នគរបាលហាត់ពង្រាយបន្លាលួសដើម្បីការពារសន្តិសុខ នៅតំបន់កោះពេជ្រ
កាលពីព្រឹកថ្ងៃទី១ កញ្ញា ឆ្នាំ២០១៣
រដ្ឋាភិបាលបានកែនកម្លាំងប្រដាប់អាវុធគ្រប់ប្រភេទមករាជធានីភ្នំពេញ ជាបន្តបន្ទាប់ ក្រោយពីការបោះឆ្នោតនៅថ្ងៃទី២៨ កក្កដា កន្លងមក។ អ្វីដែលគួរឲ្យកត់សម្គាល់នោះ គឺខាងគណបក្សសង្គ្រោះជាតិ អះអាងថា ខ្លួនឈ្នះឆ្នោត ហើយចោទថា គណៈកម្មាធិការជាតិរៀបចំការបោះឆ្នោត (គ.ជ.ប) ថាមិនឯករាជ្យ និងមានភាពមិនប្រក្រតីជាច្រើនកើតឡើងក្នុងពេលបោះឆ្នោត។
ដោយសារតែហេតុផលនយោបាយ ហើយគណបក្សសង្គ្រោះជាតិ ប្រកាសធ្វើបាតុកម្មប្រឆាំងលទ្ធផលបោះឆ្នោតជាញឹកញាប់នោះ រដ្ឋាភិបាលបានប្រមែប្រមូលកងកម្លាំងកាន់តែច្រើន ក្រោមហេតុផលថា ដើម្បីរក្សាសណ្ដាប់ធ្នាប់ និងសន្តិសុខសង្គម។
តើកងកម្លាំងគ្រប់ប្រភេទឡើងមកកាន់ទីក្រុងភ្នំពេញ និងធ្វើការចល័តទ័ពនោះ ដើម្បីត្រៀមបង្ក្រាបក្រុមបាតុករ ឬយ៉ាងណា?
ការចល័តកងទ័ពនៅរាជធានីភ្នំពេញ នៅក្រោយពេលបោះឆ្នោតនេះ បានកើតមានជាហូរហែ ដែលមើលពីរូបភាពពីខាងក្រៅឃើញថា កងកម្លាំងប្រដាប់អាវុធទាំងនោះហាក់បីដូចជាត្រៀមបង្ក្រាបក្រុមបាតុករ ដែលធ្វើឡើងដោយគណបក្សសង្គ្រោះជាតិ ប្រសិនបើគណបក្សនេះធ្វើមហាបាតុកម្មធំមែននោះ។
នៅក្រោយពេលបោះឆ្នោតភ្លាម គណបក្សសង្គ្រោះជាតិ បានប្រកាសធ្វើមហាបាតុកម្ម ក៏ប៉ុន្តែការប្រកាសនេះ ហាក់នៅក្នុងភាពស្រពិចស្រពិលនៅឡើយ។ ការធ្វើមហាបាតុកម្មនេះ បានលេចចេញជារូបរាងឡើង កាលពីថ្ងៃទី២៦ សីហា ទាំងមេដឹកនាំគណបក្សសង្គ្រោះជាតិ ទាំងប្រជាពលរដ្ឋម្ចាស់ឆ្នោត នៅក្នុងពិធីជួបជុំគ្នាដែលមានមនុស្សរាប់ម៉ឺននាក់ចូលរួមនៅទីលានប្រជាធិបតេយ្យ បានប្រកាសកាន់តែច្បាស់ថា គណបក្សនេះនឹងរៀបចំធ្វើមហាបាតុកម្មដ៏ធំមួយនៅមុន គ.ជ.ប ប្រកាសលទ្ធផលបោះឆ្នោតជាផ្លូវការ នៅថ្ងៃទី៧ កញ្ញា ប្រសិនបើរដ្ឋាភិបាល គ.ជ.ប និងក្រុមប្រឹក្សាធម្មនុញ្ញ មិនអនុញ្ញាតបង្កើតគណៈកម្មការឯករាជ្យត្រួតពិនិត្យលទ្ធផលបោះឆ្នោតទេនោះ។
ក៏ប៉ុន្តែ ដោយសារឃើញថា រដ្ឋាភិបាលបានបញ្ចេញកងកម្លាំងប្រដាប់អាវុធ និងមានយន្តហោះ យោធាហោះក្រឡឹងនៅរាជធានីភ្នំពេញ និងកងកម្លាំងប្រដាប់អាវុធ ធ្វើការហ្វឹកហាត់នៅកោះពេជ្រ កាលពីថ្ងៃទី១ កញ្ញា ដើម្បីត្រៀមរក្សាសន្តិសុខ និងសុវត្ថិភាពនោះ នៅព្រឹកថ្ងៃទី២ កញ្ញា មេដឹកនាំគណបក្សសង្គ្រោះជាតិ បានធ្វើសន្និសីទកាសែត ប្រកាសថា គណបក្សសង្គ្រោះជាតិ នឹងធ្វើមហាបាតុកម្មអហិង្សា និងបន្ថែមនូវការស្មិងស្មាធិ៍ ដើម្បីសន្តិភាព ហើយការធ្វើបាតុកម្មនេះទៀត ធ្វើនៅទូទាំងប្រទេសនៅតាមតំបន់នីមួយៗ។
ក្រៅពីរដ្ឋាភិបាលប្រមូលកងកម្លាំងប្រដាប់អាវុធ មាន នគរបាល ទាហាន និងកងរាជអាវុធហត្ថនោះ រដ្ឋាភិបាលក៏បានប្រមូលរថក្រោះ រថពាសដែក យកមករក្សាទុកក្នុងរាជធានីភ្នំពេញ ដែរ។ ការបង្ហាញកងកម្លាំងបែបនេះ ធ្វើឲ្យប្រជាពលរដ្ឋមានការភ័យខ្លាចអំពីបញ្ហាអស្ថិរភាពនយោបាយកើតឡើង។ តែប្រជាពលរដ្ឋមួយចំនួនទៀត មិនមានការតក់ស្លុតចំពោះការបញ្ចេញសកម្មភាពកងកម្លាំងប្រដាប់អាវុធនេះទេ។
ក៏ប៉ុន្តែ បញ្ហាជាក់ស្ដែងដែលរដ្ឋាភិបាលបានបញ្ចេញកងកម្លាំងនៅពេលនេះ មើលទៅហាក់មិនមែនជាការត្រៀមបង្ក្រាបទៅលើហ្វូងបាតុកម្មនោះទេ ករណីនេះទាក់ទងនឹងហេតុផលនយោបាយដ៏ធំនៅពីក្រោយឆាកទៅវិញទេ។
ហេតុផលនយោបាយនៅពីក្រោយឆាកនោះ គឺកងកម្លាំងទាំងនោះអាចមិនប្រើអាវុធ ដើម្បីបាញ់រះទៅលើហ្វូងបាតុករទេ ពីព្រោះថា ក្រុមបាតុករទាំងនោះអាចជាបងប្អូនសាច់ញាតិរបស់ពួកគាត់ ឬអាចថា ពួកគាត់មួយចំនួនគាំទ្រគោលនយោបាយទាំង ៧ចំណុចរបស់គណបក្សសង្រ្គោះជាតិ ក៏ថាបាន ពីព្រោះថា អនុប្រធានគណបក្សសង្គ្រោះជាតិ លោក កឹម សុខា ធ្លាប់បានប្រកាសថា មេទាហានធំៗមួយចំនួន បានគាំទ្រគណបក្សសង្គ្រោះជាតិ ជាដើម។ ម្យ៉ាងទៀត គណបក្សប្រឆាំង និងប្រជាពលរដ្ឋម្ចាស់ឆ្នោតនោះ គ្មានអាវុធដើម្បីតទល់ទេ។
នៅលើសកលលោកគ្មានប្រទេសណាធ្វើសង្គ្រាមជាមួយប្រជាពលរដ្ឋខ្លួនឯង ដោយគ្មានអាវុធតដៃឡើយ។ ម្យ៉ាងទៀត យុទ្ធសាស្ត្រនយោបាយរបស់រដ្ឋាភិបាលនៅពេលនេះ តាមមើលទៅជាយុទ្ធសាស្ត្រ "វាយស្មៅបង្អើលពស់" ពោល គឺរដ្ឋាភិបាលបញ្ចេញកងកម្លាំង ដើម្បីឲ្យប្រជាពលរដ្ឋចង់ធ្វើបាតុកម្ម និងគណបក្សប្រឆាំងមានការស្ទាក់ស្ទើរចិត្តក្នុងការចូលរួម និងភ័យខ្លាច។
