ប្រធានគណកម្មការព័ត៌មាននៃរដ្ឋសភាជាតិ លោក ឈាង វុន បានសម្តែងការមិនពេញចិត្តចំពោះប្រព័ន្ធផ្សព្វផ្សាយមួយចំនួន ជាពិសេសគឺប្រព័ន្ធផ្សព្វផ្សាយបរទេសតែម្តង។ លោក បានព្រមានចំពោះប្រព័ន្ធផ្សព្វផ្សាយបរទេសទាំងនោះ ដែលចូលចិត្តលូកដៃក្នុងបញ្ហានយោបាយនៅក្នុងប្រទេសកម្ពុជា ឲ្យប្រយ័ត្នខ្លួនផងដែរ។
ថ្លែងនៅចំពោះក្រុមអ្នកកាសែតនាវិមានរដ្ឋសភាជាតិកាលពីថ្ងៃអង្គារម្សិលមិញ លោក ឈាង វុន ប្រធានគណកម្មការព័ត៌មាននៃរដ្ឋសភា បានរិះគន់ខ្លាំងៗចំពោះអ្នកសារព័ត៌មានខ្មែរធ្វើការឲ្យការសែតបរទេសមួយចំនួនដែលផ្សាយជាខេមរភាសាថា សរសេរមិនបានគោរពទៅតាមវិជ្ជាជីវៈខ្លួនជាអ្នកសារព័ត៌មានពិតប្រាកដនោះទេ ដោយហ៊ានសរសេរចូលក្នុងបញ្ហានយោបាយកម្ពុជា។
អ្នកតំណាងរាស្ត្រជាន់ខ្ពស់បក្សកាន់អំណាចរូបនេះ បានផ្តាំទៅក្រុមអ្នកសារព័ត៌មាន ឬប្រព័ន្ធផ្សាយបរទេសទាំងនោះ ឲ្យប្រយ័ត្នខ្លួនឲ្យបានមែនទែន ពីព្រោះថា អ្នកព័ត៌មានទាំងនោះ មិនឈរលើគោលការណ៍ឯករាជ្យ ពោលគឺអ្នកព័ត៌មានមិនចំជាអ្នកព័ត៌មាន អ្នកនយោបាយមិនប្រាកដជាអ្នកនយោបាយឡើយ។
យ៉ាងណាក៏ដោយជុំវិញបញ្ហានេះអ្នកឃ្លាំមើលស្ថានការណ៍សង្គមកម្ពុជា បានយល់ឃើញថា សេរីភាពផ្នែកសារព័ត៌មាននៅកម្ពុជានៅតែមានកំរិតទាបដដែល ពីព្រោះអ្នកព័ត៌មានតែងតែទទួលរងនៅការគម្រាបកំហែង ប្តឹងផ្តល់ និងដល់ថ្នាក់សម្លាប់ផងក៏មាន។ ម្យ៉ាងវិញទៀត ពួកគេបានរិះគន់ថា នៅក្នុងប្រទេសកម្ពុជាមានប្រព័ន្ធផ្សព្វផ្សាយច្រើនណាស់ដែលមិនមានភាពឯករាជ្យ ពោលគឺគាំទ្របក្សកាន់អំណាចទាំងស្រុងតែម្តង៕
No comments:
Post a Comment
yes