អ្នកស្រី ឈិន យ៉ាន សម្ដែងជាលោក ម៉ៅ សេងទុង
ស្ត្រីវ័យ៥៧ឆ្នាំ ឈិន យ៉ាន គ្រាន់តែជានារីមេផ្ទះម្នាក់ប៉ុណ្ណោះ។ ប៉ុន្តែអ្វីដែលគួរឲ្យកត់សម្គាល់បំផុតនោះគឺ ស្ត្រីចិនរូបនេះមានមុខមាត់ដូចអតីតមេដឹកនាំបដិវត្ដន៍ចិនលោក ម៉ៅ សេទុង សឹងតែបេះបិទតែម្ដង។
នៅឆ្នាំ២០០៦ អ្នកស្រី ឈិន យ៉ាន បានសម្រេចចិត្តប្រើប្រាស់មុខមាត់ស្រដៀងនឹងលោក ម៉ៅ សេទុង របស់ខ្លួនដើម្បីប្រកបរបរសម្ដែងធ្វើត្រាប់តាមលោក ជាថ្នូរនឹងប្រាក់ជួលដ៏ច្រើនក្រាស់ ក្រែល។ ពេលសម្ដែងធ្វើត្រាប់នេះ អ្នកស្រីតែងស្លៀកឈុតពណ៌ប្រផេះ ឬគគីរដែលជាម៉ូដប្រចាំត្រកូលរបស់លោក ម៉ៅ សេទុង និងសិតសក់ច្បូតទៅក្រោយបង្ហាញថ្ងាសទូលាយដូចមេដឹកនាំបដិវត្ដន៍រូបនេះតែម្ដង។ អ្នកស្រីត្រូវពាក់ស្បែកជើងម៉ូដទាហានប៉ារ៉ាលេខធំដូចបុរសដោយមានប៉ូវអេប៉ុងពីខាងក្នុង។
ជាទូទៅការសម្ដែងធ្វើត្រាប់របស់អ្នកស្រី ឈិន យ៉ាន តាមលោក ម៉ៅ សេទុង ម្ដងមានរយៈពេល៤០នាទី។ អ្នកស្រីតែងចាប់ផ្ដើមដោយលើកដៃស្វាគមន៍ ជក់បារី និងសម្លឹងមើលហ្វូងមហាជនយ៉ាងម៉ឺងម៉ាត់ស្ងៀមស្ងាត់។ មនុស្សដែលមកទស្សនាការសម្ដែងនេះ តែងលាន់មាត់សរសើរថា អ្នកស្រីពិតជាដូចលោក ម៉ៅ សេទុង ពិតៗ។
ដើមឡើយ អ្នកស្រីអាចរកកម្រៃបានប្រមាណ៣០០ដុល្លារសម្រាប់ការសម្ដែងធ្វើ ត្រាប់ម្ដង ប៉ុន្តែបច្ចុប្បន្នតម្លៃខ្លួនអ្នកស្រី យ៉ាន បានឡើងដល់១ម៉ឺនដុល្លារឯណោះក្នុងការសម្ដែងមួយលើក។
ថ្វីដ្បិត តែចំណូលរបស់អ្នកស្រីខ្ពស់មិនចាញ់តារាល្បីមួយចំនួនមែន ប៉ុន្តែការមានមុខមាត់ដូចលោក ម៉ៅ សេទុង បានធ្វើឲ្យជីវិតគូស្រករបស់អ្នកស្រីរកាំរកូស ដោយកាលពីឆ្នាំ២០១០មានព័ត៌មានលេចឮថា អ្នកស្រីត្រូវស្វាមីសុំលែងព្រោះតែបុរសរូបនោះត្អូញថា៖ «ពិបាកទ្រាំណាស់ ព្រោះរាល់យប់លោកមានអារម្មណ៍ថា ហាក់បីដូចរួមដំណេកជាមួយលោក ម៉ៅ សេទុង អ៊ីចឹង»៕
No comments:
Post a Comment
yes