ចរាចរណ៍នៅម្តុំបឹងកេងកង លើផ្លូវលេខ៦៣ (ផ្លូវត្រសក់ផ្អែម) ចាប់ផ្តើមស្ទះទាំងព្រឹកព្រលឹម ខណៈអាជ្ញាធរបង្កើនការយាមកាម សម្រាប់ការប្រារព្ធពិធីសម្ពោធព្រះបរមរូបនៅក្បែរវិមានឯករាជ្យ។
នេះមិនមែនជាលើកទីមួយទេនៃការកកស្ទះចរាចរណ៍ នៅពេលមានពិធីធំដុំអ្វីមួយក្បែរវិមានឯករាជ្យ ដោយមានថ្នាក់ដឹកនាំរដ្ឋាភិបាលចូលរួម។
ផ្លូវឆ្លងកាត់វិមានឯករាជ្យ ត្រូវបានយាមកាមយ៉ាងតឹងរ៉ឹង ដោយមិនឲ្យមានការឆ្លងកាត់។ស្តូបតម្កល់ព្រះបរមរូប ព្រះមហាវីរក្សត្រ សម្តេចព្រះនរោត្តម សីហនុ ឋិតនៅសួនច្បារខាងកើតវិមានឯករាជ្យ ត្រូវសម្ពោធនៅព្រឹកថ្ងៃសុក្រ ទី១១ ខែតុលា ឆ្នាំ២០១៣ ក្រោមព្រះរាជាធិបតីភាពព្រះមហាក្សត្រ សម្តេចម៉ែ និងការចូលរួមពីលោកនាយករដ្ឋមន្ត្រី ហ៊ុន សែនផងដែរ។
ពលរដ្ឋអ្នកធ្វើដំណើរលើផ្លូវលេខ៦៣ សម្តែងការខឹងមួរម៉ៅនឹងការស្ទះចរាចរណ៍។ អ្នកធ្វើដំណើរតាមរថយន្ត មិនអាចធ្វើដំណើរទៅមុខបាន។ ចំណែកអ្នកធ្វើដំណើរតាមម៉ូតូ ព្យាយាមជិះកាត់ផ្លូវ និងច្រកតូចៗ។ពលរដ្ឋមួយចំនួន រាយការណ៍មកថា មហាវិថីមួយចំនួនទៀត ក៏មានការកកស្ទះផងដែរ។
ស្តូប ព្រះបរមរូប ព្រះបរមរតនកោដ្ឋ ស្ថិតនៅសួនច្បារខាងកើតវិមានឯករាជ្យ បានបញ្ចុះបឋមសិលាសាងសង់ កាលពីថ្ងៃទី២២ ខែកុម្ភៈ ឆ្នាំ២០១៣។ ស្តូបនោះមានកម្ពស់សរុប ២៧ម៉ែត្រ គិតពីបាតខាងក្រោមដល់កំពូល និងតួព្រះបរមរូប ធ្វើអំពីស្ពាន់ មានកម្ពស់ ៤,៥ម៉ែត្រ ទ្រង់ឈរលើព្រះផ្នែនមានកម្ពស់ ២,៧ម៉ែត្រ សាងសង់ នៅលើខឿនរាងចតុកោណកែង មានបណ្តោយ ៥៤ម៉ែត្រ ទទឹង ២៧ម៉ែត្រ។
កន្លងទៅ ពេលគណបក្សសង្រ្គោះជាតិ ធ្វើមហាបាតុកម្ម និងការបើកសម័យប្រជុំលើកដំបូងនៃរដ្ឋសភា កាលពីថ្ងៃទី២៣ខែកញ្ញា ចរាចរណ៍ក៏បានរឹតបន្តឹងនៅលើផ្លូវនរោត្តម ធ្វើឲ្យមានការកកស្ទះចរាចរណ៍ជាបន្តបន្ទាប់ នៅលើផ្លូវតូចៗ៕
No comments:
Post a Comment
yes