លោក ហ៊ុន សែន នាយករដ្ឋមន្ដ្រីកម្ពុជា និងលោក ណាជិពរ៉ាហ្សាក់ នាយករដ្ឋមន្ដ្រីម៉ាលេស៊ី
មិនមែនជារឿងចៃដន្យទេ ដែលគណបក្សធ្លាប់កាន់អំណាច ជាច្រើនទសវត្សរ៍ នៅក្នុងសមាគមអាស៊ីអាគ្នេយ៍ ហៅកាត់ថា អាស៊ាន ចំនួនពីរចាប់ផ្ដើមបាត់បង់អ្នកគាំទ្រ ឬធ្លាក់ប្រជាប្រិយភាព នៅក្នុងការបោះឆ្នោត ថ្នាក់ជាតិរបស់ប្រទេស។
គណបក្សទាំងពីរនេះ គឺគណបក្សរណសិរ្សជាតិរួបរួម UMNO នៃប្រទេសម៉ាឡេស៊ី និងគណបក្សប្រជាជនកម្ពុជា CPP របស់លោកនាយករដ្ឋមន្ត្រី ហ៊ុន សែន។ ប្រទេសទាំងពីរនេះ សុទ្ធតែប្រកាន់របបរាជានិយម អាស្រ័យរដ្ឋធម្មនុញ្ញ ដែលមានស្ដេចគ្រងរាជ្យសម្បត្តិ តែមិនកាន់អំណាច។
គណបក្សរណសិរ្សជាតិរួបរួម UMNO របស់នាយករដ្ឋមន្ត្រី ណាជិពរ៉ាហ្សាក់ បានរបូតអាសនៈសភាចំនួន៧ ទៅលើគណបក្សប្រឆាំងរួបរួមរបស់ លោក អាន់វ៉ា អ៊ីប្រាហ៊ីម។ នៅក្នុងការបោះឆ្នោតសភានីតិកាលទី១៣ កាលពីថ្ងៃទី៥ ខែឧសភា គណបក្សរណសិរ្សជាតិរួបរួម UMNO ដែលធ្លាប់កាន់កាប់អាសនៈសភា លើសលុប តែឥឡូវនេះបានទទួលអាសនៈជិតពីរដងប៉ុណ្ណោះ គឺធ្លាក់ពី ១៤០ មក១៣៣អាសនៈ ក្នុងចំណោមអាសនៈសរុប ២២២។ ការបាត់បង់អាសនៈរបស់គណបក្ស UMNO បានធ្វើឲ្យគណបក្សដែលធ្លាប់កាន់អំណាចជាង៥០ឆ្នាំមកនេះ មានសំឡេង ភាគតិចក្នុងសភា។
កត្តាដែលធ្វើឲ្យគណបក្សរបស់បណ្ឌិតមហាធាមហាមេដ បាត់បង់ការគាំទ្រនៅពេលនេះ គឺមានកត្តាច្រើនយ៉ាង ដូចជា អសមត្ថភាព នៃការបំបាត់អំពើពុករលួយ បញ្ហាអយុត្តិធម៌សង្គម កាន់តែអាក្រក់ បក្ខពួកនិយមដុះដូចផ្សិត ហើយភាពក្រីក្រនៅតែមានកម្រិតខ្ពស់។
តាមរបាយការណ៍របស់ អង្គការឃ្លាំមើលការបោះឆ្នោត ដ៏ធំមួយរបស់ប្រទេសម៉ាឡេស៊ី គឺក្រុមចម្រុះដើម្បីការបោះឆ្នោតដោយសេរី និងស្អាតស្អំ ហៅថា Bersih បានរកឃើញថា កត្តាទាំងនេះហើយ ដែលធ្វើឲ្យគណបក្សរណសិរ្សជាតិរួបរួម UMNO របស់នាយករដ្ឋមន្ត្រី ណាជិពរ៉ាហ្សាក់ ធ្លាក់ចុះការគាំទ្រ ប៉ុន្តែអង្គការដដែលនេះ ទទួលស្គាល់ថា ការឈ្នះសំឡេងភាគតិចរបស់ UMNO នៅក្នុងការបោះឆ្នោតសភា កាលពីថ្ងៃទី៥ ខែឧសភា ក៏មានចេញពីការបន្លំសន្លឹកឆ្នោត ការទិញសន្លឹកឆ្នោត ការបោះឆ្នោតបន្លំឈ្មោះ និងភាពមិនប្រក្រតីជាច្រើន បានកើតមាននៅថ្ងៃបោះឆ្នោតផងដែរ។
