អ្នកវិភាគ និងតាមដានព្រឹត្តិការណ៍សង្គម លើកឡើងនៅថ្ងៃសុក្រនេះថា ថ្នាក់ដឹកនាំប្រទេសកម្ពុជា ពិបាកធ្វើការជាមួយនឹងប្រទេសសេរី ដោយសារអ្នកដឹកនាំ ទោរទៅរកប្រទេសកុម្មុយនីស្ត ដើម្បីកាន់អំណាចឲ្យបានយូរអង្វែង។
កាលពីថ្ងៃព្រហស្បតិ៍ម្សិលមិញ គេហទំព័រ POLITICO Magazine (www.politico.com) បានចេញផ្សាយអត្ថបទមួយ ដែលមានចំណងជើងថា ប្រទេសសម្ព័ន្ធមិត្តទាំង២៥របស់អាមេរិក ដែលអាមេរិក ពិបាកធ្វើការជាមួយ(Awkward Allies) រួមមាន ប៉ាគីស្ថាន អារ៉ាប់ប៊ីសាវឌីត អាហ្វហ្គានីស្ថាន អ៊ីរ៉ាក់ អេស៊ីប មីយ៉ាន់ម៉ា និងវៀតណាមជាដើម ហើយនៅក្នុងអត្ថបទនោះ ក៏មានលោកនាយករដ្ឋមន្ត្រី ហ៊ុន សែនផងដែរ។
អ្នកនាំពាក្យរបស់រដ្ឋាភិបាល លោក ផៃ ស៊ីផាន មានប្រសាសន៍ថា លោកមិនខ្វល់ពីការលើកឡើងរបស់គេហទំព័របរទេសនោះទេ។
បណ្ឌិតវិទ្យាសាស្ត្រនយោបាយ លោក សុខ ទូច កត់សម្គាល់ថា មូលហេតុដែលថ្នាក់ដឹកនាំកម្ពុជា មានសម្ព័ន្ធមិត្តស្និទ្ធជាមួយប្រទេសកុម្មុយនីស្ត ទំនងជាថ្នាក់ដឹកនាំចង់រក្សាអំណាចរបស់ខ្លួនឲ្យបានយូរអង្វែង «អ្នកនយោបាយរបស់ខ្មែរ ចង់កាន់អំណាចយូរ ហើយអំណាចយូរនេះ ពួកកុម្មុយនីស្តទេ អំណាចតពូច អំណាចបន្តវេន។ កន្លែងនេះយើងឃើញថា ការដែលចង់បាននេះហើយ ធ្វើឲ្យលោក អូបាម៉ា លោកពិបាកធ្វើការងារ ជាមួយនឹងថ្នាក់ដឹកនាំយើង ដែលមាននិន្នាការចង់បានអំណាចយូរទោះបីជា រដ្ឋធម្មនុញ្ញបានចែងថា កម្ពុជាប្រកាន់លទ្ធិប្រជាធិបតេយ្យក៏ដោយ»។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា បើកម្ពុជា ចាប់យកប្រទេសកុម្មុយនីស្ត ហើយបោះបង់ប្រទេសសេរី នោះកម្ពុជា និងក្លាយជាកូនអ៊ុករបស់ប្រទេសកុម្មុយនីស្ត ទាំងវិស័យសេដ្ឋកិច្ច និងនយោបាយ «យើងអត់មានទំនាក់ទំនងជាមួយខាងលិច យើងអត់សេដ្ឋកិច្ចជាមួយខាងលិច នោះគឺសេដ្ឋកិច្ចរបស់យើង ត្រូវបរាជ័យ ហើយជំនួយទាក់ទងនឹងសេដ្ឋកិច្ចទាំងអស់ គឺផ្អែកលើប្រទេស៦ អ៊ីចឹងយើងនៅក្រោមឥទ្ធិពលគេ នៅក្រោមឥទ្ធិពលគេ ច្រើនរឿងលុយ ហើយនៅក្រោយឥទ្ធិពលនយោបាយ ក្រោមឥទ្ធិពលនយោបាយហើយ យើងគឺជា អាយ៉ងហើយ យើងគឺជាកូនអុកគេហើយ។ ប្រទេសកុម្មុយនីស្តដែលចង់ឲ្យប្រទេសកម្ពុជា ជោគជ័យជាប្រទេសប្រជាធិបតេយ្យ សេរី ជោគជ័យ ព្រោះបើជោគជ័យវាប៉ះពាល់ដល់របបរបស់ប្រទេសខ្លួនឯង»។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ(និចហ្វិច) លោក ហង្ស ពុទ្ធា យល់ថា ដើម្បីឲ្យប្រទេសកម្ពុជាទទួលបានផលប្រយោជន៍ពីប្រទេស កុម្មុយនីស្ត និងប្រទេសសេរី ថ្នាក់ដឹកនាំ មិនត្រូវចាប់យកប្រទេសមួយ ចោលប្រទេសណាមួយបានទេ។ លោកបញ្ជាក់ថា ថ្នាក់ដឹកនាំគួរតែសិក្សាពីចំណុចល្អរបស់ប្រទេសទាំងនោះ ដើម្បីយកមកអនុវត្តនៅប្រទេសកម្ពុជា ឲ្យបានរីកចម្រើន ទើបជាការល្អ «ការសិក្សាមានរួចហើយថា ប្រទេសតាមបែបសេរីហ្នឹង វាធ្វើឲ្យពលរដ្ឋមានការរីកចម្រើនជាងប្រទេសកុម្មុយនីស្ត អ៊ីចឹងការងាកទៅរកទៅរកប្រទេសគ្រប់គ្រងតាមបែប គុម្មុយនីស្តនេះ អាចឈានធ្វើឲ្យភាពចំនេញរបស់អ្នកកាន់អំណាច ដែលងាកទៅរកប្រទេសកុម្មុយនីស្ត ត្រង់ដែលថា មានឱកាសច្រើនក្នុងការទទួលបាននូវធនធាន ឬក៏បច្ចេកទេស ឬក៏ថវិកា ដើម្បីទី១ ពង្រឹងនូវអំណាចរបស់ខ្លួន ដើម្បីឲ្យប្រជាពលរដ្ឋមានការពេញចិត្ត ពេញថ្លើមនៅពេលដែលទទួលបានជាលុយកាក់ ជំនួយច្រើន»។
កន្លងទៅ ក្នុងសិក្ខាសាលា និងតាមវេទិកាសាធារណៈ លោកនាយករដ្ឋមន្ត្រី ហ៊ុន សែន ធ្លាប់រិះគន់ ប្រទេសអាមេរិកថា នៅពីក្រោយខ្នង នៃការទម្លាក់គ្រាប់បែកនៅសម័យលន់ នល់សម្លាប់ប្រជាពលរដ្ឋខ្មែរ ដោយមិនមានការទទួលខុសត្រូវជាដើម។
កាលពីឆ្នាំ២០១២ ជំនួបរវាងលោកនាយករដ្ឋមន្ត្រី ហ៊ុន សែន និងលោកអូបាម៉ា ត្រូវបានចាត់ទុកជាជំនួបតានតឹងមួយ ដោយសារលោកអូបាម៉ា បានលើកពីបញ្ហាសិទ្ធិមនុស្ស លទ្ធិប្រជាធិតេយ្យ ការបោះឆ្នោតនៅកម្ពុជា បញ្ហាអ្នកទោសនយោបាយ និងបញ្ហាដីធ្លីផ្សេងៗ ទៅលោកនាយករដ្ឋមន្ត្រី ហ៊ុន សែន៕
No comments:
Post a Comment
yes