ពួកឡើងតំណែង តាមជើងខោឪ
លោក ហ៊ុន ម៉ានី កូនប្រុសនាយករដ្ឋមន្ត្រី លោក ហ៊ុន សែន និងលោក ស សុខា កូនប្រុសលោក ស ខេង រដ្ឋមន្ត្រីក្រសួងមហាផ្ទៃ បានទទួលតំណែងជាសមាជិកក្នុងគណៈកម្មការជំនាញចំនួន២នៃរដ្ឋសភា ខណៈតំណាងរាស្ត្រភាគច្រើនផ្សេងទៀត ក្លាយជាសមាជិកគណៈកម្មការតែមួយប៉ុណ្ណោះ។
ការសម្រេចជ្រើសជាសមាជិកនេះ ត្រូវបានបោះឆ្នោត នៅព្រឹកថ្ងៃព្រហស្បតិ៍នេះ ក្នុងសំឡេងសន្លឹកឆ្នោតគាំទ្រចំនួន៦៥ លើ៦៥សំឡេង ដោយមិនមានសន្លឹកឆ្នោតមិនព្រម និងអនុបវាទទេទេ។
កំណត់ហេតុស្តីពីលទ្ធភាពនៃការបោះឆ្នោតជ្រើសតាំងសមាជិកគណៈកម្មការជំនាញនៃរដ្ឋសភា ចុះហត្ថលេខាដោយប្រធានរដ្ឋសភា លោក ហេង សំរិន នៅថ្ងៃទី១០ខែតុលានេះ បង្ហាញថា លោក ហ៊ុន ម៉ានី តំណាងរាស្ត្រខេត្តកំពង់ស្ពឺ និងលោក ស សុខា តំណាងរាស្ត្រខេត្តព្រៃវែង ត្រូវបានជ្រើសរើសជា សមាជិកគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន និងក៏ជាសមាជិកគណៈកម្មការនីតិកម្ម និងយុត្តិធម៌។ ចំណែកតំណាងរាស្ត្រពីរបីរូបទៀត ក៏បានក្លាយជាសមាជិកនៃគណៈកម្មការចំនួនពីរដែរ។
លោក ហ៊ុន ម៉ានី អាយុ៣១ឆ្នាំ និងលោក ស សុខា អាយុ៣២ឆ្នាំ ជាតំណាងរាស្ត្រទើបតែជាប់ឆ្នោត និងក្មេងជាងគេក្នុងចំណោមតំណាងរាស្ត្ររាស្ត្រទាំងអស់។ តំណាងរាស្ត្រទាំងពីររូប ត្រូវបានដាក់ឲ្យជាប់ជាតំណាងរាស្ត្រ ក្រោយការបោះឆ្នោត២៨ខែកក្កដា បើទោះឈ្មោះអ្នកទាំងពីរ ស្ថិតក្នុងលេខរៀង មិនជាប់ជាតំណាងរាស្ត្រ សម្រាប់ខេត្តកំពង់ស្ពឺ និងព្រៃវែងក៏ដោយ។
គណៈកម្មការជំនាញទាំង៩នៃរដ្ឋសភានោះ រួមមាន គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា-ព្រឹទ្ធសភា គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក គណៈកម្មការមហាផ្ទៃ ការពារជាតិ អង្កេត បោសសំអាត និងមុខងារសាធារណៈ គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន គណៈកម្មការនីតិកម្ម និងយុត្តិធម៌ គណៈកម្មការអប់រំ យុវជន កីឡា ធម្មការ កិច្ចការឃោសនាវប្បធម៌ និងទេសចរណ៍ គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី និងគណៈកម្មការសាធារណៈការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់៕
No comments:
Post a Comment
yes