ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ដែលដឹកនាំការតវ៉ានៅទីលានប្រជាធិបតេយ្យ នាថ្ងៃអាទិត្យនេះ នៅតែប្រកាសដង្ហែក្បួន ដាក់ញត្តិនៅក្រសួងអប់រំយុវជន និងកីឡា ដើម្បីទាមទារដំឡើងប្រាក់ខែឲ្យគ្រូបង្រៀន បើទោះបីជាមានការហាមឃាត់ពីអាជ្ញាធរ។
តាមលោក រ៉ុង ឈុន ឲ្យដឹងថា អភិបាលខណ្ឌដូនពេញ លោក សុខ សម្បត្តិ បានហាម លោកមិនឲ្យដង្ហែក្បួនតាមការគ្រោងទុកទេ ដោយតម្រូវឲ្យអ្នកចូលរួមសម្តែងមតិនៅទីលានប្រជាធិបតេយ្យមួយកន្លែង រួចសន្យាថានឹងមានតំណាងស្ថាប័នពាក់ព័ន្ធមកទទួលញត្តិនេះ។ ប៉ុន្តែលោកថា មិនទទួលយកការស្នើនេះទេ ដោយចាត់ទុកថា ជាការកំនត់សេរីភាព។
ការតវ៉ារបស់សមាគមគ្រូបង្រៀនកម្ពុជាឯករជ្យនេះ ធ្វើឡើងក្នុងពិធីចូលរួមប្រារព្ធទិវាគ្រូបង្រៀនពិភពលោកខួបលើកទី១២។
កាលពីថ្ងៃទី៩តុលានេះ សាលារាជធានីភ្នំពេញ បានច្រានចោលសំណើរបស់ លោក រ៉ុង ឈុន សុំប្រមូលផ្តុំគ្នានៅទីលានប្រជាធិបតេយ្យ និងដង្ហែក្បួន ដោយតម្រូវឲ្យធ្វើពិធីនេះ នៅស្នាក់ការវិញ សំអាងពីហេតុផលពិបាករក្សាសន្តិសុខពេលជួបជុំ ស្របពេលពិធីប្រារព្ធខួប១ឆ្នាំនៃការយាងចូលទីវង្គត សម្តេចឪ នាថ្ងៃទី១៥តុលា។
អភិបាលរាជធានីភ្នំពេញ លោក ប៉ា សុជាតិវង្ស ធ្លាប់អះអាងថា បើការប្រារព្ធពិធីធ្វើនៅមួយកន្លែងនឹងមានសហការល្អពីកម្លាំងអាជ្ញាធរ និងសមត្ថកិច្ច តែលោកថា បើក្រុមអ្នកតវ៉ាដែលដឹកនាំដោយ លោក រ៉ុង ឈុន នៅតែធ្វើពិធីដង្ហែក្បួន នោះសាលារាជធានីនឹងពិចារណាលើនីតិវិធីច្បាប់។
សមត្ថកិច្ចបិទផ្លូវរារាំងការដង្ហែក្បួន (រូបថតដោយ វីដា)
តាមលោក រ៉ុង ឈុន អះអាងថា អ្នកចូលរួមប្រារព្ធពិធីនេះមានប្រមាណ ៦០០នាក់ កំពុងជួបជុំគ្នានៅទីលានប្រជាធិបតេយ្យ តាមការគ្រោងទុក ដើម្បីប្រារព្ធទិវាគ្រូបង្រៀនពិភពលោក និងដើរហែក្បួន យកញត្តិទៅដាក់នៅក្រសួងអប់រំ និងនៅទីស្តីការគណៈរដ្ឋមន្ត្រី។ លោកថា ក្នុងញ្ញត្តិនោះទាមទារចំនួន៩ចំណុច រួមមាន ដំឡើងប្រាក់បៀវត្សរ៍គ្រូបង្រៀនដល់១លានរៀល លុបបំបាត់អំពើពុករលួយ ផ្តល់សិទ្ធិចូលរួម ឬជួបជុំដល់គ្រូបង្រៀន និងបើកប្រាក់បៀវត្សរ៍ដោយបញ្ចូលតាមកុងធនាគារជាដើម។
ទោះជាយ៉ាងណា អភិបាលរាជធានីភ្នំពេញ លោក ប៉ា សុជាតិវង្ស អះអាងថា ប្រសិនបើការជួបប្រជុំគ្នានេះ មិនការដង្ហែក្បួន នោះអាជ្ញាធរសហការការពារសន្តិសុខឲ្យ តែបើមានការដង្ហែក្បួនធ្វើឲ្យប៉ះពាល់ដល់សណ្តាប់ធ្នាប់សាធារណៈ នោះអាជ្ញាធរនឹងចាត់វិធានការតាមច្បាប់៕
សកម្មភាពចាប់ជនបន្លំខ្លួនក្នុងក្រុមអ្នកចូលរួម(រូបថតដោយ វីដា)
No comments:
Post a Comment
yes