សហគមន៍ដីធ្លីនៅភ្នំពេញបន្តស្វែងរកការដោះស្រាយបញ្ហាដីធ្លីរបស់ខ្លួននិងទាមទារឲ្យមានការដោះលែងអ្នកជាប់ឃុំទាំង២១នាក់នៅត្រពាំងផ្លុង

 

នៅបន្ទាប់ពីបានដាក់ញត្តិជូនតំណាងរាស្រ្តសហគមន៏ អ៊ឺរ៉ុប ដើម្បីឲ្យមានការអន្តរាគម៏ ចំពោះ រឿងដីធ្លី និងឲ្យមានការអន្តរាគមន៏ដោះលែងអ្នកជាប់ឃុំចំនួន២១នាក់ នៅមណ្ឌលកែប្រែ ម៣ ត្រពាំងផ្លុង ជាថ្មីម្តងទៀត សហគមន៍​ដីធ្លី​នៅ​រាជធានី​ភ្នំពេញ និង​គ្រួសារ​អ្នក​ជាប់​ឃុំទាំង២១​នាក់ បានប្រមូលផ្តុំ​គ្នា​នៅ​មុខ​ក្រសួង​យុត្តិធម៌នៅព្រឹកថ្ងៃទី២៨ មីនា ទាមទារនិងជំរុញ​ឲ្យ​រដ្ឋមន្ត្រី​ក្រសួង​យុត្តិធម៌ ពន្លឿន​ការ​ដោះ​ស្រាយ​​បញ្ហា​ដីធ្លី និង​ឲ្យមានការដោះលែង​អ្នក​ជាប់​ឃុំ​ទាំង​២១​នាក់ នៅ​មណ្ឌលកែប្រែ ម៣ ត្រពាំងផ្លុង​ឲ្យបាន​ឆាប់​ទៅតាមញ​ត្តិ​របស់​ពួកគេ ដែល​បាន​ដាក់​សុំ​អន្តរាគមន៍​នា​ពេលកន្លងមក ។​

បន្ទាប់មក ប្រជាសហគមន៍តំបន់បឹងកក់ បុរីកីឡា ថ្មគោល និងគ្រួសារ​ជនរងគ្រោះ បានបន្តទៅ​ប្រមូលផ្តុំ​គ្នា​នៅ​មុខតុលាការកំពូល និង នៅមុខព្រះបរមរាជវាំង ដើម្បីទាមទារឲ្យមានការដោះ​លែងលោក វន់ ពៅ និងអ្នកជាប់ឃុំចំនួន២០នាក់ផ្សេងទៀត ។

សូមជំរាបថា កាលពី​ថ្ងៃ​២៧ មីនា អ្នក​មាន​ជម្លោះ​ដីធ្លី​ មក​ពី​សហគមន៍​ផ្សេងៗ​គ្នា​នៅ​ភ្នំពេញ ក៏​បាន​ដាក់​ញត្តិ រក​អន្តរាគមន៍​នៅ​ស្នាក់ការ​សហភាព​អឺរ៉ុប​ប្រចាំ​នៅ​កម្ពុជា ដើម្បី​ជំរុញ​ឲ្យ​រដ្ឋាភិបាល រក​ដំណោះស្រាយ បញ្ចប់​ជម្លោះ​ដីធ្លី និង​ដោះលែង​អ្នក​ជាប់​ឃុំ​ទាំង២១​នាក់ នៅមណ្ឌលកែប្រែ ម៣ ត្រពាំងផ្លុងឲ្យមាន​សេរីភាពឡើង​វិញ​ផង​ដែ ៕