កម្មកររោងចក្រកាត់ដេរសំលៀកបំពាក់ខេមបូហេនសាំ (Cambo Handsome) ស្ថិតនៅតាមបណ្តោយផ្លូវជាតិលេខ៤ ក្នុងខណ្ឌពោធិ៍សែនជ័យ ប្រមាណជាង២០០០នាក់ បន្តធ្វើបាតុកម្មទាមទារឲ្យក្រុមហ៊ុនដកតំណាងសហជីពម្នាក់ និងលក្ខខណ្ឌការងារមួយចំនួន។
អ្នកស្រី ភី ស្រីមុំ អះអាងជាតំណាងកម្មកររោងចក្រខេមបូហេនសាំ ប្រាប់ VOD នៅព្រឹកថ្ងៃព្រហស្បតិ៍នេះថា កម្មករបានធ្វើបាតុកម្មរយៈពេលពីរថ្ងៃមកហើយ ដោយទាមទារលក្ខខណ្ឌការងារមួយចំនួន ក្នុងនោះគឺទាមទារឲ្យរោងចក្រដកតំណាងសហជីពម្នាក់ឈ្មោះលុន ចេញពីការងារ ព្រោះតំណាងសហជីពរូបនោះ ធ្វើការលម្អៀង និងរើសអើងកម្មករ។
តំណាងសហជីពមិត្តភាពកម្មករប្រចាំរោងចក្រខេមបូហេនសាំ លោក ម៉ៅ វណ្ណៈ បន្ថែមថា លក្ខខណ្ឌការងារដែលកម្មករទាមទារចម្បងនោះ គឺឲ្យរោងចក្រផ្តាច់កិច្ចសន្យាចាស់ ហើយអនុវត្តកិច្ចសន្យាមានកំណត់វិញ ព្រមទាំងទាមទារប្រាក់បំណាច់៥%។ លោកបន្តថា នៅពេលកំពុងធ្វើបាតុកម្ម កងសន្តិសុខខណ្ឌប្រមាណជាង១០នាក់ បានមកចាប់រូបលោក និងតំណាងសហជីពម្នាក់ទៀត ប៉ុន្តែត្រូវបានកម្មកររារាំង។
VOD មិនអាចសុំការអត្ថាធិប្បាយ ពីប្រធានរោងចក្រខេមបូហេនសាំបាននៅឡើយទេ។
ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា ការធ្វើបាតុកម្មជាបន្តបន្ទាប់ពីសំណាក់កម្មកររោងចក្រនេះ ជាកត្តាមួយដែលរាជរដ្ឋាភិបាលគួរតែយកចិត្តទុកដាក់។ លោកបន្តថា ភាគីរោងចក្រតែងតែព្យាយាមគេចវេស និងចាប់ខ្លួនអ្នកដែលហ៊ានតវ៉ាទាមទារលក្ខខណ្ឌការងារសមរម្យ។
កម្មកររោងចក្រកាត់ដេរសំលៀកបំពាក់ខេមបូហេនសាំជាង២០០០នាក់ បានធ្វើបាតុកម្មនៅមុខរោងចក្រ តាំងពីថ្ងៃម្សិលមិញមក។ ពួកគេបានអះអាងថា នឹងបន្តធ្វើបាតុកម្មទាមទារលក្ខខណ្ឌការងារនេះ រហូតដល់មានដំណោះស្រាយ៕
No comments:
Post a Comment
yes