មន្ត្រីបក្សប្រឆាំងស្នើឲ្យបញ្ឈប់ក្រុមហ៊ុន
វៀតណាមនៅតំបន់ព្រៃឡង់
សមាជិកសភាគណបក្សប្រឆាំងមួយរូបបានស្នើទៅលោកនាយករដ្ឋមន្ត្រី ហ៊ុន សែន ឲ្យបញ្ឈប់ជាបន្ទាន់សកម្មភាពកាប់បំផ្លាញព្រៃឈើនៅតំបន់ព្រៃឡង់របស់ក្រុមហ៊ុនវៀតណាម CRCK ហើយក៏បានស្នើទៅរដ្ឋមន្ត្រីក្រសួងកសិកម្មឲ្យចូលឆ្លើយសំណួរនៅ ក្នុងសភាជាតិនាដើមខែក្រោយផងដែរ។
ក្នុងលិខិតមួយដែលចុះហត្ថលេខាកាលពីថ្ងៃពុធដោយលោក សុន ឆ័យ សមាជិកសភាគណបក្សសមរង្ស៊ី ផ្ញើទៅកាន់លោកហ៊ុន សែន តាមរយៈលោក ហេង សំរិន ប្រធានរដ្ឋសភា លោក សុន ឆ័យ បានលើកឡើងថា ការកាប់បំផ្លាញព្រៃឈើបានកើតឡើងតាមរូបភាពថ្មី ដោយយកព្រៃស្រោងជាដីសម្បទានសេដ្ឋកិច្ចដើម្បីធ្វើចម្ការកៅស៊ូ ក្រោយពីលោកនាយករដ្ឋមន្ត្រីចាត់វិធានការតឹងរ៉ឹងក្នុងបំណងបញ្ឈប់ ការបំផ្លិចបំផ្លាញព្រៃឈើពីសំណាក់មន្ត្រីយោធាខិលខូចមួយចំនួន។ យោងតាមការបង្កវិនាសកម្មព្រៃឈើនេះ លោក សុន ឆ័យ បានស្នើដល់លោក ច័ន្ទ សារុន រដ្ឋមន្ត្រីក្រសួងកសិកម្មចូលឆ្លើយសំណួររបស់សមាជិកសភានៅដើមខែ តុលាខាងមុខ។
លិខិតរបស់លោក សុន ឆ័យ ក៏បានលាតត្រដាងពីឯកសារឆ្នាំ ២០០៨ ដែលផ្ញើជូនលោក ច័ន្ទ សារុន ដោយការិយាល័យសម្ព័ន្ធសហគ្រាសកៅស៊ូវៀតណាមប្រចាំនៅកម្ពុជា ដោយអះអាងថា ក្រុមហ៊ុនមួយចំនួនបានសម្រេចបំផ្លាញព្រៃឈើយកដីទៅដាំកៅស៊ូចំនួន ១៨ ៧៤៩ ហិកតានៅក្នុងខេត្តក្រចេះដោយមាន៤ក្រុមហ៊ុន ៨ ១០០ ហិកតា ក្នុងស្រុកសន្ទុក ខេត្តកំពង់ធំ ដោយក្រុមហ៊ុន Tan Bien Kampong Thom Aphivath និង ២ ៦១០ ហិកតាក្នុងខេត្តមណ្ឌលគិរីដោយក្រុមហ៊ុន DAK LAK។
លើសពីនេះទៀត លិខិតរបស់លោក សុន ឆ័យ ក៏បានអះអាងថា ក្នុងឆ្នាំ២០០៩ ក្រុមហ៊ុនវៀតណាមមានគម្រោងបំផ្លាញព្រៃឈើដាំដើមកៅស៊ូលើផ្ទៃដី១ ម៉ឺនហិកតាក្នុងខេត្តមណ្ឌលគិរី ១ម៉ឺនហិកតាក្នុងខេត្តក្រចេះ ៤ម៉ឺនហិកតាក្នុងខេត្តព្រះវិហារ និង១ម៉ឺនហិកតាក្នុងខេត្តរតនគិរី។
លិខិតនោះបញ្ជាក់ថា គ្រាន់តែឯកសារទាំងនេះ បានបង្ហាញពីភាពអនាធិបតេយ្យក្នុងការលក់ដូរព្រៃខ្វះការទទួលខុស ត្រូវរបស់ក្រសួងកសិកម្ម ហើយបាននាំឲ្យមានការកាប់ព្រៃគ្មានការហាមឃាត់និងលក់ដូរដីខ្មែរ តាមអំពើចិត្តទៅឲ្យក្រុមហ៊ុនបរទេស»។
លោករដ្ឋមន្ត្រី ច័ន្ទ សារុន មិនអាចទាក់ទងសុំការបំភ្លឺបានទេ ពីថ្ងៃព្រហស្បតិ៍ហើយលោក ច័ន្ទ តុងអ៊ីវ រដ្ឋលេខាធិការបានបដិសេធមិនធ្វើអធិប្បាយ។
លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបានថ្លែងថា អ្វីដែលបានលើកឡើងដោយគណបក្សប្រឆាំងចោទប្រកាន់រដ្ឋាភិបាល បើវាជាសំណើត្រឹមត្រូវរដ្ឋាភិបាលនឹងពិចារណាធ្វើកំណែទម្រង់។
លោកបានបញ្ជាក់ថា៖ «បញ្ហាដីសម្បទានអាចត្រូវយកមកពិចារណា ព្រោះសិទ្ធិឆ្លើយតបរបស់រដ្ឋាភិបាល គឺជាការយកចិត្តទុកដាក់របស់រដ្ឋាភិបាលនិងអាស្រ័យលើឯកសារ នោះសមរម្យដែរឬក៏អត់»៕ CR
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes