សកម្មជនសិទ្ធិមនុស្ស ប្រធានសហជីព និងមិត្តភក្តិ ដែលមាន
បំណងចូលសួរសុខទុក្ខលោក វ៉ន ពៅ នៅពន្ធនាគារត្រពាំងផ្លុង
នៅថ្ងៃចន្ទទី៣កុម្ភៈនេះ មេធាវីរបស់លោកវ៉ន ពៅ បានធ្វើដំណើរទៅកាន់ពន្ធនាគារ ម៣ ត្រពាំងផ្លុង ក្នុងខេត្តកំពង់ចាម ដើម្បីជួបជាមួយលោក វ៉ន ពៅ និងអ្នកជាប់ឃុំ២២នាក់ផ្សេងទៀត។ ស្ថានភាពលោកវ៉ន ពៅ ស្ថិតនៅក្នុងសភាពយ៉ាប់យឺននៅឡើយ ហើយត្រូវបានអនុញ្ញាតឲ្យសម្រាកនៅក្នុងប៉ុស្តិ៍សុខភាព របស់ពន្ធនាគារ ម៣។ នេះបើតាមមន្ដ្រីសិទ្ធិមនុស្សអង្គការលីកាដូ។ ប្រភពដដែល បានបញ្ជាក់ថា ដំណើរទៅជួបលោកវ៉នពៅនេះ គឺដើម្បីប្រាប់ពីដំណើរការសវនាការសាលាឧទ្ធរណ៍ នៅថ្ងៃទី១១កុម្ភៈខាងមុខនេះ និងពន្យល់ពីនីតិវិធីច្បាប់។
ក្រុមមេធាវីរបស់អង្គការលីកាដូចំនួន៣នាក់ នៅថ្ងៃចន្ទទី៣កុម្ភៈនេះ បានជួបជាមួយលោក វ៉ន ពៅ ប្រធានសមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធ នៅពន្ធនាគារម៣ ត្រពាំងផ្លុង ក្នុងខេត្តកំពង់ចាម។ ក្រៅពីលោកវ៉ន ពៅ ក្រុមមេធាវី ក៏បានជួបផងដែរ អ្នកជាប់ឃុំចំនួន៧នាក់ ក្នុងចំណោមអ្នកជាប់ឃុំទាំង២២នាក់ ដែលត្រូវបានចាប់ខ្លួន ក្រោយការប៉ះទង្គិចកាលពីដើមខែមករាកន្លងទៅ។
មន្ត្រីអង្គការលីកាដូ លោក អំ សំអាត បានបញ្ជាក់ប្រាប់វិទ្យុបារាំងអន្ដរជាតិ នៅល្ងាចថ្ងៃចន្ទនេះ អំពីស្ថានភាពសុខភាពរបស់លោកវ៉ន ពៅ ថា នៅមានសភាពយ៉ាប់យឺននៅឡើយ ហើយចាំបាច់ត្រូវតាមដានឲ្យបានដិតដល់។ លោកវ៉ន ពៅ ដែលមានជំងឺប្រចាំកាយជាប់ខ្លួនផងនោះ ត្រូវបានមន្ដ្រីពន្ធនាគារ អនុញ្ញាតឲ្យសម្រាកនៅក្នុងប៉ុស្តិ៍សុខភាព របស់ពន្ធនាគារ ម៣។
ក្រៅពីដើម្បីតាមដានស្ថានភាពរបស់អ្នកជាប់ឃុំទាំង២៣នាក់ហើយ ដំណើរទៅជួបលោកវ៉ន ពៅ នាថ្ងៃចន្ទនេះ គឺដើម្បីប្រាប់ពីដំណើរការសវនាការនៅថ្ងៃទី១១កុម្ភៈខាងមុខនេះ និងពន្យល់ពីនិតិវិធីច្បាប់ផ្សេងៗ។ នេះបើតាមមន្ដ្រីអង្គការលីកាដូដដែល។
សូមជម្រាបជូនថា ក្រុមមេធាវីរបស់លោកវ៉ន ពៅ បានដាក់ពាក្យប្ដឹងឧទ្ធរណ៍ ប្រឆាំងនឹងការសម្រេចរបស់សាលាដំបូង ដែលមិនអនុញ្ញាតឲ្យលោកវ៉ន ពៅ ស្ថិតនៅក្រៅឃុំបណ្ដោះអាសន្ន។ តុលាការឧទ្ធរណ៍នឹងបើកសវនាការ នៅថ្ងៃទី១១កុម្ភៈខាងមុខ ដើម្បីសម្រេចថា តើ គួរអនុញ្ញាតឲ្យលោកវ៉ន ពៅ នៅក្រៅឃុំឬក៏ទេ។ មេធាវីរបស់អង្គការលីកាដូដែលវិទ្យុបារាំងបានសាកសួរ មិនអាចបង្ហាញពីក្ដីសង្ឃឹមរបស់ខ្លួន ជុំវិញដំណើរការសវនាការនៅថ្ងៃទី១១កុម្ភៈខាងមុខនេះទេ ដោយបានលើកឡើងថា វាជានីតិវិធីរបស់តុលាការ៕
No comments:
Post a Comment
yes