ថ្នាក់ដឹកនាំគណបក្សសង្គ្រោះជាតិប្តេជ្ញារកយុត្តិធម៌ជូនជនរងគ្រោះនិងគ្រួសារជនរងគ្រោះដោយអំពើគប់គ្រាប់បែកកាលពីឆ្នាំ១៩៩៧ឲ្យទាល់តែបាន

 

 

នៅព្រឹកថ្ងៃទី៣០ មីនា គណបក្សសង្គ្រោះជាតិ ដែលដឹកនាំដោយលោកប្រធាន សម រង្ស៊ី និង លោកអនុប្រធាន កឹម សុខា បានប្រារព្វពិធីបង្សុកូលជួងដួងវិញ្ញាណក្ខណ្ឌវីរបាតុករនៅ​ចេតិយ មុខវត្តបទុមវត្តី ដូចការគ្រោងទុក ។

បើទោះបីជាលោកប្រធាន សម រង្ស៊ី និងលោកអនុ​ប្រធាន កឹម សុខា ដឹកនាំសកម្មជនគណបក្ស និងបងប្អូនប្រជាពលរដ្ឋប្រារព្វពិធីបុណ្យបង្សុកូលប្រព្រឹត្តទៅដោយរលូនក៏ពិតមែននៅមុខ​ចេតិយ មុខវត្តបទុមវត្តី តែពលរដ្ឋ សកម្មជនគណបក្ស ត្រូវបានសមត្ថកិច្ចត្រួតពិនិត្យ ឆែកឆេ រារាំងបង្ក ការរំបាកយ៉ាងខ្លាំងដល់ពួកគាត់ ។

ជាមួយគ្នានោះ ផ្លូវក្នុងទីក្រុងភ្នំពេញមួយចំនូនក៏ត្រូវបានបិទ ដោយមានការដាក់ប៉ារ៉ាស និង បន្លាលួស មិនឲ្យពលរដ្ឋឆ្លងកាត់ ក្នុងគោលបំណងរារាំងពលរដ្ឋមិនឲ្យ​មកចូលរួមពិធីបង្សុកូល​ជួនដួងវិញ្ញាណក្ខណ្ឌវីរបាតុចំនួន១៦នាក់ ដែលបានស្លាប់បាត់បងអាយុជីវិតយ៉ាងអយុត្តិធម៌ កាលពី ថ្ងៃទី៣០ មីនា ឆ្នាំ១៩៩៧ នៅមុខមន្ទីររដ្ឋសភាចាស់ ដែលដឹកនាំដោយលោកប្រធាន សម រង្ស៊ី ធ្វើបាតុកម្មទាមទារឲ្យតុលាការយុត្តិធម៌ និងឯករាជ្យ ហើយត្រូវជនមិនស្គាល់មុខ គប់​គ្រាប់បែក​ដៃចំនួន៣គ្រាប់ចូលហ្វូងបាតុករ ។

ក្រៅពីការស្លាប់វីរបាតុករចំនួន១៦នាក់ នៅមានជនរងគ្រោះរងរបួសធ្ងន់ និងស្រាលចំនួន១០០​នាក់​ផ្សេងទៀត ហើយរហូតមកទល់ពេលនេះអស់រយៈពេល១៧ឆ្នាំហើយ សមត្ថកិច្ចនៅមិនទាន់ វែកមុខឃាតករ ដើម្បីយកមកផ្តន្ទាទោស ផ្តល់យុត្តិធម៌ជូនជនរងគ្រោះ និងគ្រួសារជនរងគ្រោះ​នៅឡើយទេ ។