អ្វីដែលគួរឲ្យចាប់អារម្មណ៍ទៅនឹងការបញ្ចេញកងកម្លាំងរបស់រដ្ឋាភិបាលនៅពេលនេះ គឺរដ្ឋាភិបាលក្រោមការដឹកនាំប្រទេសរបស់ លោក ហ៊ុន សែន អស់រយៈពេលជាច្រើនឆ្នាំមកហើយនោះ មិនចង់ឲ្យជាប់ឈ្មោះនៅក្នុងប្រវត្តិសាស្ត្រថា ជាមេដឹកនាំសម្លាប់ជាតិសាសន៍ខ្លួនឯងនោះទេ ហើយ លោក ហ៊ុន សែន ក៏មិនចង់ជាប់ឈ្មោះថា ជាមេដឹកនាំអាក្រក់លើពិភពលោកដែរ។ ម្យ៉ាងទៀត បើសិនជាកងកម្លាំងប្រដាប់អាវុធទាំងនោះបំផ្ទុះអាវុធបង្ក្រាបទៅលើហ្វូងបាតុករនោះ ជៀសមិនផុតពីការចោទប្រកាន់នានាពីសហគមន៍ជាតិ និងអន្តរជាតិថា រដ្ឋាភិបាលជាអ្នកបញ្ជានោះឡើយ។
បញ្ហាទាំងនេះ បើពិនិត្យទៅកងកម្លាំងរបស់ជាតិស៊ីប្រាក់ខែពីប្រជាពលរដ្ឋនោះ អាចមិនបង្ក្រាបដោយអាវុធទៅលើប្រជាពលរដ្ឋដៃទទេទេ ដោយហេតុថា នេះមិនមែនជាសង្គ្រាមការពារបូរណភាពទឹកដីទេ។ ជាងនេះទៅទៀត រដ្ឋាភិបាលជាប់ចំណងដ៏ធំមួយទៀត ដែលមិនអាចឲ្យកងកម្លាំងរបស់ខ្លួនបំផ្ទុះអាវុធទៅលើក្រុមបាតុករបាននោះ គឺកម្ពុជា បានចូលជាសមាជិកនៃតុលាការព្រហ្មទណ្ឌអន្តរជាតិ អាយ.ស៊ី.ស៊ី (ICC) កាលពីឆ្នាំ២០០២ មក។ ហើយកាលណាកងកម្លាំងទាហានណាម្នាក់បានបំផ្ទុះអាវុធទៅលើក្រុមបាតុករ ជាការប្រព្រឹត្តិខុសច្បាប់ជាតិ និងច្បាប់អន្តរជាតិទៀតផង។
តុលាការព្រហ្មទណ្ឌអន្តរជាតិ ជាស្ថាប័នអចិន្ត្រៃយ៍ ហើយត្រូវមានអំណាចអនុវត្តយុត្តាធិការរបស់ខ្លួន លើជនទាំងឡាយដែលបានប្រព្រឹត្តបទល្មើសព្រហ្មទណ្ឌធ្ងន់ធ្ងរបំផុត ដែលជាការព្រួយបារម្ភរបស់អន្តរជាតិ។
មាត្រា៨ នៃច្បាប់លក្ខន្តិកៈទីក្រុងរ៉ូម ស្ដីពីតុលាការព្រហ្មទណ្ឌអន្តរជាតិ ចែងថា ការប្រើប្រាស់អាវុធកាំភ្លើងផ្លោង ព្រមទាំងឧបករណ៍ និងវិធីសាស្ត្រធ្វើសង្គ្រាមសឹកដែលមានលក្ខណៈបណ្ដាលឲ្យរងគ្រោះដ៏លើសលប់ ឬគ្រោះថ្នាក់ដែលមិនចាំបាច់ ឬដែលមិនរើសមុខជាប់នៅក្នុងច្បាប់អន្តរជាតិ ស្ដីពីជម្លោះប្រដាប់អាវុធ ដោយលក្ខខណ្ឌថា អាវុធ កាំភ្លើងផ្លោង ព្រមទាំងឧបករណ៍ និងវិធីសាស្ត្រធ្វើសង្គ្រាមសឹកនោះ គឺជាកម្មវត្ថុនៃការហាមឃាត់ដ៏ទូលំទូលាយ ដែលបានបញ្ចូលទៅក្នុងឧបសម្ពន្ធនៃច្បាប់លក្ខន្តិកៈទីក្រុងរ៉ូម។
