ្ជ្រោលមែនទែនគឺប៉ុនប៉ងធ្វើឃាតយើង។ សូមកុំប្រកែក បើគ្មានការឃុបឃិតគ្នាទេ វាមិនអាចប្រើហិង្សាលើពួកខ្ញុំកើតនោះទេ»។
មិនអាចទាក់ទងអ្នកស្រី ពេជ្រ សុជាតា ដើម្បីសុំការបំភ្លឺបានទេកាលពីម្សិលមិញ ដោយទូរស័ព្ទរបស់អ្នកស្រីបានបិទ។ លោក ហែម អាន ប្រធានក្រុមប្រឹក្សាខណ្ឌ ដូនពេញ បានថ្លែងថា លោកមិនបានដឹង ពីរឿងអ្វីដែលបានកើតឡើងនោះទេ។
លោក សុខ ពេញវុធ អភិបាលរងខណ្ឌ ដូនពេញ និងលោក ឡុង ឌីម៉ង់ អ្នកនាំពាក្យសាលាក្រុង ភ្នំពេញ បានថ្លែងថា ជាប់ប្រជុំ មិនអាចធ្វើអធិប្បាយបានទេកាលពីម្សិលមិញ។
កាលពីថ្ងៃចន្ទ គណៈកម្មាធិការប្រព្រឹត្តកម្ម ក្រុមការងារពិសេសសិទ្ធិលំនៅឋាន និងគណៈកម្មាធិការ ខុម ហ្វ្រែល បានចេញសេចក្តីថ្លែងការណ៍រួមមួយដោយបានធ្វើការថ្កោលទោស ចំពោះទង្វើរបស់កងកម្លាំងចម្រុះរាជធានីភ្នំពេញ ដែលប្រដាប់ដោយសម្ភារសម្រាប់ប្រើអំពើហិង្សាផ្សេងៗដែលបាននាំ ជនអនាថាមួយក្រុម ទៅវាយប្រហារអ្នកភូមិ បឹងកក់ និង បុរីកីឡា ដែលកំពុងធ្វើកូដកម្មអត់អាហារនៅ វត្តភ្នំ កាលពីយប់ថ្ងៃអាទិត្យ។ សេចក្តីថ្លែងការណ៍បានចាត់ទុកការវាយប្រហារដែលបង្កឲ្យប្រជាពលរដ្ឋរងរបួសយ៉ាងធ្ងន់ធ្ងរនោះថា «ជាការរំលោភសិទ្ធិមនុស្សដ៏ធ្ងន់ធ្ងរដែលរដ្ឋាភិបាលកម្ពុជាគួរតែ ធ្វើការផ្តន្ទាទោសដល់ជនដែលបានប្រព្រឹត្ត»៕
No comments:
Post a Comment
yes