ធនាគារពិភពលោកសន្យាតាមដានដំណើរការដោះស្រាយ
ជម្លោះដីបឹងកក់
ដោយ យន់ សាមៀន
ធនាគារពិភពលោក នៅថ្ងៃទី១៦ ឧសភា បានជំរុញឲ្យរដ្ឋាភិបាលកម្ពុជា ដោះ ស្រាយបញ្ហាចម្រូងចម្រាសទាក់ទងនឹងពលរដ្ឋក្រីក្ររាប់ពាន់គ្រួសារ នៅតំបន់បឹងកក់ ដែលកំពុងរងការគំរាមកំហែងបណ្ដេញចេញពីលំនៅឋានដោយបង្ខំ ដើម្បីយកដីឲ្យក្រុមហ៊ុនអភិវឌ្ឍន៍។
RFA/Uon Chhinប៉ូលិសត្រៀមបំបែកក្រុមអ្នកតវ៉ាមកពីតំបន់បឹងកក់នៅមុខផ្ទះ
លោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ រាជធានីភ្នំពេញ
កាលពីថ្ងៃទៅ១ ខែតុលា ឆ្នាំ២០១០។
សេចក្ដីថ្លែងការណ៍របស់ធនាគារពិភពលោកបញ្ជាក់ថា ម្ចាស់ដីបឹងកក់ កំពុងព្យាយាមស្វែងរកដំណោះស្រាយជាមួយរដ្ឋាភិបាល ហើយធនាគារនឹងតាមដានយ៉ាងយកចិត្តទុកដាក់ក្នុងដំណើរការស្វែងរក ដំណោះស្រាយនេះ។
រដ្ឋាភិបាលកម្ពុជា បានបរាជ័យក្នុងការដោះស្រាយវិបត្តិដីធ្លីតំបន់បឹងកក់ បើទោះបីជាធនាគារបានដាក់ឱសានវាទឲ្យរដ្ឋាភិបាលដោះស្រាយឲ្យចប់ ពាក់កណ្ដាលត្រឹមខែឧសភា នេះក៏ដោយ។
អ្នកភូមិតំបន់បឹងកក់ ធ្លាប់បានគំរាមធ្វើបាតុកម្មដង្ហែជុំវិញរាជធានីភ្នំពេញ នៅពេលឆាប់ៗខាងមុខនេះ ប្រសិនបើអាជ្ញាធររាជធានីភ្នំពេញ មិនឆ្លើយតបទៅនឹងការស្នើសុំជួបចរចាជាមួយអ្នកភូមិ ដើម្បីដោះស្រាយជម្លោះដីនោះទេ។
ប្រជាពលរដ្ឋរស់នៅតំបន់បឹងកក់ បានឲ្យដឹងថា ប្រជាពលរដ្ឋតំបន់បឹងកក់កំពុងរង់ចាំចម្លើយពីលោកអភិបាលក្រុង បន្ទាប់ពីពួកគេបានដាក់លិខិតស្នើឲ្យមានការចរចាបញ្ចប់ទំនាស់ដី ធ្លីដ៏រ៉ាំរ៉ៃនេះ កាលពីដើមខែឧសភា ឆ្នាំ២០១១ នៅពេលដែលក្រុមហ៊ុនសូកាគូកំពុងធ្វើសកម្មភាពបូមខ្សាច់ពន្លិចបឹង កក់ ដែលបណ្ដាលឲ្យប៉ះពាល់ផ្ទះរបស់ពលរដ្ឋ។
បច្ចុប្បន្នប្រជាពលរដ្ឋកំពុងរស់នៅតំបន់បឹងកក់ មាន ១.៥០០គ្រួសារ។ ពួកគេកំពុងកាន់កាប់ដីជិត ១០ហិកតារ ក្នុងចំណោមដី ១៣៣ហិកតារ ដែលត្រូវអភិវឌ្ឍន៍ដោយក្រុមហ៊ុនស៊ូកាគូ៕
ពីវិទ្យុ ៖ អាស៊ីសេរី
No comments:
Post a Comment
yes