បើនិយាយពីគណបក្សកាន់អំណាចនៅកម្ពុជា គឺគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន។ គណបក្សនេះ ត្រូវបានមើលឃើញថា មាននិន្នាការកុម្មុយនីស្ដ ទៅរកប្រទេសវៀតណាម និងប្រទេសចិនប្រជាមានិត។
នៅក្នុងការបោះឆ្នោតសភានីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ គណបក្សនេះ ធ្លាប់ឈ្នះឆ្នោតបីអាណត្តិមកហើយ ដោយសំឡេងឆ្នោត ឬអាសនៈសភាកើនឡើងជាលំដាប់ ហើយកើនខ្ពស់បំផុតនៅក្នុងការបោះឆ្នោតសភានីតិកាលទី៤ ឆ្នាំ២០០៨ បានរហូតដល់ ៩០អាសនៈ ក្នុងចំណោម ១២៣អាសនៈ។ ប៉ុន្តែគណបក្ស ដែលមានឬសកែវពីបក្សកុម្មុយនីស្ដកម្ពុជា បានបាត់បង់សន្លឹកឆ្នោត ជាង៣០ម៉ឺនសន្លឹក បើធៀបការបោះឆ្នោតសភាឆ្នាំ២០០៨ តែបើគិតពីអាសនៈវិញ គណបក្សកាន់អំណាចជាង៣០ឆ្នាំនេះ បានជ្រុះរបូត ២២អាសនៈ ទៅលើគណបក្សប្រឆាំងរួបរួម គឺគណបក្សសង្គ្រោះជាតិ CNRP របស់លោក សម រង្ស៊ី និង លោក កឹម សុខា។ គណបក្សសង្គ្រោះជាតិ បានដណ្ដើមអាសនៈរបស់គណបក្សរាជានិយមទៀត គឺកើន ២៦អាសនៈ ធ្វើឲ្យកើនឡើង ពី២៩ ទៅ៥៥អាសនៈ ដែលអ្នកវិភាគ ពិនិត្យឃើញថា សន្ទុះគណបក្សប្រឆាំងនៅកម្ពុជា ចាប់ផ្ដើមដើរកាន់តែគៀកនឹងអំណាចរដ្ឋទាំងស្រុងហើយ។ ហើយថា គណបក្សប្រឆាំងនេះអាចនឹងឈ្នះឆ្នោតយ៉ាងពិតប្រាកដនៅឆ្នាំ២០១៨ ប្រសិនបើការបោះឆ្នោត មានភាពសេរី និងត្រឹមត្រូវ។
អ្នកវិភាគពិនិត្យឃើញថា កត្តាដែលធ្វើឲ្យ CPP ធ្លាក់ប្រជាប្រិយភាព ឬបាត់បង់អ្នកគាំទ្រមួយភាគធំនេះ គឺមិនខុសនឹងគណបក្សរណសិរ្សជាតិរួបរួម UMNO នៃប្រទេសម៉ាឡេស៊ីប៉ុន្មានទេ គឺដូចគ្នា។ តែកត្តាមួយដែលអ្នកវិភាគចាត់ទុកថា ដ៏សំខាន់នោះហើយខុសពីគណបក្ស UMNO ម៉ាឡេស៊ី គឺត្រង់ CPP មាននិន្នាការ ជាមួយ វៀតណាម និងចិន ជ្រុលហួសហេតុពេក ដែលពេលខ្លះធ្វើឲ្យក្រុមប្រឆាំងវាយលុក បានយ៉ាងងាយដូចជា ករណី ការលំហូរជនអន្តោប្រវេសន៍វៀតណាម ដែលរស់នៅកម្ពុជា និងការផ្ដល់ដីសម្បទាន សេដ្ឋកិច្ចរហូត ៩០ឆ្នាំ ដែលប្រទេសនៅអាស៊ីអាគ្នេយ៍ មួយចំនួន មិនអាចធ្វើបាននោះ៕
ប្រភពពី VOD
No comments:
Post a Comment
yes