ការគ្រោងធ្វើមហាបាតុកម្មរបស់គណបក្សសង្គ្រោះជាតិ នេះ គឺខុសពីនៅប្រទេសមជ្ឈិមបូព៌ា ដែលកំពុងធ្វើបាតុកម្មប្រឆាំងរដ្ឋាភិបាលបច្ចុប្បន្ន ដូចជានៅប្រទេសស៊ីរី (Syria) ជាដើម។ នៅប្រទេសស៊ីរី កងកម្លាំងរដ្ឋាភិបាលបង្ក្រាបទៅក្រុមប្រឆាំងរដ្ឋាភិបាលនោះ ដោយសារតែក្រុមប្រឆាំងនឹងរដ្ឋាភិបាលនោះមានអាវុធដូចគ្នា។ តែទោះជាយ៉ាងណា ការបាញ់ប្រហារនឹងធ្វើឲ្យជនស៊ីវិលស្លាប់រាប់ពាន់នាក់នោះ ជាទង្វើខុសច្បាប់អន្តរជាតិ។
ដោយឡែកនៅកម្ពុជា វិញ ការធ្វើមហាបាតុកម្មនេះ មិនមែនជារូបភាពប្រឆាំងនឹងរដ្ឋាភិបាលទេ ហើយក្រុមបាតុករក៏មិនមានអាវុធសម្រាប់តទល់ ឬប្រឆាំងនឹងរដ្ឋាភិបាលដែរ។ ការធ្វើបាតុកម្មនេះ មានលក្ខណៈខុសគ្នាស្រឡះ។ ប្រធានគណបក្សសង្គ្រោះជាតិ លោក សម រង្ស៊ី បានអះអាងថា ការធ្វើមហាបាតុកម្មនេះ ក្នុងគោលបំណងទាមទារឲ្យរដ្ឋាភិបាលបង្កើតគណៈកម្មការចម្រុះស៊ើបអង្កេតទៅលើលទ្ធផលបោះឆ្នោត ដែលជាការទាមទាររកយុត្តិធម៌ជូនប្រជាពលរដ្ឋជាម្ចាស់ឆ្នោតតែប៉ុណ្ណោះ។
ជាងនេះទៅទៀត ការបង្ហាញសាច់ដុំរបស់រដ្ឋាភិបាលក្នុងរយៈពេលថ្មីៗមកនេះ អាចថា ជាការគំរាមទៅដៃគូក៏ថាបាន ពោលគឺនៅពេលគណបក្សសង្គ្រោះជាតិ កំពុងតែបង្ហាញកម្លាំងសាកល្បងកន្លងមកនៅទីលានប្រជាធិបតេយ្យ ហើយសន្ទុះអ្នកគាំទ្រនៅតែពុះកញ្ជ្រោលចង់ធ្វើមហាបាតុកម្មនោះ ដើម្បីឲ្យគណបក្សនេះបន្ទន់ឥរិយាបថខ្លះ ដើម្បីងាយស្រួលក្នុងការចរចាឲ្យត្រូវរ៉ូវគ្នានៅដំណាក់កាលចុងក្រោយក៏ថាបាន ពីព្រោះថា តាមមើលទៅ គណបក្សទាំងពីរក៏មិនចង់ឲ្យមានការបង្ហូរឈាមគ្នា ឬការបែកបាក់រវាងខ្មែរ និងខ្មែរទេ ដោយប្រទេសកម្ពុជា មានមេរៀនប្រវត្តិសាស្ត្រអាក្រក់ជាច្រើន អំពីមេដឹកនាំខ្មែរបែកបាក់គ្នា តាមរយៈការធ្វើសង្គ្រាមបង្ហូរឈាមនេះ៕
No comments:
Post a Comment
yes