បុរសម្នាក់ ដែលជាបាតុករ ឈរកាន់ទង់ជាតិថៃនៅមុខ
សមត្ថកិច្ច (រូបភាពពី៖ AFP)
មន្ត្រីនគរបាលបានឃាត់ខ្លួនបាតុករប្រមាណ១០០នាក់ ដែលសហការឡោមព័ទ្ធវិមានរដ្ឋាភិបាលនៅថ្ងៃអង្គារនេះ ដើម្បីរារាំងរដ្ឋាភិបាលលោកស្រី យីង ឡាក់ ដែលមានបំណងចូលបំពេញការងារនៅថ្ងៃពុធស្អែកនេះ។
សារព័ត៌មាន Channel News Asia ចុះផ្សាយថា ដោយផ្អែកលើបម្រាមដាក់រដ្ឋក្នុងសភាអាសន្ននៅព្រឹកនេះ នាំឲ្យក្រុមប្រឹក្សាសន្តិសុខជាតិថៃសម្រេចឃាត់ខ្លួនបាតុករប្រមាណ១០០នាក់។ ប្រធានក្រុមប្រឹក្សាសន្តិសុខជាតិលោក Paradorn Pattanatabut ថ្លែង ការឃាត់ខ្លួននោះមិនមានការតទល់គ្នាទេ គឺសមត្ថកិច្ចចាប់ឃាត់ខ្លួនតែម្តង។
ការឃាត់ខ្លួននេះជាលើកដំបូងដែល អាជ្ញាធរថៃចាប់ខ្លួនអ្នកតវ៉ាមានចំនួនច្រើនចាប់តាំងពីមានការប្រមូលផ្តុំជាទ្រង់ទ្រាយធំ ទាមទារឲ្យលោកស្រី យីង ឡាក់ ចេញពីតំណែង ជាងបីខែមកនេះ។
លោក Paradorn បានថ្លែងថា ពេលនេះក្រុមបាតករបានយល់ព្រមបើកផ្លូវ ឲ្យមន្ត្រីរដ្ឋាភិបាលអាចមានលទ្ធភាពចូលបំពេញការងារដូចធម្មតាវិញ។
នគរបាលកុបកម្មជាច្រើន ប្រដាប់ដោយ ដំបង ខែល និងមួកសុវត្ថិភាព ក៏បានដាក់ការពារតឹងរឹងនៅក្បែរវិមានរដ្ឋាភិបាល ដើម្បីបង្ការ ការវិលត្រឡប់វិញរបស់ក្រុមបាតុករទៀត។
នៅថ្ងៃចន្ទម្សិលមិញ បាតុករបានចាក់ស៊ីម៉ង់ត៍ ខ្សាច់ នៅជញ្ជាំង និងច្រកចូលវិមានរដ្ឋាភិបាល។
បាតុករនៅតែទាមទារឲ្យលោកស្រី យីង ឡាក់ ចុះចេញពីតំណែងដោយមិនបាច់បោះឆ្នោត ដើម្បីធ្វើកំណែទម្រង់អំពើពុករលួយ និងចោទថា ប្រើមូនិធិមិនត្រឹមត្រូវមុនពេលបោះឆ្នោត។ មុនពេលបោះឆ្នោតថ្ងៃទី២ខែកុម្ភៈ បាតុករក៏បានទាមទារឲ្យលោកស្រី យីង ឡាក់ ចុះចេញពីតំណែងផងដែរ ដោយចោទថា រដ្ឋាភិបាលលោកស្រី ជាកូនអុកមួយរបស់លោកថាក់ ស៊ីន។
No comments:
Post a Comment
yes