សវនាការលើករណី លោក វន់ ពៅ និងជនជាប់ចោទ២២នាក់ ទាក់ទងនឹងការតវ៉ានៅរោងចក្រយ៉ាកជីង និងនៅសួនឧស្សាហកម្មកាណាឌីយ៉ា ត្រូវបានសាលាដំបូងរាជធានីភ្នំពេញ ប្រកាសផ្អាកជាថ្មីទៀតនៅម៉ោង៣ និង៤៥នាទីរសៀលនេះ ហើយនឹងបន្តនៅថ្ងៃទី២០ ខែឧសភាខាងមុខទៀត។
ក្រោយសវនាការ ជាង៦ម៉ោងមក ជាលទ្ធផលនៅបន្ទប់សវនាការទីមួយ បានសួរចម្លើយជនជាប់ចោទបាន ៧នាក់ ក្នុងចំណោម១០នាក់ ចំណែកបន្ទប់សវនាការទីពីរ គឺបានបញ្ចប់ការសួរចម្លើយជនជាប់ចោទទាំង ១៣នាក់។
មេធាវីការពារក្តីជនជាប់ចោទ លោក សំ សុគង់ ឲ្យដឹងក្រោយបិទសវនាការថា ដំណើរជំនុំជម្រះនៅថ្ងៃនេះ ចៅក្រម លោក កែវ មុនី ហាក់មានភាពលំអៀងចំពោះក្នុងការដាក់បន្ទុក និងសម្ពាធលើកូនក្តីលោកក្នុងការឆ្លើយសំនួរ ជាពិសេសគឺភ័ស្តុតាងដែលតំណាងអយ្យការបានលើកឡើង ៖«ទាក់ទងនឹងភស្តុតាង ដែលលោក តំណាងអយ្យការបានលើកឡើង ឃើញថា ដូចខ្ញុំបានលើកឡើងនៅពេលសវនាការអញ្ចឹង ភស្តុតាងនេះ បើនិយាយពីភាពជឿជាក់ ក៏ដូចជាភស្តុតាងដែលដាក់បង្ហាញក្នុងពេលសវនាការនេះ គឺយើងអត់អាចទទួលយកបានទេ ព្រោះយើងអត់ដឹងថា ភស្តុតាងនេះ ដកហូតពីណាមកទេ។»
ក្នុងការសាកសួរអស់ពេលជាង២ម៉ោង នៃបន្ទប់សវនាការទីមួយនៅរសៀលនេះ មានតែជនជាប់ចោទមួយរូបប៉ុណ្ណោះ ឈ្មោះ សុគន្ធ សម្បត្តិពិសិដ្ឋ អាយុ ៣១ឆ្នាំ ជាមន្ត្រីចងក្រងនៃអង្គការក្លារី បានឆ្លើយតបការចោទប្រកាន់។ ក្នុងសវនាការនេះ តំណាងអយ្យការ បានបង្ហាញរូបថតដាក់បន្ទុក លើជនជាប់ចោទរូបនេះដោយមិនបានភ្ជាប់ ជាមុនក្នុងសំណុំរឿង ដែលនាំឲ្យជនជាប់ចោទ និងមេធាវីការពារក្តី បដិសេធចោល តែមិនត្រូវបានចៅក្រមពិចារណា ដោយអះអាងថា ការបង្ហាញភ័ស្តុតាងជារូបថតដាក់បន្ទុកនេះ មិនខុសពីនីតិវិធីឡើយ ព្រោះរូបថតនោះ ទើបទទួលបានអំឡុងពេលជំនុំជម្រះ។ ដោយឡែក នៅពេលមេធាវី ស្នើបង្ហាញវីដេអូឃ្លីប ដើម្បីដោះបន្ទុកវិញនោះ គឺត្រូវបានចៅក្រមបដិសេធ ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត ឲ្យដឹងតាមការសងេ្កតក្នុងសវនាការនេះ ឃើញថា ចៅក្រមបានសួរនូវសំណួរដដែលជាច្រើនសារ ដែលអាចជាចេតនាពន្យាពេល ជំនុំជម្រះក្តី ខណៈដែលការចរចាផ្នែកនយោបាយរបស់គណបក្សជាប់ឆ្នោតទាំងពីរ នៅជាប់គាំង។ លោកស្នើឲ្យតុលាការពន្លឿននិតីវិធីក្នុងការជំនុំជម្រះ ដោយអព្យាក្រិត្យ ដើម្បីឲ្យជនជាប់ចោទទាំងនោះ ទទួលបានសេរីភាពវិញ ព្រោះពួកគេមិនពាក់ព័ន្ធនឹងការបង្កហិង្សានោះទេ ៖«បើសិនជាតុលាការឈរលើជំហរឯករាជ្យភាព ដើម្បីផ្តល់យុត្តិធម៌ យើងទាំងអស់គ្នា ដឹងហើយថា អ្នកទាំង២៣ គ្រាន់តែជាឧបករណ៍ ជាមធ្យោបាយ ឬជាកូនអុករបស់អ្នកនយោបាយទេ បើសិនជាធាតុពិតនៃបទល្មើស អ្នកទាំងអស់នោះ មិនមានការប្រព្រឹត្តបទល្មើសដូចការចោទជាក់ស្តែងទេ អញ្ចឹងបើសិនជាតុលាការឈរលើជំហរឯករាជ្យ ខ្ញុំជឿជាក់ថា អ្នកទាំងអស់នោះ នឹងត្រូវលើកលែងការចោទប្រកាន់ ហើយនឹងមានសេរីភាពឡើងវិញ។»
ទន្ទឹមនឹងការរង់ចាំសវនាការជំនុំជម្រះ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលជាជនជាប់ចោទមួយរូបដែលនោះ ឲ្យដឹងថា លោក ត្រូវការសេរីភាព និងយុត្តិធម៌ ដើម្បីទៅព្យាបាលជំងឺ និងបន្តរកយុត្តិធម៌ក្នុងសង្គម។
គួរបញ្ជាក់ថា ជនជាប់ចោទទាំង២៣នាក់នោះ ត្រូវបានអាជ្ញាធរចាប់ខ្លួនកាលពីថ្ងៃទី០២ និងទី០៣ ខែមករា នៅពេលដែលពួកគេឃ្លាំមើល និងចូលរួមតវ៉ាទាមទារដំឡើងប្រាក់ឈ្នួលគោល ១៦០ដុល្លារដល់កម្មករ នៅមុខរោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង។ ពួកគេ រងនូវការចោទប្រកាន់ ពីបទ ហិង្សាដោយចេតនាមានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ ក្នុងនោះកម្មករម្នាក់ដែលជាប់ឃុំ និងពីរនាក់ ដែលត្រូវបានដោះលែងនៅក្រៅឃុំបណ្តោះអាសន្ន កាលពីថ្ងៃទី៨ ខែកុម្ភៈ ត្រូវបានចោទប្រកាន់ថែមពីរករណីទៀត ពីបទប្រមាថមន្ត្រីសាធារណៈ និងបង្កឲ្យខូចសណ្តាប់ធ្នាប់សាធារណៈ៕
No comments:
Post a Comment
yes