លោកហ្វា សាលី ប្រធានសម្ព័ន្ធសហជីពជាតិ ថ្លែងទៅកាន់អ្នក
សារព័ត៌មាននៅជិតស្ពាននាគ (រូបថត ណាត សុភាព)
ថ្នាក់ដឹកនាំសហជីពទាំង៩ កម្មករ និងប្រជាពលរដ្ឋ នៅព្រឹកថ្ងៃអាទិត្យនេះ ថ្កោលទោសរដ្ឋាភិបាល ចំពោះការរារាំង និងការបំបិទសិទ្ធិសេរីភាពពួកគេ ក្នុងការប្រមូលផ្តុំ ធ្វើបាតុកម្មដោយសន្តិវិធីនៅទីលានប្រជាធិបតេយ្យ។
ការប្រកាសថ្កោលទោសនេះ ធ្វើឡើងខណៈដែលក្រុមសហជីព កម្មករ និងប្រជាពលរដ្ឋ ប្រមាណ៣ពាន់នាក់ ត្រូវបានអាជ្ញាធររាប់រយនាក់ រារាំងមិនឲ្យមានការប្រមូលផ្តុំនៅលើទីលានប្រជាធិបតេយ្យ តាមការគ្រោងទុករបស់ពួកគេ នៅថ្ងៃទី២៦ខែមករានេះ។
ប្រធានសម្ព័ន្ធសហជីពជាតិ លោក ហ្វា សាលី ថ្លែងប្រាប់អ្នកសារព័ត៌មានថា ថ្នាក់ដឹកនាំសហព័ន្ធសហជីព និងសមាគមចំនួន ៩ នៅតែព្យាយាមចូលទៅកាន់ទីលានប្រជាធិបតេយ្យ ដើម្បីធ្វើបាតុកម្មទាមទារដោះលែងសកម្មជនសិទ្ធិមនុស្ស ដីធ្លី និងកម្មករ២៣នាក់ និងដំទ្បើងប្រាក់ឈ្នួលកម្មករគ្រប់វិស័យយ៉ាងតិច១៦០ដុល្លារក្នុងមួយខែ បើទោះអាជ្ញាធរបិទច្រកចេញចូលទៅកាន់ទីលានប្រជា ធិប តេយ្យក៏ដោយ។ តាមការគ្រោងទុក អ្នករត់ម៉ូតូឌុប អ្នករត់ម៉ូតូកង់បី អាជីវករ សិស្ស និស្សិត មន្ត្រី រាជការ និងពលរដ្ឋប្រមាណ១០០០០នាក់ និងចូលរួមធ្វើបាតុកម្មនេះ។ តែទោះជាយ៉ាងណា រហូតមកដល់ម៉ោងជាង១០នេះ គេសង្កេតឃើញមាន មន្ត្រីសហជីព កម្មករ និងប្រជាពលរដ្ឋប្រមាណជា ៣ពាន់នាក់ ប្រមូលផ្តុំគ្នានៅក្បែរស្ពាននាគ នៅវត្តភ្នំ និងផ្លូវភ្លោះមុខធនាគារកាណាឌីយ៉ា។
កាលពីថ្ងៃម្សិលមិញ សាលារាជធានីភ្នំពេញ បានចេញលិខិតមួយទៅប្រធានសហព័ន្ធសហជីព និងសមាគមទាំង៩នោះ មិនអនុញ្ញាតឲ្យធ្វើបាតុកម្មនេះទេ ហើយព្រមានចាត់វិធានការតាមផ្លូវច្បាប់ទៅលើថ្នាក់ដឹកនាំសហជីព ទាំងនោះ ប្រសិនបើបាតុកម្ម និងការដង្ហែក្បួនណាមួយ ធ្វើប៉ះពាល់ដល់សណ្តាប់ធ្នាប់សង្គម និងមានការប៉ះទង្គិច៕
No comments:
Post a Comment
yes