មណ្ឌលអប់រំកែប្រែម៣ជាកន្លែងដែលលោក វន់ ពៅ ជាប់ឃុំ
(រូបភាពដោយ ញឹម សុខន)
សុខភាពរបស់ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ដែលសមត្ថកិច្ចចាប់យកទៅឃុំខ្លួន នៅមណ្ឌលអប់រំកែប្រែម៣ បានធូរស្រាលបន្តិចនៅថ្ងៃនេះ។
បន្ទាប់ពីចូលពិនិត្យស្ថានភាពសុខភាព និងផ្តល់ថ្នាំដល់លោក វន់ ពៅ និងអ្នកជាប់ឃុំ ផ្សេងទៀត នៅមណ្ឌលអប់រំកែប្រែម៣នៅប្រពាំងថ្លុងខេត្តកំពង់ចាមនៅរសៀលនេះ លោក ខាត់ អាន ពេទ្យអង្គការលីកាដូមានប្រប្រសាសន៍ថា របួសនៅលើក្បាលលោក វន់ ពៅ ដែលបែក១០ថ្នេរ នោះបានកាត់ចេញ៣ថ្នេរហើយ។ លោក ខាត់ អាន ក៏បានឲ្យដឹងទៀត លោក វន់ ពៅ នៅមានស្នាមរបួសមួយចំនួនទៀតនៅលើដងខ្លួនផងដែរ។
លោក វន់ ពៅ ក៏បានអំពាវនាវអង្គការសង្គមស៊ីវិលធ្វើការពាក់ព័ន្ធសិទ្ធិមនុស្សជួយអន្តរាគមន៍ ផ្លូវច្បាប់ជួយរូបលោកផង។
លោក ថេង សាវឿន អ្នកសម្របសម្រួលនៃសម្ព័ន្ធសហគមន៍កសិករកម្ពុជា ដែលសមត្ថកិច្ចចាប់ទៅជាមួយលោក វន់ ពៅ ដែរនោះ ក៏មានរបួសបែកក្បាល៧ថ្នេរ និងមានរបួសនៅលើខ្លួនមួយចំនួនទៀតដែរ។
កាលពីថ្ងៃទី២ និងទី៣ ខែមករា សមត្ថកិច្ចបានបង្ក្រាបលើកម្មករ ដែលតវ៉ាទាមទារដំឡើងប្រាក់ឈ្នូលនៅតំបន់សេដ្ឋកិច្ចពិសេសភ្នំពេញ និងនៅសួនឧស្សាហកម្មកាណាឌីយ៉ា ដែលបណ្តាលឲ្យកម្មករ៥នាក់ស្លាប់៤០នាក់រងរបួស និង២៣នាក់ត្រូវចាប់ខ្លួនទៅឃុំនៅមណ្ឌលអប់រំកែប្រែម៣ ក្នុងខេត្តកំពង់ចាម៕
No comments:
Post a Comment
yes