ក្រុមអ្នកតវ៉ាប្រឆាំងនឹងសេចក្ដីព្រាងច្បាប់លើកលែងទោស នៅថៃ
(រូបភាពពី បាកកប៉ុស្ដិ៍)
ក្រុមចៅក្រមកំពូលៗនៃប្រទេសថៃចំនួន៦៣រូប រួមនឹងព្រឹទ្ធសភា១០នាក់ទៀត បានសម្រេចទាត់ចោលសេចក្ដីព្រាងច្បាប់លើកលែងទោសជាសាកលនៃគណៈរដ្ឋមន្ត្រីរបស់ លោកស្រី យីងឡាក់ ដែលសភាសំឡេងភាគច្រើនរបស់គណបក្សភឿថៃ បានអនុម័តកាលពីសប្ដាហ៍មុននេះ ដោយចាត់ទុកថា ជាការបំផ្លាញនីតិរដ្ឋ។
ក្រុមចៅក្រមទាំងនោះ មកពីក្រសួងយុត្តិធម៌នៃប្រទេសថៃ។ ពួកគាត់បានចេញសេចក្ដីថ្លែងការណ៍ ថ្កោលទោសសេចក្ដីព្រាងច្បាប់លើកលែងទោស ដ៏ចម្រូងចម្រាសនេះ ហើយថា គេមិនត្រូវទទួលស្គាល់ច្បាប់ណាមួយដែលគ្រាន់តែធ្វើឡើង ដើម្បីបក្ខពួកខ្លួននោះទេ ហើយថា ការធ្វើដូចនេះគឺជាការបំផ្លាញគោលការនីតិរដ្ឋ។
ជាមួយគ្នានេះ ព្រឹទ្ធសភាថៃ ចំនួន១០រូប រួមនឹងប្រធានព្រឹទ្ធសភា លោក Nikom Wairatpanich បានព្រមានថា លោកនឹងបញ្ចូនសេចក្ដីព្រាងច្បាប់នេះ ត្រឡប់ទៅរដ្ឋសភាវិញ។ លោកបានប្រាប់ថា សេចក្ដីព្រាងច្បាប់នេះ គួរត្រូវផ្អាក ឬទុកចោលជាមោឃៈ ព្រោះវាកំពុងនាំឲ្យមានការបែកបាក់ក្នុងចំណោមប្រជាជន និងអ្នកនយោបាយថៃ។
ទាក់ទិននឹងសេចក្ដីព្រាងច្បាប់នេះ ក្រុមគណបក្សប្រឆាំងរបស់ លោក អាប់ភិស៊ិត បានដឹកនាំធ្វើបាតុកម្ម ដើម្បីប្រឆាំង គឺមានរយៈពេលពីរ បីថ្ងៃមកហើយ ដោយមានបាតុករកាន់តែមានចំនួនច្រើនឡើង បានមកចូលរួម។
ចុះហេតុផលអ្វីបានជា សេចក្ដីព្រាងច្បាប់នេះ រងការប្រឆាំងដូចនេះ ?
លោក Suthep Thaugsuban អគ្គលេខាបក្សប្រឆាំងដ៏ធំនៃគណបក្សប្រជាធិបតេយ្យរបស់ លោក អាប់ភីស៊ិត បានជំទាស់ថា សេចក្ដីព្រាងច្បាប់នេះ មានហេតុផលចំបង គឺអនុគ្រោះឲ្យអតីតនាយករដ្ឋមន្ត្រីថៃ គឺលោក ថាក់ស៊ិន វិលមកកាន់អំណាចវិញប៉ុណ្ណោះ។
កាលពីថ្ងៃអង្គារ លោកស្រី យីងឡាក់ ប្អូនស្រីបង្កើតរបស់ លោក ថាក់ស៊ិន បានព្យាយាមពន្យល់រាស្ត្រថៃ អំពីសារៈសំខាន់នៃសេចក្ដីព្រាងច្បាប់នេះ ប៉ុន្តែ លោក Suriyasai Katasila អ្នកសម្របសម្រួលមកពីវិទ្យាស្ថាន គោលនយោបាយបៃតង ពិនិត្យឃើញថា លោកស្រី យីងឡាក់ មិនបានបកស្រាយចំណុចដែលក្រុមប្រឆាំងជំទាស់នឹងច្បាប់នេះទេដូចជាការអត់ឱនខាងនយោបាយមានកម្រិតណានោះ។ លោកថា ការវាយប្រហាររបស់លោកស្រីទៅលើក្រុមតវ៉ា មិនមែនជាការឆ្លើយតបក្នុងន័យបង្រួបង្រួមជាតិនោះឡើយ។
មានប្រជារាស្ត្រថៃជិត៦ម៉ឺននាក់ ហើយបានចុះហត្ថលេខាលើញត្តិមួយ តាមប្រព័ន្ធអោនឡាញ ដើម្បីប្រឆាំងនឹងសេចក្ដីព្រាងច្បាប់នេះ ហើយនៅពេលនេះ ក្រុមប្រឆាំងបន្តប្រមូលគ្នា ជាច្រើនទៀត ដែលជាការសម្ដែងមតិជំទាស់សេចក្ដីព្រាងច្បាប់ ដ៏ចម្រូងចម្រាសនេះ។ ទន្ទឹមនឹងនេះ ក្រុមអាវក្រហមដែលគាំទ្រគណបក្សភឿថៃ ប្រកាសថា ខ្លួននឹងធ្វើការតវ៉ាគាំទ្រសេចក្ដីព្រាងច្បាប់នេះ។
សមាជិកព្រឹទ្ធសភាថៃមាន១៥០រូប ហើយដើម្បីឲ្យសេចក្ដីព្រាងច្បាប់ចេញរួច លុះត្រាតែមាន សំឡេង ៥០បូក១ គឺស្មើនឹង ៧៦នាក់ ឡើងទៅ៕
No comments:
Post a Comment
yes