សមាគមប្រជាជាតិ អាស៊ីអាគ្នេយ៍ ទាំង១០ប្រទេស
នៅឆ្នាំ២០១៥ ខាងមុខនេះ សមាគមប្រជាជាតិអាស៊ីអាគ្នេហ៍ ហៅកាត់ថាអាស៊ាន ដែលមានប្រទេសទាំង១០ជាសមាជិក ក្នុងនោះកម្ពុជាផងដែរ នឹងកាន់តែខិតជិតចូលគ្នា ផ្នែកសេដ្ឋកិច្ច ក្រោមឆ័តតែមួយ ដែលមានន័យថា សហគមន៍មួយ វាសនាតែមួយ។
នៅពេលដែលសមាគមអាស៊ានប្រែក្លាយទៅជា សហគមន៍អាស៊ាន នោះរដ្ឋជាសមា ជិកទាំងអស់ នឹងកាន់តែបង្កើនការធ្វើសមាហរណកម្មសេដ្ឋកិច្ច និងភាពប្រកួតប្រជែង ជា មួយគ្នា ពេលនោះហើយ ប្រទេសទាំង១០ នឹងបើកចំហនូវលំហូរនៃការធ្វើពាណិជ្ជកម្ម លំហូរទំនិញ សេវាកម្ម ធនធានមនុស្ស ការងារ និងលំហូរនៃឥណទាន ឬមូលធន ពីប្រទេសមួយ ទៅប្រទេសមួយដោយសេរី។ ចំណេកប្រជាជននៃប្រទេសទាំង១០របស់អាស៊ាន ក៏អាចធ្វើដំណើររកការងារធ្វើក្នុងប្រទេសទាំង១០នេះ ដោយសេរីទៅតាមសមត្ថភាពរបស់ពួកគេដោយគ្រាន់តែមានប័ណ្ណសំគាល់ខ្លួន។
កាលពីថ្ងៃទី០៤ ខែមីនា ក្នុងវេទិការាជរដ្ឋាភិបាលជាមួយវិស័យឯកជនលើកទី១៧ ក្រោមប្រធានបទ "សហគមន៏សេដ្ឋកិច្ចអាស៊ានឆ្នាំ២០១៥កាលានុវត្តភាពនិងការប្រឈមចំពោះកម្ពុជា" ដែលធ្វើឡើងនៅវិមានសន្តិភាពទីស្តីការគណៈរដ្ឋមន្ត្រីលោកនាយករដ្ឋមន្ត្រី ហ៊ុន សែន ក៏បានជំរុញឲ្យវិស័យឯកជនចូលរួមជាមួយរាជរដ្ឋាភិបាលកម្ពុជាផងដែរ ដើម្បីឲ្យកម្ពុជាអាចត្រៀមខ្លួនចូលទៅក្នុងសហគមន៏សេដ្ឋកិច្ចអាស៊ាន ឆ្នាំ២០១៥ខាងមុខនេះ។
លោកនាយករដ្ឋមន្ត្រី បន្តថា សកម្មភាពកម្ពុជាឆ្ពោះទៅសមាហរណកម្មសេដ្ឋកិច្ចអាស៊ានប្រៀបដូចជាសកម្មភាពប្រណាំងទូក ដែលចាំបាច់ត្រូវអុំឲ្យបានស្រុះគ្នា ហើយរាជរដ្ឋាភិបាលដែលជាអ្នកកាច់ចង្កូតតម្រង់ទិសឲ្យត្រង់នៅកន្សៃ ក៏ត្រូវការចាំបាច់នូវការចង្អុរបង្ហាញទិសរបស់វិស័យឯកជនដែលជាអ្នកអុំនៅផ្នែកខាងមុខដែរ។
តើនៅពេលកម្ពុជាធ្វើសមាហរណកម្មសេដ្ឋកិច្ចអាស៊ានឆ្នាំ២០១៥ ប្រជាជនកម្ពុជាអាចនឹងទទួលបានផលចំណេញនិងផលលំបាកយ៉ាងណាខ្លះ លើវិស័យការងារនោះហើយ កម្ពុជា មានធនធានមនុស្ស អាចប្រកួតប្រជែងជាមួយប្រទេសក្នុងប្លុកអាស៊ានបានកម្រិតណា?
