ទិដ្ឋភាពប្រជាសហគមន៍បុរីកីឡា ទៅបន់ស្រន់នៅព្រះអង្គដង្កើ
(រូបថត៖ កាន់ វិច្ឆិកា)
ប្រជាសហគមន៍បុរីកីឡា ប្រមាណ៥០នាក់ នៅរសៀលថ្ងៃព្រហស្បតិ៍នេះ បានបន់ស្រន់នៅព្រះអង្គដង្កើមុខព្រះបរមរាជវាំង សុំឲ្យមានយុត្តិធម៌ ខណៈដែលពួកគាត់អស់ជំនឿលើការអនុវត្តច្បាប់របស់រដ្ឋាភិបាលកម្ពុជា ក្នុងការដោះស្រាយទំនាស់ដីធ្លីរវាងក្រុមហ៊ុនផានអ៊ីមិច។
តំណាងប្រជាសហគមន៍បុរីកីឡា លោក ពេជ្រ សំភួន មានប្រសាសន៍ថា ការទៅបន់ស្រន់ និងដាក់បណ្តាសានៅមុខព្រះអង្គដង្កើ គឺសុំឲ្យព្រះអង្គរកយុត្តិធម៌ដល់ប្រជាសហគមន៍ដែលរងគ្រោះដោយសារដីធ្លី។ លោកបន្តថា ក្រុមហ៊ុនផានអ៊ីមិច បានរំលោភលើកិច្ចសន្យា ហើយរដ្ឋាភិបាល និងតុលាការហាក់មិនអើពើជាមួយនឹងការដង្ហោយហៅសុំការដោះស្រាយពួកគាត់ឡើយ ដូច្នេះមានតែពឹងលើ ការប្តឹងព្រះអង្គដងកើ ឲ្យរកយុត្តិធម៌ជូនពួកគាត់ប៉ុណ្ណោះ «អ៊ឹចឹងប្រជាជនខ្ញុំដាក់ពាក្យបន្តឹង ទៅតុលាការជាងពីរឆ្នាំ អត់មានដំណោះស្រាយ។ ដាក់ញត្តិទៅអាជ្ញាធរថ្នាក់ជាតិគ្រប់កន្លែងទាំងអស់ អត់មានដំណោះស្រាយ នៅអ្នកស្រី ស៊ុយ សុផាន កាន់កាប់ដដែល បើអ៊ឹចឹងខ្ញុំអស់ជម្រើស មានតែតុលាការផ្លូវងងឹត បើបុគ្គលណាយកដីនោះ ក្បត់និងរាស្ត្រ ឃុបឃិតចែកគ្នា សូមឲ្យអ្នកនោះទទួលនូវសេចក្តីវិនាស។ នេះមិនមែនកំហុសរបស់រាស្ត្រទេ គឺយើងបានធ្វើក្រដាសស្នាមឯកភាពគ្នាហើយ»។
ប្រជាសហគមន៍ដែលមកធ្វើការបន់ស្រន់ នៅព្រះអង្គដង្កើម្នាក់ទៀត អ្នកស្រី សំណាង ប្រាប់ថា ពួកគាត់គឺជាម្ចាស់ដីពិតប្រាកដ ហើយសុំឲ្យព្រះអង្គដង្កើ តាមផ្តន្ទាទោសដល់អ្នកដែលសមគំនិតគ្នា បណ្តេញពលរដ្ឋចេញពីលំនៅឋានទាំងបង្ខំ។ អ្នកស្រីបន្តថា ពួកគាត់មានការឈឺចាប់យ៉ាងខ្លាំង ដោយសារក្រុមហ៊ុនរំលោភបំពាន ហើយសមត្ថកិច្ចប្រើហិង្សា គំរាមកំហែង លើពួកគាត់ ជាពិសេសការប្រើហិង្សាទៅលើពលរដ្ឋកាលពីថ្ងៃទី១៤ ខែកុម្ភៈ កន្លងទៅនេះ។
ទាក់ទងនឹងករណីនេះ អ្នកនាំពាក្យសាលារាជធានី លោក ឡុង ឌីម៉ង់ មិនបានអត្ថាធិប្បាយលើការបន់ស្រន់សុំរកយុត្តិធម៌ ដែលជារឿងអរូបីរបស់ពួកគាត់ឡើយ ប៉ុន្តែលោកបានបញ្ជាក់ថា ខាងសាលារាជធានី ក៏ដូចជារដ្ឋាភិបាល កំពុងតែស្វែងរកដំណោះស្រាយឲ្យបានសមស្រប ជូនពួកគាត់ឆាប់ៗនេះ «ខ្ញុំអត់មានមតិយោបល់អ្វីទេ ព្រោះអីនេះទាក់ទងនឹងរឿងអបិយជំនឿ យើងខ្ញុំជាមន្ត្រីរដ្ឋបាល យករឿងអបិយជំនឿមកនិយាយមិនកើតទេ សំខាន់គឺបញ្ហាជាក់ស្តែង ដែលយើងដោះស្រាយជូនគាត់ ឯកឧត្តមអភិបាល លោកបានទៅពិនិត្យទៅស្ថានភាពជាក់ស្តែងរបស់គាត់ ឃើញពីស្ថានភាព និងការរស់នៅបណ្តោះអាសន្នរបស់គាត់ហ្នឹង គ្មានប្រកបអនាម័យ បរិស្ថានត្រឹមត្រូវ បានជារៀបចំឲ្យមាន ជាគំនិតផ្តួចផ្តើមឡើង បង្កើតជាជម្រកបណ្តោះអាសន្ន ជូនគាត់សិន ឲ្យមានផាសុកភាពត្រឹមត្រូវ»។
ពាក់ព័ន្ធនឹងករណីនេះ នាយកលេខាធិការដ្ឋាននៃក្រុមការងារពិសេសសិទ្ធិលំនៅដ្ឋាន លោក សៀ ភារម្យ មានលើកឡើងថា លោកមានការសោកស្តាយចំពោះរដ្ឋាភិបាល ដែលបានបណ្តោយឲ្យពួកគាត់រស់នៅដោយគ្មានអនាម័យ និងមិនមានការដោះស្រាយសមស្របណាមួយដែលអាចទទួលយកបាន។ លោកបន្តថា រដ្ឋាភិបាលគួរតែបង្កើនការដោះស្រាយជូនពួកគាត់ឲ្យបានឆាប់រហ័ស ដើម្បីការចោទប្រកាន់ថាលើរដ្ឋាភិបាលមានភាពពុករលួយ និងប្រកាន់បក្សពួក «យើងមានការសោកស្តាយដែរ មិនគួរណា រដ្ឋាភិបាលយើង ដែលជាអ្នកបម្រើប្រជាពលរដ្ឋ លោកនៅពន្យាពេលយូរ ហើយមិនព្រមដោះស្រាយ ឲ្យគាត់ឲ្យបានឆាប់ចប់ ដោយសារឥឡូវនេះ បន្ទាប់ពីការបណ្តេញចេញមក គាត់រស់នៅពីឆ្នាំហើយ នៅលើគំនរសំរាម ក្រោមតង់នេះគឺជីវិតគាត់វេទនាសែនមហាវេទនា។ ដូច្នេះហើយដោយសារតែគាត់ ពិបាកនឹងទ្រាំនេះហើយ ដែលគាត់ខំប្រឹងបញ្ចេញសំឡេង បន្លឺសំឡេងដើម្បីឲ្យ រដ្ឋាភិបាលនេះជំរុញឲ្យកាន់តែលឿនថែមទៀត ដើម្បីបញ្ចប់បញ្ហាហ្នឹង កុំឲ្យទុក្ខវេទនារបស់ប្រជាពលរដ្ឋ ជាទុក្ខវេទនារបស់ប្រមុខរដ្ឋាភិបាល។ ហើយបើប្រមុខរដ្ឋាភិបាលអត់ចេះវេទនា អត់ចេះទុក្ខសោក សម្រាប់ប្រជាពលរដ្ឋរបស់ខ្លួន នេះជារឿងមួយដែលយើង ក្នុងនាមជាអង្គការ សង្គមស៊ីវិលមួយ យើងមានការសោកស្តាយ»។
តាមរបាយការណ៍របស់អង្គការសង្គមស៊ីវិល ឲ្យដឹងថា កាលពីថ្ងៃទី៣ ខែមករា ឆ្នាំ២០១២ ប្រជាសហគមន៍បុរីកីឡាជាង៣០០គ្រួសារ ត្រូវបានក្រុមហ៊ុនផានអ៊ីមិច របស់លោកស្រី ស៊ុយ សុផាន បណ្តេញចេញទាំងបង្ខំ ឲ្យទៅនៅជាយក្រុង ដោយផ្តល់សំណងតិចតួច។ ក្នុងនោះនៅសល់ជាង១០០គ្រួសារទៀត មិនព្រមចាកចេញ ហើយបន្តតវ៉ារហូតសព្វថ្ងៃនេះ ហើយកាលថ្ងៃទី១៤ ខែកុម្ភៈ ឆ្នាំ២០១៤ ក៏មានការប៉ះទង្គិចជាថ្មីទៀត រវាងប្រជាសហគមន៍ និងសន្តិសុខខណ្ឌដូនពេញ បណ្តាលឲ្យមនុស្ស៩នាក់រងរបួស ក្នុងនោះមានស្ត្រីម្នាក់មានផ្ទៃពោះ៧ខែផងដែរ ខណៈដែលពួកគាត់ទាមទារកាន់កាប់អាគារទី៩ ដែលកំពុងសាងសង់៕
No comments:
Post a Comment
yes