ពួកកំសាកញ៉ី
តាំងពីព្រឹកថ្ងៃទី៥ ខែកញ្ញា នេះ មានសមត្ថកិច្ចនគរបាលកម្លាំងកងរាជអាវុធហត្ថជាច្រើននាក់ ត្រូវចាត់តាំងឲ្យទៅប្រចាំការតាមចំណុចមួយចំនួនតាមដងផ្លូវជាតិសំខាន់ៗ ដែលតភ្ជាប់ពីតាមខេត្តនានា ចូលមករាជធានីភ្នំពេញ។
មន្ត្រីជាន់ខ្ពស់នៃកងរាជអាវុធហត្ថឲ្យដឹងថា កម្លាំងចម្រុះទាំងនោះមានភារៈឆែកឆេររកអាវុធដើម្បីការពារសុវត្ថិភាព នៅគ្រាដែលថ្ងៃធ្វើមហាបាតុកម្មរបស់គណបក្សប្រឆាំងខិតជិតមកដល់នៅថ្ងៃទី៧ ខែកញ្ញា។
កម្លាំងសមត្ថកិច្ចចម្រុះឆែកឆេររថយន្តដឹកអ្នកដំណើរគ្រប់ប្រភេទដែលផ្ទុកមនុស្សច្រើនចូលមករាជធានីភ្នំពេញ។ ការឆែកឆេរនេះធ្វើឡើងចំពេលដែលមានមន្ទិលសង្ស័យថា អាចជាយុទ្ធសាស្ត្រមួយរបស់រដ្ឋាភិបាលដើម្បីរារាំងមិនឲ្យពលរដ្ឋនៅតាមបណ្ដាខេត្តផ្សេងៗ ចូលរួមធ្វើមហាបាតុកម្មអហិង្សាដែលរៀបចំឡើងដោយគណបក្សប្រឆាំង។
ពលរដ្ឋម្នាក់សុំមិនបញ្ចេញឈ្មោះ ដែលឃើញហេតុការណ៍នេះ ឲ្យដឹងថា កម្លាំងនគរបាល និងកងរាជអាវុធហត្ថប្រមាណ ២០នាក់ ប្រដាប់ដោយអាវុធគ្រប់ដៃ ឈរឃ្លាំមើលរថយន្តដឹកអ្នកដំណើរគ្រប់ប្រភេទដែលធ្វើដំណើរតាមផ្លូវជាតិលេខ៣ ចូលមករាជធានីភ្នំពេញ ត្រង់ចំណុចផ្លូវកែងក្បែរវត្តស្លែង។
ប្រភពដដែលបញ្ជាក់ថា កម្លាំងចម្រុះទាំងនោះបានបញ្ជាឲ្យអ្នកដំណើរទាំងអស់ចុះពីរថយន្តបន្ទាប់មកឆែកឆេរក្នុងរថយន្តទាំងនោះ ឆែកឆេរទាំងកាបូបខោអាវរបស់អ្នកដំណើរ និងសួរនាំអ្នកដំណើរម្តងៗម្នាក់ ពីគោលដៅនិងបំណងដែលពួកគាត់ធ្វើដំណើរចូលរាជធានីភ្នំពេញ៖ «ឆែកហ្នឹងមិនមែនឆែកធម្មតាទេ គឺឆែកទាំងធុងទឹកកក ហើយរើឥវ៉ាន់ដែលមានវ៉ាលី គឺឆែកមើលទាំងអស់ ឆែកសព្វបែបយ៉ាង ហើយបានឲ្យចេញដំណើរទៅ។ អ៊ីចឹងសកម្មភាពហ្នឹង មើលទៅធ្វើខ្លាចបងប្អូនមកពីខាងឆ្ងាយៗមកចូលរួម អ៊ីចឹងធ្វើនេះធ្វើតឹងសម្បើមហើយប្លែក កម្លាំងដាក់មកច្រើនមានទែនប្លែកនៅផ្លូវបំបែក»។
ពលរដ្ឋរូបនោះបញ្ជាក់ថា កម្លាំងសមត្ថកិច្ចចម្រុះមិនបានប្រាប់ពីគោលបំណងដែលឆែកឆេរក្នុងរថយន្តទេ។ ប៉ុន្តែសកម្មភាពនេះ ត្រូវបានអ្នកធ្វើដំណើរគ្រប់គ្នាសង្ស័យថា ជាការឆែកឆេរនិងសួរនាំចង់ដឹងពីពលរដ្ឋដែលមានបំណងចង់ឡើងមកធ្វើមហាបាតុកម្ម។
មិនខុសគ្នាដែរ ពលរដ្ឋម្នាក់នៅរស់នៅម្ដុំព្រែកព្នៅ ឈ្មោះ ឈន់ ភឿន បញ្ជាក់ថា សមត្ថកិច្ចចម្រុះមាននគរបាល និងកងរាជអាវុធហត្ថប្រមាណ ២០នាក់ ក៏បានប្រចាំការឆែកឆេររថយន្តឈ្នួលនៅចំណុចក្រោមស្ពានព្រែកព្នៅ តាមបណ្ដាលផ្លូវជាតិលេខ៥។ ការឆែកឆេរនេះខុសប្លែកពីរាល់ដង ហើយរូបភាពស្រដៀងគ្នានឹងការឆែកឆេរនៅតាមបណ្ដោយផ្លូវជាតិលេខ៣ដែរ។