ជាមួយគ្នានោះលោកអនុប្រធាន កឹម សុខា បានមានប្រសាសន៏ថា អស់រយៈពេល១៧ឆ្នាំ បើទោះ បីជាមិនទាន់រកឃើញឃាតករយ៉ាងណាក៏ដោយ ក៏ប៉ុន្តែពិភពលោក និងប្រជាពលរដ្ឋខ្មែរ បាន​ដឹង​ច្បាស់អស់ហើយថា អ្នកណាជាឃាតករនោះ តែដោយសារសព្វថ្ងៃឃាតករ​នៅមានអំ​ណាច​រឹងនាំនៅឡើយ ហើយតុលាការគ្មានយុត្តិធម៌ យើងមិនទាន់ចាប់ឃាតករទាំង នោះយកមកផ្តន្ទា​ទោស ដើម្បីផ្តល់យុត្តិធម៌ជូនជនរងគ្រោះ និងគ្រួសារជនរងគ្រោះនៅឡើយ តែលោកមានសង្ឃឹម​យ៉ាង​រឹងមាំថា ថ្ងៃណាមួយឃាតករដៃឆៅនោះ និងត្រូវបានចាប់មកផ្តន្ទាទោសជាក់ជាមិនខាន ។

លោកប្រធាន សម រង្ស៊ី ថ្លែងថា ក្នុងនាមលោកជាអ្នកដឹកនាំមហាវីរបាតុករ ធ្វើមហាបាតុកម្មទាម ទារឲ្យតុលាការមានយុត្តិធម៌ កាលពីឆ្នាំ១៩៩៧នោះ ហើយត្រូបានឃាតករដៃឆៅគប់គ្រាប់បែប ចូលហ្វូងមហាបាតុករ ដែលបណ្តាលឲ្យវីរបាតុការចំនួន១៦នាក់ស្លាប់ បាត់បងជីវិតនោះ លោក​មិន​ដែលភ្លេចម្តងណាទេ ហើយដរាបណាលោកនៅមានជីវិត គឺលោកនៅតែបន្តរកយុត្តិធម៌ជូន​ជនរងគ្រោះឲ្យទាល់តែបាន ។

លោកប្រធាន បានបន្តទៀតថា មិនយូទេជនឧក្រិដដែលជាឃាតករ និងត្រូវតុលាការអន្តរជាតិ បាប់យកទៅផ្តន្ទាទោសជាក់ជាមិនខាន បើទោះបីជាមានអំណាចយ៉ាងណាក៏ដោយនោះ ។

គួរជំរាបជូនថា នៅបន្ទាប់ពីពិធីបុណ្យបង្សុកូលជូនវិញ្ញាណក្ខណ្ឌ វីរបាតុការនៅមុខ​ចេតិយ មុខវត្តបទុមវត្តី បានបញ្ចប់នៅវេលាម៉ោង១១ លោកប្រធាន សម រង្ស៊ី និងលោកអនុប្រធាន កឹម សុខា បានដឹកនាំពលរដ្ឋ ដោយធ្វើដំណើរចេញពីចេតិយ មុខវត្តបទុមវត្តី មកកាន់ស្នាក់ការ​កណ្តាលគណបក្សសង្គ្រោះជាតិ ដើម្បីធ្វើសមាជមហាជន ។

ការផ្លាស់ប្តូរទីតាំងធ្វើសមាជមហាជន គឺថ្នាក់ដឹកនាំគណបក្សសង្គ្រោះជាតិ បញ្ជៀសការកើត មានហិង្សា ព្រោះកម្លាំងសមត្ថកិច្ចជាច្រើនរយនាក់ ត្រៀមធ្វើការបង្ក្រាបមកលើពលរដ្ឋនៅ ចេតិយ មុខវត្តបទុមវត្តី ដោយមិនឲ្យគណបក្សសង្គ្រោះជាតិ ធ្វើសមាជនៅទីនោះឡើយ បន្ទាប់ ពីសាលាក្រុង និងក្រសួងមហាផ្ទៃមិនអនុញ្ញាតឲ្យគណបក្សសង្គ្រោះជាតិ ធ្វើសមាជមហាជន នៅទីលានប្រជាធិបតេយ្យនោះ ៕