លោក សម រង្ស៊ី ប្រធានគណបក្សសង្គ្រោះជាតិ
ប្រធានគណបក្សសង្គ្រោះជាតិ បានស្នើសុំប្រធានស្ថាប័នហិរញ្ញវត្ថុអន្តរជាតិចំនួនបី ដែលមានទំនាក់ទំនង និងកំពុងត្រៀមរៀបចំចុះកិច្ចសន្យាហិរញ្ញវត្ថុជាមួយរដ្ឋាភិបាលកម្ពុជា ផ្អាកផ្តល់ប្រាក់កម្ចី ឬប្រាក់ជំនួយមួយរយៈ ដោយរង់ចាំរដ្ឋាភិបាលមួយស្របច្បាប់កើតពេញរូបរាងជាមុនសិន។
លិខិតរបស់ លោកសម រង្ស៊ី ប្រធានគណបក្សសង្គ្រោះជាតិ ដែលទទួលបាននៅរសៀលថ្ងៃទី៨ ខែតុលា ឆ្នាំ២០១៣នេះ ហើយបានបញ្ជូនទៅកាន់ប្រធានធនាគារអភិវឌ្ឍន៍អាស៊ី (ADB) ប្រធានធនាគារពិភពលោក និងប្រធានមូលនិធិរូបិយវត្ថុអន្តរជាតិ IMF ដែលមានខ្លឹមសារដូចៗគ្នា គឺស្នើសុំឲ្យស្ថាប័នហិរញ្ញវត្ថុទាំងបីនេះ ផ្អាករាល់កិច្ចការផ្តល់ប្រាក់កម្ចី ឬការបោះវិនិយោគទុនថ្មីណាបន្ថែមទៀត ជាមួយរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ។
លិខិតដដែលនោះ បានបញ្ជាក់ថា យោងតាមរដ្ឋធម្មនុញ្ញមាត្រា៧៦ និងមាត្រា៥១ ដែលតម្រូវឲ្យសភាប្រជុំដំបូងក្រោយការបោះឆ្នោតយ៉ាងតិចណាស់មាន សមាសភាពតំណាងរាស្ត្រជាប់ឆ្នោត ១២០រូប ហើយធ្វើឡើងជាលក្ខណះពហុបក្ស តែផ្ទុយទៅវិញ គណបក្សប្រជាជនកម្ពុជា ដែលមានអ្នកតំណាងរាស្ត្រ ៦៨រូប បានចូលប្រជុំសភាដោយឯកបក្ស គឺជាការផ្ទុយឬរំលោភរដ្ឋធម្មនុញ្ញនៃព្រះរាជាណាចក្រកម្ពុជា ហើយធ្វើឲ្យរដ្ឋាភិបាល និងរដ្ឋសភាដែលកើតចេញពីការរំលោភ រដ្ឋធម្មនុញ្ញនេះ គឺជារដ្ឋាភិបាល និងសភាខុសច្បាប់ ។
លិខិតរបស់ លោកសម រង្ស៊ី បានបន្តទៀតថា មិនត្រឹមតែប៉ុណ្ណោះទង្វើរបស់គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានរំលោភមួយទៀត គឺស្មារតីនៃកិច្ចព្រមព្រៀងសន្តិភាពទីក្រុងប៉ារីស២៣តុលា១៩៩១ ដែលតម្រូវឲ្យកម្ពុជាអនុវត្តគោលការណ៍ប្រជាធិបតេយ្យសេរីពហុបក្ស ហើយប្រទេសចំនួន១៨ មានអាមេរិក បារាំង អង់គ្លេស ចិន រុស្ស៊ី និងជប៉ុន ដែលម្ចាស់ជំនួយធំបំផុតនៅកម្ពុជា និងជាផ្នែកមួយ ដែលបានជួយធ្វើឲ្យប្រទេសកម្ពុជាមានសន្តិភាព និងសេរីពហុបក្ស តាមរយៈការបោះឆ្នោតសភាកម្ពុជាអាណត្តិទី១ ក្រោមការរៀបចំដោយអង្គការសហប្រជាជាតិនៅឆ្នាំ១៩៩៣ ។
លិខិតរបស់ លោកសម រង្ស៊ី បានឲ្យដឹងទៀតថា តាមរយៈការបោះឆ្នោតមួយដែលប្រព្រឹត្តទៅដោយមានការបន្លំសន្លឹកឆ្នោតកើតជាប្រព័ន្ធ ហើយធ្វើឲ្យគណបក្សរបស់លោកហ៊ុន សែន បន្តឈ្នះឆ្នោតទៀត នោះគឺជាដើមចម ធ្វើឲ្យមានវិបត្តិនយោបាយនៅកម្ពុជា ហើយក្នុងន័យនេះ លោកសម រង្ស៊ី បានទទូចដល់ស្ថាប័នទាំងបីនេះ ដែលជាផ្នែកមួយធ្វើឲ្យកម្ពុជាទទួលបានការរីកចម្រើនទាំងសេដ្ឋកិច្ច និងសិទ្ធិសេរីភាពតាមរយៈកិច្ចព្រមព្រៀង ក្រុងប៉ារីសនេះ គួរតែពិចារណា ហើយផ្អាករាល់កិច្ចការទំនាក់ទំនងផ្នែកហិរញ្ញវត្ថុសាធារណៈណាមួយជាមួយនឹងរដ្ឋាភិបាលកម្ពុជា ដែលមិនស្របច្បាប់ ហើយបានកើតចេញពីការរំលោភរដ្ឋធម្មនុញ្ញ ។
លោកសម រង្ស៊ី ឥលូវនេះ កំពុងតែធ្វើដំណើរទៅកាន់ទ្វីបអឺរ៉ុប គឺក្នុងគោលបំណងដើម្បីជំរុញឲ្យប្រទេសនៅអឺរ៉ុប កុំអាលទទួលស្គាល់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ហើយលោកនឹងចេញដំណើរទៅកាន់សហរដ្ឋអាមេរិក ទៅកាន់ស្នាក់ការអង្គការសហប្រជាជាតិ ក្នុងគោលបំណងដើម្បីស្នើសុំឲ្យអង្គការពិភពលោកមួយនេះទុកអាសន្នឲ្យកម្ពុជាមួយអន្លើសិន ដោយរង់ចាំការដោះស្រាយវិបត្តិនៅកម្ពុជារួចរាល់សិន និងរៀបចំរដ្ឋាភិបាលមួយដោយស្របច្បាប់៕
No comments:
Post a Comment
yes