លោក ឈន់ ភឿន ជឿថា ការឆែកឆេររបស់កម្លាំងចម្រុះពេលនេះ មិនមែនជាការឆែកឆេររកអាវុធជាតិផ្ទុះនោះទេ។ ប៉ុន្តែអាចជាការឆែកឆេររារាំងពលរដ្ឋពីតាមបណ្ដាខេត្តដែលចង់ចូលរួមធ្វើបាតុកម្មជាមួយគណបក្សប្រឆាំង៖ «ប្រហែលជាគេមិនឲ្យប្រជាពលរដ្ឋចូលក្នុងក្រុងច្រើនក្នុងថ្ងៃបាតុកម្ម បើតាមខ្ញុំយល់ ព្រោះស្ថានភាពនេះវាមិនដែលមាន»។
កម្លាំងចម្រុះត្រូវបានដាក់ពង្រាយនៅចំណុចសំខាន់ៗក្នុងរាជធានីភ្នំពេញ ជាពិសេសនៅតាមផ្លូវជាតិចូលមកក្នុងក្រុង ដូចជាផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ និងផ្លូវជាតិលេខ១។ ផ្លូវជាតិលេខ២ ត្រង់រង្វង់មូលព្រះនារាយណ៍ ក៏មានកម្លាំងចម្រុះប្រមាណជិត ២០នាក់ ប្រចាំការខុសប្លែកសព្វដងដែរ។ ការឆែកឆេររថយន្ត និងសួរនាំអ្នកដំណើរពេលចូលមករាជធានីភ្នំពេញ គឺចំពេលដែលមហាបាតុកម្មអហិង្សារបស់គណបក្សប្រឆាំងនឹងត្រូវធ្វើឡើងនៅថ្ងៃទី៧ ខែកញ្ញា ខាងមុខ ប្រសិនបើគ្មានការប្រែប្រួល។
វិទ្យុអាស៊ីសេរីមិនអាចទាក់ទងលោក ខៀវ សុភ័គ អ្នកនាំពាក្យក្រសួងមហាផ្ទៃ សួរនាំជុំវិញរឿងនេះបានទេ នៅថ្ងៃទី៥ ខែកញ្ញា។ តែបើតាមការអះអាងពីអ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ បញ្ជាក់ថា ការឆែកឆេររថយន្តឈ្នួលនេះ ជាវិធានការឆែកឆេររកអាវុធដើម្បីការពារសន្តិសុខ ស្ថិរភាព សណ្ដាប់ធ្នាប់សាធារណៈ។
លោក ខៀវ សុភ័គ៖ «ក្នុងស្ថានភាពដែលមានការប្រមូលផ្ដុំគ្នារវាងគណបក្សមួយទៀត។ យើងឆែកឆេរក្រែងមានការបង្កប់អាវុធគ្រឿងផ្ទុះអីទេ ការពារសន្តិសុខ ស្ថិរភាព រួមស្ថានការណ៍ក្ដៅហ្នឹង។យើងអត់មានឃាត់គាត់ទេមានច្បាប់ធ្វើបាតុកម្មត្រឹមត្រូវអ៊ីចឹង គឺមានតែការពារគាត់»។
លោកបញ្ជាក់ថា នេះជាវិធានការចាស់ ប៉ុន្តែរឹតបន្តឹងបន្ថែមនៅពេលដែលមហាបាតុកម្មខិតជិតមកដល់ ហើយការឆែកឆេរនេះនឹងត្រូវធ្វើឡើងបន្តរហូតដល់រដ្ឋាភិបាលថ្មីបង្កើតឡើងបាន។
អ្នកសម្របសម្រួលបណ្ដាញរួបរួមដើម្បីគណនេយ្យភាពសង្គមនៅអាស៊ីបូព៌ានិងប៉ាស៊ីហ្វិក លោក សន ជ័យ យល់ឃើញថា ការរឹតបន្តឹងនេះធ្វើឲ្យប៉ះពាល់យ៉ាងខ្លាំងដល់សិទ្ធិសេរីភាពនៃការដើរហើររបស់ពលរដ្ឋ។ លោកចង់ឲ្យអាជ្ញាធរមានសមត្ថកិច្ចបំពេញភារកិច្ចតាមវិជ្ជាជីវៈដោយឯករាជ្យ ពិសេសត្រូវធានាថា ការងាររបស់កម្លាំងប្រដាប់អាវុធទាំងអស់ ធ្វើដើម្បីប្រយោជន៍ជាតិជាធំ ហើយសកម្មភាពណារារាំងសិទ្ធិសេរីភាពពលរដ្ឋដែលធានាដោយច្បាប់ត្រូវបញ្ឈប់ជាបន្ទាន់៕
No comments:
Post a Comment
yes