កម្មកររោងចក្រកាត់ដេរ ស៊ូភើថិច នៅក្នុងសង្កាត់ចាក់អង្រែក្រោម ខណ្ឌមានជ័យ ជាង ១០០០នាក់ បានបើកប្រាក់សំណងផ្តាច់កិច្ចសន្យា នៅព្រឹកថ្ងៃព្រហស្បតិ៍នេះ បន្ទាប់ពីពួកគេបានតវ៉ាបិទកំណាត់ផ្លូវជាតិលេខ ២ ជាថ្មីម្តងទៀត នៅម៉ោង៨ព្រឹកថ្ងៃព្រហស្បតិ៍នេះ ។
តំណាងសហជីពឯករាជ្យកម្មករកម្ពុជា អ្នកស្រី រស់ ចាន់ណា បានប្រាប់សំឡេងប្រជាធិបតេយ្យវីអូឌីថា មូលហេតុ ដែលកម្មករបិទផ្លូវដោយសារកាលពីម្សិលមិញមន្រ្តីដោះស្រាយវិវាទការងារសន្យាថា បើកប្រាក់បំណាច់នេះ នៅម៉ោង ៨ព្រឹកនេះ តែមកដល់ម៉ោង៨ មិនឃើញមានអ្នកបើកប្រាក់ឲ្យ ទើបពួកគេនាំគ្នាបិទផ្លូវតែម្តង ៖”ថ្ងៃនេះជាង ១០០០នាក់ស្ទះផ្លូវជាងមួយម៉ោង លែងអីហើយឥលូវ ឥលូវឯកឧត្តមគាត់តេមកគាត់មកដល់ក្បាលថ្នល់ហើយឡានលុយហ្នឹង តេមកបណ្ដើរៗហើយ អោយបងប្អូនយើងចូលរៀបជាជួរអីអញ្ចឹងចាំគាត់ផងអីផង"។
ក៏ប៉ុន្តែបន្ទាប់ពីតវ៉ាបិទកំណាត់ផ្លូវជាតិលេខ២នោះ គណៈកម្មធិការដោះស្រាយវិវាទការងារ បានសន្យាជាថ្មីទៀតថា នឹងបើកប្រាក់ផ្តាច់កិច្ចសន្យា ឲ្យអស់នៅថ្ងៃនេះ។
អ្នកស្រី ស សុភា ជាកម្មករម្នាក់ក្នុងចំណោមអ្នកតវ៉ានោះ មានប្រសាសន៍ថា គាត់ធ្វើការបានរយៈពេល ១០ឆ្នាំ ដែលនៅក្រសួងការងារបានបិទប្រកាសថា គាត់នឹងត្រូវទទួលបានប្រាក់សំណងសរុប១០០០ដុល្លារ តែនៅពេលចេញវិក័យប័ត្របើកប្រាក់ គាត់ឃើញតែចំនួន ៨០០ដុល្លារ តែប៉ុណ្ណោះ តែថាគាត់នឹងទទួលយកសិន ៖” ចាស!ខ្ញុំធ្វើការបាន១០ឆ្នាំ ហើយលុយហ្នឹងបើតាមខ្ញុំគិតដូចថា មិនទាន់គ្រប់ចំនួនរបស់ខ្ញុំទេ ក៏ប៉ុន្តែខ្ញុំទទួលយកលុយសិន ខ្ញុំរងចាំរយះពេលបីខែហើយ ដល់ពេលបានលុយអញ្ចឹង លឺ សូរអញ្ចឹងមានអារម្ភណ៍ត្រេកអរខ្លាំង”។
គួររំលឹកដែរថា កម្មកររោងចក្រស៊ូភើតិច នៅក្នុងសង្កាត់ចាក់អង្រែក្រោម ខណ្ឌមានជ័យ ធ្លាប់តវ៉ាដោយបិទកំណាត់ផ្លូវជាតិលេខ២នោះ ជាច្រើនលើករួចមកហើយ បន្ទាប់រោងចក្រប្រកាសបិទទ្វាររោងចក្រ ដោយមិនទាន់បានទូទាត់ប្រាក់សំណងផ្សេងៗតាមច្បាប់ការងារ៕
BY: VOD
No comments:
Post a Comment
yes