អាល្លឺម៉ង់៖ អាស៊ានគួរពិចារណាលើភូមាដែលចង់ធ្វើ
ប្រធានអាស៊ានឆ្នាំ ២០១៤
ដោយ ឈាង បុប្ផា
នៅក្នុងវេទិកាជាមួយមន្រ្តីរដ្ឋាភិបាលសិង្ហបុរី នៅថ្ងៃព្រហស្បតិ៍ទី ២ មិថុនា នាយករដ្ឋមន្រ្តីអាល្លឺម៉ង់បានជម្រុញឲ្យសមាគមអាស៊ានពិភាក្សាឲ្យបាន ល្អិតល្អន់ និង និយាយបើកចំហរពីបញ្ហាសិទ្ធិមនុស្សនៅភូមា មុននឹងប្រគល់តំណែងប្រធានអាស៊ាន ទៅឲ្យភូមា កាន់កាប់ សម្រាប់ឆ្នាំ ២០១៤។ សម្រាប់លោកស្រី Angela Merkel បេសកកម្មដើម្បីភូមាគោរពលទ្ធិប្រជាធិបតេយ្យមិនមែនជាការងាររបស់ របស់តំបន់អាស៊ីអាគ្នេយ៍តែមួយប៉ុណ្ណោះទេ ប៉ុន្តែវាករណីកិច្ចដែលពិភពលោកទាំងមូលត្រូវតែអនុវត្តឲ្យបាន។
លោកស្រី Angela Merkelថ្លែងនៅក្នុងវេទិកាក្នុងទីក្រុងសិង្ហបុរី នៅថ្ងៃទី ២ មិថុនា ២០១១ ដោយសុំឲ្យអាស៊ានពិចារណាល្អិតល្អន់
លើរឿងដែលភូមាចង់ធ្វើជាប្រធាន អាស៊ាន ឆ្នាំ ២០១៤
©REUTERS/Edgar Su
©REUTERS/Edgar Su
នៅក្នុងប្រទេសសិង្ហបុរី ដែលជាស្ថាបនិកដំបូងគេ សមាគមអាស៊ាន លោកស្រីនាយករដ្ឋមន្រ្តីអាល្លឺម៉ង់ បានបង្ហាញជំហររារែក មិនគាំទ្រឲ្យភូមាធ្វើជាប្រទេសម្ចាស់ផ្ទះ រៀបចំកិច្ចប្រជុំកំពូលអាស៊ាន នៅឆ្នាំ ២០១៤។ និយាយទៅកាន់មន្រ្តីរដ្ឋាភិបាល មន្រ្តីទូតបរទេស នៅក្នុងវេទិកា រៀបចំ នៅថ្ងៃនេះ ក្នុងទីក្រុងសិង្ហបុរី នាយករដ្ឋមន្រ្តីអាល្លឺម៉ង់ បានបញ្ជាក់ត្រង់ៗថា លោកស្រីមានការព្រួយបារម្ភ នៅពេលឃើញភូមាក្នុងស្ថានភាពបច្ចុប្បន្ន ប្រាថ្នាចង់ធ្វើជាប្រធានអាស៊ាន ឲ្យខានតែបាន នៅឆ្នាំ ២០១៤។
បើតាមលោកស្រី Angela Merkel ថ្នាក់ដឹកនាំភូមាបច្ចុប្បន្ន មិនទាន់បានបង្ហាញពីចេតនាពិតប្រាកដរបស់ពួកគេក្នុងការដើរទៅរកលទ្ធិ ប្រជាធិបតេយ្យទេ។ ដូច្នេះលោកស្រីសុំជម្រុញប្រទេសសមាជិកអាស៊ានផ្សេងទៀតនិយាយលើកឡើង ពីបញ្ហានៅភូមាឲ្យបានទូលំទូលាយ។ ភូមាបានរៀបចំការបោះឆ្នោត និងបានប្តូរនយោបាយពីការគ្រប់គ្រងដោយរបបសឹក មកជារដ្ឋាភិបាលស៊ីវិល ប៉ុន្តែ ភូមា នៅតែត្រូវអង្គការការពារសិទ្ធិមនុស្សរិះគន់ថា នៅបន្តនយោបាយបិទសេរីភាព និងគាបសង្កត់ គណបក្សប្រឆាំង។ ថ្មីៗនេះ អាមេរិកទើបសម្រេចបន្តការដាក់ទណ្ឌកម្មសេដ្ឋកិច្ចទៅលើរដ្ឋាភិបាល ភូមា។
សូមរំលឹកថា ដោយសារអន្តរជាតិបានដាក់គំនាបខ្លាំងលើស្ថានភាពមិនគោរពសិទ្ធិមនុស្ស ភូមាត្រូវបោះចោលតំណែងប្រធានអាស៊ាន ឆ្នាំ ២០០៦ ទៅឲ្យប្រទេសឡាវ។ ដើម្បី ឆ្លើយតបនឹងការទាមទាររបស់ប្រទេសសមាជិកអាស៊ានផ្សេងទៀត របបសឹកបានរៀបចំការបោះឆ្នោត ប្តូររបបនយោបាយ ថ្មី និង ចេញមុខ ប្រញាប់រួសរាន់ដើម្បីទាមទារតំណែងខ្លួនមកវិញ គឺធ្វើជាប្រធានអាស៊ាន ក្នុងឆ្នាំ ២០១៤។ ក្នុងកិច្ចប្រជុំកំពូលអាស៊ាន ថ្នាក់រដ្ឋមន្រ្តីការបរទេស អាស៊ាន នៅដើមខែឧសភា បានសម្រេចឲ្យភូមាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន ឆ្នាំ ២០១៤។
អ្នកវិភាគខ្លះមើលឃើញថា ប្រតិកម្មរបស់ថ្នាក់ដឹកនាំអាល្លឺម៉ង់ មកពីអឺរ៉ុប នឹងអាចធ្វើប្រទេសសមាជិកអាស៊ានគិតពិចារណាឡើងវិញថាតើគេគួរទុកឲ្យ ភូមាឡើងធ្វើប្រធានអាស៊ាន ដែរឬទេ? ក្រុមអង្គការការពារសិទ្ធិមនុស្សធ្លាប់បាននិយាយថា ភូមាបច្ចុប្បន្ននៅតែរុំព័ន្ធដោយការរិះគន់ ដូចជាការបោះឆ្នោតមិនត្រឹមត្រូវ និងការចាប់ឃុំអ្នកទោសនយោបាយជាង ២០០០នាក់។ ដូច្នេះ ការផ្តល់តំណែងប្រធានដឹកនាំអាស៊ានទៅឲ្យភូមា នឹងធ្វើប្រទេសសមាជិកអាស៊ានដទៃទៀតទើសទាល់ខ្លាំង ពីព្រោះអាស៊ានពេលនេះកំពុងស្វែងរកការជឿទុកចិត្ត ក្នុងនយោបាយអន្តរជាតិ៕
BY: RFI
No comments:
Post a Comment
yes