លោក កែម ឡី អ្នកស្រាវជ្រាវបញ្ហាសង្គម យល់ឃើញថា ការធ្វើសមាហរណកម្មសេដ្ឋកិច្ចអាស៊ាន ដោយមានការបើកចំហរទីផ្សារការងារសេរីនៅឆ្នាំ២០១៥ខាងមុខ ប្រជាជនកម្ពុជា អាចទទួលបានផលចំណេញតិចជាងគេ ហើយវាអាចមានរយៈពេលយូរ ដែលកម្ពុជាអាចតោងយកផលចំណេញនោះបាន។ លោក កែម ឡី បន្តថា ផលចំណេញភាគច្រើនគឺបានទៅលើអ្នកដែលមានប្រាក់ និងមានចំណេះដឹង ដែលមានសមត្ថភាពប្រកួតប្រជែងទាំងក្នុងស្រុក និងបរទេស តាមរយៈការវិនិយោគ និងបើកក្រុមហ៊ុនជាដើម ដោយឡែកសម្រាប់វិស័យការងារមួយចំនួន ជាពិសេសយុវជន នឹងអាចបាត់បង់នូវឱកាសការងារច្រើន ខណៈដែលកម្ពុជាពុំទាន់បានអនុវត្តច្បាប់គ្រប់គ្រងជនអន្តោប្រវេសន៍ខុសច្បាប់មានប្រសិទ្ធភាព «ធម្មតាអ្នកដែលដាក់វិនិយោគទុន តែងតែចាប់យកក្រុមហ៊ុននៅក្នុងស្រុកដើម្បីធ្វើជាដៃគូ អ៊ីចឹងកាលណាចាប់យកក្រុមហ៊ុននៅក្នុងស្រុកជាដៃគូរ ក្រុមហ៊ុននៅក្នុងស្រុកហ្នឹងចាប់ផ្តើមផ្លាស់ប្តូរបទពិសោធន៍ ចាប់ផ្តើមទទួលអ្វីដែលគេមានដើម្បីយកមកផលិតនៅក្នុងស្រុក ប៉ុន្តែគ្រាន់តែថាវាមានភាគតិចអ្នកដែលមានលទ្ធភាពអញ្ចឹង»។
អ្នកវិភាគបញ្ហាសង្គមរូបនេះ លើកឡើងថា ក្នុងកាលៈទេសៈនេះ ប្រជាជនកម្ពុជានៅមានកម្រិតជីវភាពក្រីក្រខ្ពស់ អ្នករស់នៅតាមជនបទបរិយាកាសគាំទ្រមិនសូវមាន គឺចាំបាច់ទាមទារឲ្យរដ្ឋាភិបាល ត្រូវយកចិត្តទុកដាក់ហើយគាំទ្រពេញលេញដល់ប្រជាពលរដ្ឋក្រីក្រនិងអ្នករកស៊ីតូចតាច ដើម្បីឲ្យពួកគាត់អាចមានលទ្ធផលងើបឡើង នៅពេលធ្វើសមាហរណកម្មសេដ្ឋកិច្ចអាស៊ាន ឆ្នាំ២០១៥ ខាងមុខនេះ។
ជាមួយគ្នានេះដែរ លោក យ៉ា ណាវុធ នាយកប្រតិបត្តិអង្គការខារ៉ាមកម្ពុជា ដែលធ្វើការទាក់ទងនឹងកម្មករចំណាកស្រុក លើកឡើងថា ការធ្វើសមាហរណកម្មអាស៊ាននាពេលខាងមុខនេះ អាចជួយពលរដ្ឋកម្ពុជា ឲ្យមានឱកាសទៅធ្វើការងារនៅប្រទេសណាមួយក៏បាន ក្នុងចំណោមប្រទេសទាំង១០នោះ និងអាចរៀនសូត្រ ព្រមទាំងអាចផ្លាស់ប្តូរបទពិសោធន៍ការងារជាមួយគ្នាបាន ប៉ុន្តែអ្វីជាឧបសគ្គនោះ គឺកម្រិតនៃការយល់ដឹង និងជំនាញរបស់ពលរដ្ឋខ្មែរនៅមានកម្រិត «គេអាចមករកការងារធ្វើ នៅក្នុងប្រទេសយើង បើសិនជាយើងមិនព្យាយាមពង្រឹងធនធានមនុស្សរបស់យើង ឲ្យបានល្អ ជាពិសេសពលកររបស់យើង ឲ្យជាពលករដែលមានជំនាញ។ កាលណាយើងបញ្ជូនពលករដែលអត់ជំនាញ ប្រាក់ខែក៏វាទាបដែរ អញ្ចឹងកាលណាពលករយើងចេញច្រើន យើងអាចប្រឈមមុខបញ្ហាដែរ ខ្វះកម្លាំងពលកម្មនៅក្នុងប្រទេស ដោយសារប្រទេសយើងជាប្រទេសកសិកម្ម ហើយបើប្រជាពលរដ្ឋយើង នាំគ្នាធ្វើចំណាកស្រុកច្រើនយ៉ាងហ្នឹង អញ្ចឹងយើងអាចបាត់បង់ផលិតកម្មរបស់យើងហើយ នៅពេលខាងមុខ»។
សមាគមអាស៊ានត្រូវបានបង្កើតឡើង នៅឆ្នាំ១៩៦៧ដែលក្នុងនោះមានប្រទេសជាសមាជិកដូចជា ប្រទេស ឥណ្ឌូនេស៊ី ថៃ ហ្វីលីពីនសិង្ហបូរី ប្រុយណេ ម៉ាឡេស៊ី វៀតណាម ឡាវ កម្ពុជានិងភូមា។ បច្ចុប្បន្នប្រទេសដៃគូអាស៊ាន មាន ជប៉ុន ចិន អាមេរិក ឥណ្ឌា អូស្ត្រាលី និងអង្គការសហប្រជាជាតិ។ ប្រជាជនអាស៊ានមានប្រមាណ ៦១០លាននាក់។ ក្នុងចំណោមបណ្តាប្រទេសទាំងដប់នៅអាស៊ាន គឺមានប្រទេសសិង្ហបុរី ប្រ៊ុយណេ និងម៉ាឡេស៊ីជាដើមគឺជាប្រទេសដែលមានធនធានមនុស្សមានសមត្ថភាពខ្ពស់ ដោយពួកគេអាចរកចំណូលបានពីជាងមួយម៉ឺនដុល្លារទៅប្រាំម៉ឺនដុល្លារក្នុងមួយឆ្នាំ។ ចំណែកប្រជាជនកម្ពុជាអាចរកចំណូលបានតែប្រមាណមួយពាន់ដុល្លារ នៅឆ្នាំ២០១៣នេះ។
អតីតប្រធានអង្គការយុវជនឈានមុខដែលបច្ចុប្បន្នជានាយកអង្គការតម្លាភាពកម្ពុជា លោក ព្រាប កុល វិភាគថាយុវជនកម្ពុជានឹងមិនមានសមត្ថភាពប្រកួតប្រជែងនឹងយុវជននៃប្រទេសចំនួន៨ក្នុងចំណោមដប់ប្រទេសនៅអាស៊ានបានទេខណៈដែលការអប់រំនៅកម្ពុជានៅមានកម្រិត «គុណភាពនៃការអប់រំនៅប្រទេសកម្ពុជា យើងនៅមានកម្រិតហើយបើប្រៀបធៀបទៅនឹងប្រទេសផ្សេងៗ ក្នុងតំបន់អាស៊ានយើងនៅទាបជាងគេនៅឡើយ លើកលែងតែប្រទេសភូមា ឬក៏ប្រទេសឡាវដែលយើងមានលក្ខណៈប្រហាក់ប្រហែលគ្នាក៏ប៉ុន្តែ ប្រទេសដទៃទៀតគឺយើងនៅចាញ់គេឆ្ងាយណាស់ ដូចថៃដូចសាំងហ្គាពួ ដូចវៀតណាម។ល។ គឺយើងនៅខ្សោយដូច្នេះបញ្ហាអំពើពុករលួយនៅពេលប្រឡង និងជាទូទៅក្នុងវិស័យអប់រំនេះ វាបានប៉ះពាល់រួចទៅហើយហើយ បើយើងគិតទៅដល់ការប្រៀបធៀបប្រកួតប្រជែងនៅអាស៊ានទៀតនោះ យើងនឹងចាញ់ប្រៀបគេហើយ នេះជាបញ្ហាកង្វល់មួយសម្រាប់យើងនៅពេលដែលយើងចូលធ្វើជាសមាហរណកម្មអាស៊ាន»។
តែទោះយ៉ាងណា អ្នកតាមដានបញ្ហាសង្គម បានលើកថា កម្ពុជាអាចទទួលបានផលចំណេញតិចជាងផលខាត ហើយវាអាចប្រើពេលយូរក្នុងការតោងយកផលចំណេញ ខណៈដែលការចូលសមាហរណកម្មអាស៊ាននេះ ទំនិញមួយចំនួនត្រូវរួចពន្ធ ដែលអាចនាំឲ្យរដ្ឋបាត់បង់ថវិកាជាតិខ្លះ ។មានលំហូរចូលនៃប្រជាជនក្នុងបណ្តាប្រទេសអាស៊ាន មកធ្វើការនៅប្រទេសកម្ពុជា បើសិនកម្ពុជាខ្លួនឯងមិនពង្រឹងធនធនមនុស្សរបស់ខ្លួន ឲ្យមានជំនាញច្បាស់លាស់ទេនោះ រួមទាំងបញ្ហាប្រឈមជាច្រើនទៀត៕
No comments:
Post a Comment
yes