គ្រោះថ្នាក់ចរាចរណ៍ម៉ូតូបុកតគ្នាមួយករណីបានធ្វើឱ្យស្ដ្រីមានផ្ទៃពោះធ្លាយពោះវៀនចេញក្រៅហូរឈាមកក្លាក់ និងមនុស្ស២នាក់ទៀតរងរបួសស្រាល។ គ្រោះថ្នាក់ចរាចរណ៍នេះកើតឡើងនៅតាមបណ្ដោយផ្លូវអូរដឹមកប់ស្រូវ កែងផ្លូវបត់ចូលភូមិជង្រុកចំណុចមុខរោងចក្រស្បែកជើង ស្ថិតក្នុងភូមិជង្រុក សង្កាត់ត្រពាំងក្រសាំង ខណ្ឌដង្កោ នៅវេលាម៉ោង៨និង៤៦នាទីព្រឹកថ្ងៃទី២ តុលា។ ចំណែកស្ត្រីរងគ្រោះបន្ទាប់ពីបញ្ជូនមកដល់មន្ទីរពេទ្យព្រះកុសុមៈក៏បានស្លាប់រួមជាមួយទារកនៅក្នុងផ្ទៃផងដែរ ។
ប្រភពព័ត៌មានពីប៉ូលិសបានឱ្យដឹងថា មុនពេលកើតហេតុស្ដ្រីរងគ្រោះជិះម៉ូតូម៉ាកគុបជ្រុង៩០ ពណ៌ទឹកប៊ិច ពាក់ស្លាកលេខភ្នំពេញ 1A-9751 ម្នាក់ឯងក្នុងទិសដៅត្បូងទៅជើង។ លុះមកដល់ចំណុចកើតហេតុក៏បានបត់ឆ្វេងចូលទៅក្នុងភូមិជង្រុកក៏ត្រូវម៉ូតូម៉ាកសេ១២៥ ពណ៌ខ្មៅ ពាក់ស្លាកលេខភ្នំពេញ1AW-3990 ជិះមកពីក្រោយបុកតែម្ដង។ ស្របពេលនោះក៏មានម៉ូតូសង់កូរ៉េ ពណ៌ក្រហម ពាក់ស្លាកលេខកំពង់ស្ពឺ ក-៤៣២៦ ជិះមកពីក្រោយបុកបន្តគ្នាទៀត ។
ប្រភពដដែលបន្ដថា ការបុកបន្ដគ្នានោះមានតែស្ត្រីមានផ្ទៃពោះម្នាក់ប៉ុណ្ណោះដែលរងរបួសធ្ងន់រហូតធ្លាយពោះវៀនចេញមកក្រៅនិងស្លាប់ នៅមន្ទីរពេទ្យព្រះកុសុមៈ ចំណែកបុរស២នាក់ទៀតដែលបុកពីក្រោយបន្តគ្នាគ្រាន់តែរលាត់ដៃជើងបន្ដិចបន្ដួចប៉ុណ្ណោះ ។ ស្ត្រីរងគ្រោះឈ្មោះផល ចន្ធី អាយុ២៧ឆ្នាំ ជានិស្សិតពេទ្យឆ្នាំទី៤ នៃសាកលវិទ្យាល័យអន្តរជាតិ(IU) និងធ្លាប់មកធ្វើកម្មសិក្សានៅមន្ទីរពេទ្យព្រះកុសុមៈ មានទីលំនៅភូមិឃុយ ឃុំឪឡោក ស្រុកអង្គស្នួល ខេត្ដកណ្ដាល ។ ចំណែកប្ដីរបស់ស្ត្រីរងគ្រោះក៏ជាគ្រូពេទ្យដែរ ។ ក្នុងហេតុការណ៍នោះមានស្ដ្រីម្នាក់ដែលឃើញហេតុការណ៍គ្រោះថ្នាក់នោះ និងបានជួយជូនស្ត្រីរងគ្រោះមកកាន់មន្ទីរពេទ្យឱ្យដឹងថា គាត់មិនបានឃើញហេតុការណ៍បុកគ្នាទេ គ្រាន់តែឃើញនាងដេកស្ដូកស្ដឹងដោយមានធ្លាយពោះវៀនចេញមកក្រៅក៏ជួយមើលនិងជូនមកមន្ទីរពេទ្យតែម្ដង ។ ខណៈមកដល់មន្ទីរពេទ្យ គ្រូពេទ្យបានជួយខ្នះខ្នែងដុតដៃដុតជើងធ្វើការពិភាក្សាគ្នាដើម្បីធ្វើការវះកាត់ជួយសង្គ្រោះជីវិតដោយមិនអាចរង់ចាំសាច់ញាតិបងប្អូនបានទេ ដោយសារស្ត្រីរងគ្រោះមានផ្ទៃពោះ៧ខែ ដូច្នេះត្រូវជួយជីវិតទាំងម្តាយនិងកូននៅក្នុងផ្ទៃដែរ ។ មុនដំបូងគ្រូពេទ្យបានដាក់សេរ៉ូមបានប្រហែលមួយម៉ោងស្ត្រីរងគ្រោះបានដឹងខ្លួនឡើងវិញបន្ដិច ហើយគ្រូពេទ្យបានប្រជុំគ្នាដើម្បីធ្វើការវះកាត់។ ប៉ុន្ដែដោយសារស្ត្រីរងគ្រោះដាច់សរសៃឈាម បាក់ឆ្អឹងត្រគាកនិងបែកស្បូន បណ្ដាលឱ្យនាងហូរឈាមច្រើន សម្ពាធឈាមចុះខ្សោយពេកទើបគ្រូពេទ្យមិនអាចជួយសង្គ្រោះបាន ។
លោកវេជ្ជបណ្ឌិតបានមានប្រសាសន៍ថា ក្រុមគ្រូពេទ្យទាំងអស់បានប្រឹងប្រែងអស់ពីសមត្ថភាពដើម្បីជួយសង្គ្រោះជីវិតស្ត្រីរងគ្រោះដែរ ប៉ុន្ដែមិនអាចជួយបាន ដោយសារពេលបុកគ្នាដួលនោះនាងដាច់សរសៃឈាមធ្វើឱ្យឈាមហូរច្រើនពេកទើបមិនអាចសង្គ្រោះបានចំណែកកូនក្នុងផ្ទៃរបស់នាងស្លាប់ដោយសារបែកស្បូន។
សពស្ត្រីរងគ្រោះត្រូវបានប្តីនិងសាច់ញាតិនាំយកទៅធ្វើបុណ្យតាមប្រពៃណីនៅឯស្រុកកំណើត។ ឯម៉ូតូទាំង៣គ្រឿងនិងកាបូបរបស់ស្ត្រីរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌដង្កោដើម្បីធ្វើការដោះស្រាយ។ គេមិនដឹងថា ពេលបត់ម៉ូតូនោះស្ត្រីរងគ្រោះបានឱ្យភ្លើងស៊ីញ៉ូដែរឬបែបណាទេ ទើបម៉ូតូពីក្រោយបុកបន្តគ្នាបែបនេះ ៕
ពីគេហទំព័រ៖ កោះសន្តិភាព
No comments:
Post a Comment
yes